مويىنقۇم اۋدانىنداعى قۇرالاي سۇلۋ كەسەنەسى حالىق ءۇشىن قاسيەتتى ورنىنىڭ ءبىرى سانالادى. ويتكەنى ءتۇرلى اڭىز داستاندارعا ارقاۋ بولعان قۇرالاي سۇلۋ قازاق قوعامىندا سۇلۋلىقتىڭ سيمۆولىنا اينالعان. سوندىقتان دا قۇرالاي سۇلۋ كەسەنەسى «قازاقستاننىڭ كيەلى جەرلەرىنىڭ گەوگرافياسى» جوباسى بويىنشا قازاقستاننىڭ وڭىرلىك قاسيەتتى نىساندارى تىزىمىنە الىنعان دەپ جازادى Qamshy.kz اقپارات اگەنتتىگى. 

اڭىز دەرەكتەردە ءوز سوڭىنان وشپەس ءىز قالدىرىپ، اتى اڭىز-اڭگىمەلەردە كۇنى بۇگىنگە دەيىن ايتىلاتىن قۇرالاي سۇلۋدىڭ قىسقا عانا عۇمىرى قازىرگى مويىنقۇم وڭىرىندە ءوتىپتى. سۇلۋدىڭ ماڭگىلىك تۇراق تاپقان ورنى مويىنقۇم اۋدانى، كىشى قامقالى اۋىلى ماڭىنداعى قامقالى كولىنىڭ جاعاسى. ءدال وسى ورىندا شيكى كىرپىشتەن ورىلگەن كەسەنە شامامەن حVءىىى – ءحىح عاسىرلاردا سالىنعان ساۋلەت ەسكەرتكىشىنىڭ ەرەكشە ءبىر تۋىندىسىنا جاتادى. الايدا ۋاقىت سىنىنا توتەپ بەرە الماعان ەسكى قۇرىلىستىڭ توز-توز شىققان. ال 2014 جىلى كەسەنە جەرگىلىكتى كاسىپكەرلەردىڭ دەمەۋشىلىگىمەن قايتا قالپىنا كەلتىرىلگەن.

قۇرالاي سۇلۋ جايىندا مول دەرەكتەر جيىپ، وسى اتتاس پوەما جازعان اقىن يسا بايزاقوۆتىڭ مالىمەتىنە قاراعاندا قۇرالاي سۇلۋ قالماق نويانى مەن قازاق كەلىنشەگىنەن تۋعان. ءوزى جاۋلاعان وڭىردەگى وزىنە ۇناعان كەلىنشەكتى قانجىعاسىنا بايلاۋ جاۋكەرشىلىكتىڭ ەجەلدەن كەلە جاتقان قاعيداسى. كەيىننەن الگى قالماق نويانىنان قازاق كەلىنشەگى اقىلىنا كوركى ساي قۇرالاي اتتى سۇلۋ قىزدى ومىرگە اكەلەدى. قالماق قىزىق بولعانىمەن قۇرالاي قازاق جەرىن اتامەكەنىم دەپ بىلەدى. سوندىقتان سۇلۋ تۋعان ەلگە قايتا ورالۋدى تاپسىرعان انا اماناتىن ورىنداۋ ماقساتىندا كەلدەن دەگەن باتىرعا ەرىپ قالماقتاردان قاشىپ كەتەدى. الايدا سۇلۋعا وسى ساپار جولىندا نۋ قامىستىڭ ىشىندە جولبارىس كەزىگىپ، مەرت ەتەدى. ال ونىڭ وسى ساپاردا جولداسى بولعان كەلدەن باتىر كەيىننەن 40 نارعا جۇك ارتىپ كەلىپ، قۇرالاي سۇلۋ كەسەنە تۇرعىزادى.

اقىن ەل اۋزىنان ەستىگەن اڭىز-اڭگىمەلەردەگى دەرەكتەرگە سۇيەنە وتىرىپ، «قۇرالاي سۇلۋ» پوەماسىن جازادى. شىعارمادا قازاق پەن قالماق اراسىنداعى بىتىسپەس داۋ ارقىلى ادامگەرشىلىكتىڭ اق جولىن ناسيحاتتايدى. قۇرالاي بەينەسى اسقاقتاي كورىنىپ، كوركەمدىك كوكجيەگىمەن كوپتى تاڭداندىرادى.

سەيقىننىڭ ءبىر قىزى بار جاننان اسقان،

جەردە تۋىپ، كوكتە كۇنمەن نۇرىن قوسقان،

حان تۇگىل، حالقى ءسۇيىپ قۇرالايدى،

ءاردايىم، ايەلسىنبەي اقىلداسقان، – دەپ اسپەتتەلگەن قۇرالاي سۇلۋدىڭ قىلىعى مەن پاراساتى ءالى كۇنگە كوپشىلىككە ۇلگى ەتىلەدى.