جامبىل وبلىسى، جۋالى اۋدانىنداعى ۇلى وتان سوعىسىنىڭ داڭقتى قولباسشىسى باۋىرجان مومىش ۇلىنىڭ اكەسى مومىشتىڭ اتىنداعى بۇلاق تا «رۋحاني جاڭعىرۋ» باعدارلاماسىنىڭ «قازاقستاننىڭ كيەلى جەرلەرىنىڭ گەوگرافياسى» جوباسى اياسىندا قازاقستاننىڭ وڭىرلىك قاسيەتتى نىساندار تىزىمىنە الىنعان ورىن. قازىرگى جۋالى اۋدانىنىڭ كولباستاۋ مەن تالاپتى اۋىلدارىنىڭ ورتا تۇسىندا، وراق بالعا اتالاتىن ەسكى جۇرتتىڭ باتىس تۇسىندا ورنالاسقان بۇلاقتى باتىر تۋعان توپىراقپەن بايلانىستىراتىن جەرگىلىكتى جۇرت ونىڭ كيەلىلىگىنە كۇمان كەلتىرمەيدى دەپ جازادى Qamshy.kz اقپارات اگەنتتىگى.
جالپى قازىرگى جۋالى اۋدانىنىڭ كولباستاۋ، تالاپتى اۋىلدارىمەن الاتاۋ دەيىنگى ارالىقتا سانسىز بۇلاق بار. سول سەبەپتەن دە بۇل مەكەندى كۇنى بۇگىنگە دەيىن جەرگىلىكتى حالىق اراسىندا مىڭبۇلاق اتالادى. مىڭبۇلاق جايىنداعى العاشقى تاريحي دەرەكتەر جۇڭگو ساياحاتشىسى سيۋان – سزياننىڭ جازبالارىندا كەزىگەدى. عالىم ول قازىرگى جامبىل وبلىسىنىڭ باتىسىنداعى مىڭبۇلاق ءوڭىرىنىڭ جانعا جايلى ەكەندىگىن جازىپ، ونى جازدىڭ ىستىق ايلارىندا حاندار كەلىپ مەكەنى ەتەتىنىن ايتادى. وسى ماڭدا تۋىلىپ التى الاشقا اتى تانىلعان جازۋشى شەرحان مۇرتازا دا بۇل دەرەكتى «اي مەن ايشا» رومانىندا پايدالانادى. جازۋشى مىڭبۇلاقتى مەكەن ەتكەن حانداردىڭ وسى ماڭدا ەلىك اسىراپ، ساياتشىلىق قۇرعانىن باياندايدى. بۇل دەرەكتەردى اراب جيھانگەزدەرى ۋبەيداللاھ يبن ابدۋللاح يبن حوردادبەك (846 جىلى) جانە كۋداما يبن جافار دا (ح ع. باسىندا) ءوز قولجازبالارىندا ناقتىلاي تۇسەدى. ءتىپتى ولار وسى ماڭدا بۇرىن مىڭبۇلاق اتالعان اباردجادج قالاسىنىڭ بولعانىنا نازار اۋدارادى. ماسەلەن اراب گەوگرافى ۋبەيداللاھ يبن حوردادبەكتىڭ ءوز كۇندەلىگىندە: «يسپيدجابتان (سايرام) بۋدۋحكەتكە كەلدىك، ودان تامتادجعا (تۇلكىباس) ودان اباردجادجعا (مىڭبۇلاق) 4 فارساح جول جۇردىك، ودان باركۋابتاعى (تەرىس) بەكەتكە دەيىن 6 فارساح جول ءجۇرىپ جۋۆيكەت ارقىلى تارازعا جەتتىك» – دەگەن مالىمەتتەردى جازادى.
تاريحى سوناۋ ەرتە يسلام داۋىرىنە باستاۋ الاتىن مىڭبۇلاقتىڭ ءبىر سالاسىن بۇگىندە جەرگىلىكتى جۇرتشىلىق مومىش بۇلاعى دەپ قاسيەت تۇتادى. ول بۇلاق ءوز باستاۋىن تاۋدىڭ ەتەگىنەن الادى. بۇلاقتىڭ سۋى شاعىن عانا. ونىڭ باتىس جاق ىرگەسىندە 200 قادامداي جەردە جانە ءبىر بۇلاق بار. ول – ەسداۋلەت بۇلاعى دەپ اتالادى. ەكى بۇلاقتىڭ ورتاسى 2 گەكتارداي شۇيگىن ءشوپتى القاپتان تۇرادى.
كونەكوز قاريالار كەزىندە بۇرىن ەكى بۇلاقتىڭ ورتاسىندا ات شومىلدىرىپ، قوي توعىتاتىن توعان بولعاندىعىن ايتادى. وسى مومىش بۇلاقتىڭ باسىندا ەرلىك داڭقى الەمگە جايىلعان باتىر باۋىرجاننىڭ كىندىك قانى تامعان. بۇل جەردىڭ قادىر-قاسيەتى باۋىرجان مومىش ۇلى ءوزىنىڭ «ۇشقان ۇيا» كىتابىندا مازمۇندى باياندالادى.
پىكىر قالدىرۋ