رەستوراتور حانىم -  گۇلايشا بورانوۆا ماڭعىستاۋ وبلىسىندا تەڭدەسى جوق مەيرامحاناعا باسشىلىق ەتەدى. «ايشا سارايى» دەپ اتالاتىن مەيرامحانا  ۇلتتىق قۇندىلىقتاردى ۇستانۋىمەن ايرىقشا. زاماناۋي عيماراتتىڭ تورىندە كيىز ءۇي تىگىلگەن ارنايى زال بار. بۇل كيىز ءۇي اتا-ەنەسىنەن قالعان كوز، امانات. ەنەسى ومىردەن ەرتەرەك وزىپ، كوزدىڭ قاراشىعىنداي ساقتاعان اعاش ءۇي شاڭ باسىپ، كۇتىمسىز جاتتى. مۇنى كورگەن اتاسى ماڭعىستاۋعا بەلگىلى ۇستاز بازارباي قاريا ءۇش كەلىننىڭ ىشىنەن وسى گۇلايشاعا تابىستايدى. «اماناتقا قيانات جۇرمەيدى» دەگەندى بەك تۇسىنگەن يبالى كەلىن مەيرامحاناسىنىڭ تورىنە قۇرمەتتەپ تىگىپ قويۋدى ءجون ساناپتى. ءقازىر سىرعا سالۋ، بەتاشار، كەلىنگە ورامال سالۋ سىندى ءجون-جورالعىلاردىڭ بارلىعى كيەلى شاڭىراقتىڭ ىشىندە جاسالادى. جاس جۇبايلاردىڭ فوتوسەسسياسى ءۇشىن دە تاپتىرماس ورىنعا اينالدى. مەيرامحانانىڭ بۇل اتريبۋتىنا ريزا بولعان ۇلكەندەر باتاسىن بەرىپ كەلەدى.

اتى مەن زاتى كەلىسكەن تاماشا عيمارات بىرنەشە قاباتتان تۇرادى. ەڭ تومەنگى قاباتىندا تولىقتاي اسحانا، اسپاز بەن قىزمەتكەرلەر بولمەسى ورنالاسقان. ۇستىڭگى قاباتتارىندا 1000 ادامعا ارنالعان ۇلكەن زال، vip-زال، كەلىندەر ارلەنەتىن بولمە، نەكە قيۋ زالى، كوپشىلىك تىنىعاتىن حوللدار بار.

«ايشا سارايىنىڭ» تاعى ءبىر ەرەكشەلىگى- اس مازىرىندە. ماڭعىستاۋلىق اس ازىرلەۋ ءۇردىسىن قولدانا وتىرىپ بۇجى، قازى-قارتا، ادال سويىلعان جاس مال ەتى دايىندالادى.

تاعى ءبىر وزگەشەلىك- توي زالى مەن ۇستەلدەر تۇگەلدەي تابيعي، حوش ءيىستى گۇلدەرمەن بەزەندىرىلەدى. ادەمى گۇلدەر تاپسىرىسپەن جەتكىزىلىپ وتىر. مەيرامحانانىڭ ارلەنۋى مەن جيھازدارى، ىدىس-اياقتارى بارلىعى شەتەلدەن اسقان تالعاممەن تاڭداپ الىنعان. داستارحان جايۋ، استى تابەتتى اشارداي تارتىمدى ەتىپ قويۋ، ءتىل ۇيىرەتىندەي داممەن دايىنداۋ گۇلايشا حانىمنىڭ ۇزاق جىلعى تاجىريبەسىنىڭ جەمىسى. 

مەيرامحانانىڭ تەحنيكالىق جابدىقتالۋى دا ايرىقشا. كاسىبي ساحناعا ارنالعان لەد-ەكراندار، مۋزىكالىق قۇرىلعىلاردىڭ ساپاسى جوعارى. رەسپۋبليكالىق دەڭگەيدەگى بەلگىلى انشىلەر وسى ساحنادان ونەرلەرىن كورسەتىپ، ريزاشالىعىن بىلدىرگەن ەكەن.

گۇلايشا بوران قىزىنىڭ نەگىزگى ماماندىعى-قۇرىلىسشى. ءبىراق بالا كۇتىمى، ءۇي شارۋاسىمەن اينالىسىپ قۇرىلىس سالاسىنا بەت بۇرمادى. ەسەسىنە بەلگىلى كاسىپكەر، قۇرىلىسشى سامات مۇسابايەۆتىڭ ادال جارى، 4 بالانىڭ اناسى اتاندى. ۇل-قىزدارىنا قازاقي تاربيەنى ءسىڭىرىپ وتىرعان انا. بالالارى ەۋروپادا ءبىلىم السا دا، ۇلتتىق داستۇرىمىزدەن اتتاعان ەمەس. وتباسىنىڭ ۇيىتقىسى، اعايىن-تۋىستىڭ بىتىمگەرى بولۋ - ءوزىنىڭ باستى مىندەتى دەپ سانايدى. ۇيىندە اس ءمازىرى، داستارحان جايۋعا كوپ ءمان بەرگەن ول مەيرامحانالارعا بارعاندا اسا كوڭىلى تولماي كەلەدى ەكەن. سونان سوڭ بىلگەن-تۇيگەنىن كاسىپ رەتىندە پايداعا اسىرۋدى ءجون كورەدى. بۇل ويىن ىسكە اسىرۋعا ومىرلىك جارى كومەگىن اياعان جوق.

- «ادەمى جەردە، تالعاممەن بەزەندىرىلگەن ورىندا، ءدامدى اس ءىشىپ، جاقسى دەمالىس ۇسىنۋدى ماقسات ەتتىم. مەيرامحاناعا قاراپ كەيبىرەۋلەر اسا قىمبات ورىن دەپ ويلاپ قالادى. ءساندى، ءدامدى ءارى قولجەتىمدى قىلىپ ۇيىمداستىرىپ وتىرمىز. بەكىرە بالىقتارىمەن قىمبات اس ءمازىرىن تاڭدايمىن دەسە دە، قوناقتىڭ ءوز قالاۋى»،- دەيدى ىسكەر ايەل.

ءقازىر مۇندا 30 ادام تۇراقتى تۇردە قىزمەت ەتەدى. مۇننان بولەك كۇندەلىكتى كەلىپ-كەتەتىن دايارشىلار دا بار.

رەستوراتور بولۋ وڭاي ەمەس. ۋاقىتىلى شەشىم قابىلداي ءبىلۋ، تياناقتىلىق، سابىرلىلىق، تازالىق، شىدامدىلىق سياقتى قاسيەتتەردى ءبىر بويىنا توعىستىرۋعا تۋرا كەلگەن. كاسىپكەر ايەلدىڭ «ايشا سارايىنان» وزگە نۇر-سۇلتان قالاسىندا مەيرامحانالارى مەن ءدامحانالارى بار. زاماناۋي ءۇردىس پەن قازاقي ناقىشتى ۇندەستىرگەن مەيرامحانالار گۇلايشا بورانوۆانىڭ ءتول يدەياسى. بولاشاقتا ىسكەر وسى كاسىپتى ودان ءارى جەتەلدىرە تۇسپەك.