ءبىتىم ءتاجىعۇل ۇلى 1946 جىلى ماڭعىستاۋ وبلىسىنىڭ ءتۇپقاراعان اۋدانىندا دۇنيەگە كەلگەن.

1963 جىلى فورت-شيەۆچەنكو قالاسىندا پوليتەحنيكالىق مەكتەپتى ءبىتىرىپ، 3-دارەجەلى بۇرعىشىنىڭ كومەكشىسى دەگەن قۇجات الىپ شىقتى. وسى جىلى قاتارىنىڭ ءبارى جان-جاققا وقۋعا اتتانىپ جاتقاندا، 10 بالانىڭ ۇلكەنى، ءۇيدىڭ قولعاناتى بولىپ وتىرعان ءبىتىم، اكەسى سوعىس ارداگەرى ءتاجىعۇلعا وتباسىن اسىراۋعا كومەكتەستى. ول العاش ەڭبەككە ارالاسقاندا ءالى 17 جاسقا تولماعان بوزبالا ەدى. قۇرىق كەنتىندەگى  “ماڭعىشلاقمۇنايگازبارلاۋ” ترەسىندە بۇرعىشى كومەكشىسى قىزمەتىن اتقارۋدان باستادى. 1965جىلى الماتىدا ۆ.ي.لەنين اتىنداعى قازاق پوليتەحنيكالىق ينستيتۋتىنا وقۋعا ءتۇستى. جوعارعى وقۋ ورنىنىڭ 2-كۋرسىنان باستاپ 3 ايلىق جازعى دەمالىستا قاراقيا ەسپەديسياسىندا جۇمىس ىستەپ، تاجىريبە جيناپ ءارى تابىس تاپقان ەلگەزەك جىگىت بولدى. تاۋ-كەن ينجەنەرى ماماندىعىن ابىرويمەن ءبىتىرىپ شىققان جاس مامان تۋعان جەرگە قىزمەت ەتۋگە ورالدى. وسى سالادا تابان اۋدارماي 1992 جىلعا دەيىن جۇمىس ىستەدى. ونىڭ تىكەلەي قاتىسۋىمەن 1963-1988 جىلدار ارالىعىندا قالامقاس، قاراجانباس، جەتىباي، كومسومول، قولتىق، ەلەمەس، سازتوبە، نىسانوۆسكايا  كەنورىندارىن اشىلدى.

1992 جىلى ءبىتىم  كەزبايەۆ قازاقستاندا العاشقى بولىپ جەكە كاسىپ قۇردى. "كەزبي" ج ش س – ماڭعىستاۋ جانە اتىراۋ وبلىستارىنىڭ اۋماعىندا جۇمىس ىستەيتىن مۇناي-گاز كومپانيالارىنا قىزمەت كورسەتەتىن ىرگەلى كاسىپورىنعا اينالدى.

العاشقى جىلدارى سەرىكتەستىك ۇڭعىمالارعا كۇردەلى جوندەۋ جۇمىستارىن جاساۋمەن اينالىستى. 2007 جىلدان باستاپ مۇناي بۇرعىلاۋدى دا قولعا الادى.وتاندىق كومپانياعا تاپسىرىس بەرۋشى رەتىندە قازاقستاندىق كومپانيالار مەن شەتەلدىكتەر قاتىساتىن بىرلەسكەن كاسىپورىندار بار. ەلىمىزگە تانىمال «قاراقۇدىقمۇناي»، «قازاقتۇرىكمۇناي» ج ش س، «ماڭعىستاۋمۇنايگاز» اق، «كەن-سارى»، «اقتاۋ-ترانزيت»، «مۇنايفيلدسەرۆيس»، «كاسپيان ويل گاز»، «تاسبولات ويل كورپورەيشن» ج ش س، «وزەنمۇنايگاز» ءوف، «ەمىر ويل»، «حازارمۇناي»، «شىنجىر» ج ش س، «قازمۇنايگاز» ۇك» اق، «كاسپيان گاز كورپورەيشن»، «جالعىزتوبەمۇناي» كومپانيالارى ءبىتىم تاجىعۇلۇلىمەن بىتە قايناسىپ جۇمىس ىستەگەن. وسى كومپانيالاردىڭ تاپسىرىستارىمەن ۇڭعىلاردى كۇردەلى جوندەۋ مەن قالپىنا كەلتىرۋ، سونداي-اق بۇرعىلاۋ جۇمىستارىن اتقاردى.

ءبىتىم كەزبايەۆ ءوز بيزنەسىن «نولدەن» باستاپ قۇرعان كانىگى كاسىپكەر. 27 جىل ىشىندە قارقىندى دامىپ كەلە جاتقان كومپانيا، بۇگىنگى تاڭدا جاڭاوزەن قالاسىندا1100 ادامنان تۇراتىن 35 بريگادانى جۇمىسپەن قامتىپ وتىر. كاسىپورىن قازاقستانداعى ەڭ تابىستى سەرىكتەستىكتەر قاتارىنا كىرەدى.

كاسىپكەر جاڭا تەحنولوگيالار مەن جۇمىس ادىستەرىن قولدانۋعا ۇلكەن ءمان بەرەدى. رەسەي، جۇڭگو جانە ەۋروپا ەلدەرىنىڭ وزىق تەحنيكالارىن پايدالانادى.

بىلىكتى دە ءبىلىمدى ماماندار ۇيىعان ۇجىمدا ەڭبەك ەتەدى. "مول جۇمىس تاجىريبەمىز بەن تەحنيكالىق جاراقتاندىرىمىز بىزگە ءوڭىردىڭ مۇناي-گاز كومپانيالارىنا قىزمەت كورسەتۋ سالاسىندا تابىستى جۇمىس ىستەۋىمىزگە مۇمكىندىك بەردى. جۇمىسشىلاردىڭ جالاقىسىن ۋاقىتىلى تولەۋ ءۇشىن تالاي تاۋەكەلگە بەل بۋىپ، بانكتەردەن ءىرى قاراجات الىپ، كاسىپتى توقتاتپاي ۇستاپ قالۋعا تۋرا كەلدى "، - دەپ اتاپ ءوتتى ءبىتىم كەزبايەۆ. كاسىپكەردىڭ پىكىرىنشە، ونىڭ باسقا دا كوپتەگەن بيزنەسمەندەردەن ايىرماشىلىعى-جولعا قويىلعان بيزنەستىڭ تيىمدىلىگىن ارتتىرىپ قانا قويماي، جاڭاشىلدىق ەنگىزە الۋى.

ءبىتىم كەزبايەۆ بيزنەستىڭ الەۋمەتتىك جاۋاپكەرشىلىگىنە جانە ءبىلىم بەرۋدى، مەديسينانى، ازاماتتىق ينستيتۋتتاردى، عىلىمدى، مادەنيەت پەن سپورتتى دامىتۋعا ەرەكشە كوڭىل بولەدى. ءبىتىم كەزبايەۆ كوپتەگەن جىلدار بويى از قامتىلعان ازاماتتارعا، بالالارعا، ۇلى وتان سوعىسىنىڭ ارداگەرلەرىنە جانە اۋعان جاۋىنگەرلەرىنە قولداۋ كورسەتە وتىرىپ، ءبىرقاتار قايىرىمدىلىق جوبالار مەن الەۋمەتتىك باعدارلامالارعا جەتەكشىلىك ەتەدى.

ىرگەلى كومپانيا بۇكىلالەمدىك «ميروتۆورەس» قايىرىمدىلىق اليانسىنىڭ «التىن جۇلدىزىنا»، حالىقارالىق «التىن فەنيكس» جىل جۇلدەسىنە، 2011 جىلى فرانسيادا جوعارى ساپالى قىزمەت كورسەتۋ نوميناسياسى بويىنشا وتكەن حالىقارالىق بايقاۋدا جان انتۋان شاپتال اتىنداعى «التىن مەدال»، «التىن ياگۋار» حالىقارالىق ماراپاتتارىنا يە.

مۇناي-گاز وندىرۋدە قازاقستاندىق ۇلەستى ارتتىرۋعا قوسقان ۇلەسى ءۇشىن بىرنەشە رەت قازاقستان رەسپۋبليكاسىنىڭ مينيسترلىكتەرى مەن ۆەدومستۆولارىنىڭ قۇرمەت گراموتالارى مەن العىس حاتتارىمەن ماراپاتتالدى.