ءابىش كەكىلبايەۆتىڭ 80 جىلدىق مەرەيتويى قارساڭىندا اقتاۋدا رەسپۋبليكالىق ارداگەرلەر كەڭەسىنىڭ كوشپەلى وتىرىسى ءوتتى. ورتالىق كەنەستىڭ ءتوراعاسى باقتىقوجا ىزمۇحامبەتوۆ باستاعان ەل ارداگەرلەرى ابىز جازۋشىنىڭ شىعارمالارىن جاستارعا كەڭىنەن ناسيحاتتاۋ تۋرالى ءسوز قوزعادى.

كەڭەسكە ماڭعىستاۋ وبلىسىنىڭ اكىمى سەرىكباي ترۇموۆ قاتىسىپ، ەلىمىزدىڭ تۇكپىر-تۇكپىرىنەن جينالعان ارداگەرلەردى مەرەيلى شارامەن قۇتتىقتادى. «ۇلكەن ومىرلىك تاجىريبەسى مەن دانالىعى مول اعا ۇرپاقتىڭ جاستاردى رۋحاني جاعىنان تاربيەلەۋدە، باعىت-باعدار بەرۋدە ماڭىزى زور. جاسى ۇلعايعانىنا قاراماستان اعا بۋىن وكىلدەرى، قۇرمەتتى ارداگەرلەرىمىز وبلىستىڭ الەۋمەتتىك-قوعامدىق ومىرىنە ەتەنە ارالاسىپ كەلەدى. ولاردىڭ قاجىماس قايراتى، ازاماتتىق ۇستانىمى – جاس ۇرپاققا ۇلگى-ونەگە»،-دەدى سەرىكباي وتەلگەن ۇلى.

وڭىرلەردەن كەلگەن اقساقالدار القاسى مەن ارداگەرلەر كەڭەسىنىڭ ءتوراعالارى قازاقستان رەسپۋبليكاسىنىڭ پرەزيدەنتى ق.توقايەۆتىڭ قازاقستان حالقىنا جولداۋىن  تالقىلادى. اقساقالدار كەڭەسى  جاستارعا  رۋحاني تاربيە بەرۋ، الەۋمەتتىك ماسەلەلەر، كەڭەستىڭ بۇقارا حالىقپەن بايلانىسى سىندى ماسەلەلەرگە توقتالىپ،  ءسوز سوڭىندا ايماقتاردى بىر-بىرىنەن تاجىريبە الماسۋعا شاقىردى.

سەمينار بارىسىندا  ۇرپاققا قالدىرعان باعا جەتپەس مۇرالارى سارالانىپ، ناسيحاتتالۋى ءسوز بولدى.ءابىش كەكىلبايەۆتىڭ قايتالانباس قولتاڭباسى قازاق ادەبيەتىنىڭ عانا ەمەس، الەم ادەبيەتىنىڭ قازىناسىنا ايتىلىپ، كوسەمسوز شەبەرىنىڭ شىعارماشىلىعى بويىنشا تەرەڭ ناسيحاتتار جۇرگىزۋ -  كەلەشەك بۋىن  مەن ەل اعالارى الدىنداعى ماڭىزدى مىندەت ەكەنى ايتىلدى.

-«ءوز باسىڭنان ب ا ق اۋسا دا، ەل باسىنان ب ا ق اۋماسىن» دەگەن ءسوز ءابىش كەكىلبايەۆتىڭ ازاماتتىق ۇستانىمىنىڭ ايقىن ايعاعى. ءمارجانسوز شەبەرى، ۇلتجاندى ساياساتكەر ءابىش كەكىلبايەۆتىڭ شىعارماشىلىعىن، ونىڭ جالپى مۇراسىن ءوسىپ كەلە جاتقان ۇرپاقتاردىڭ اراسىندا كەڭىنەن دارىپتەۋ – بۇل ءبىزدىڭ ءبىرىنشى كەزەكتەگى ماقساتىمىز بولۋى ءتيىس» - دەپ قورىتتى جينالعاندار.

           ايتا كەتەيىك، سەمينار-كەڭەسكە ارداگەرلەر ۇيىمى ورتالىق كەڭەسىنىڭ ءتورالقا مۇشەلەرى مەن بارلىق وبلىستىق جانە نۇر-سۇلتان، الماتى، شىمكەنت قالالىق ارداگەرلەر كەڭەستەرىنىڭ باسشىلارى، شاقىرىلعان زيالى قاۋىم وكىلدەرى، ماڭعىستاۋ وبلىسىنىڭ اكتيۆى، بۇقارالىق اقپارات قۇرالدارى وكىلدەرى قاتىستى.  

كەڭەس مۇشەلەرى ءۇش كۇن ىشىندە ماڭعىستاۋ اۋداندىق ارداگەرلەر ۇيىمىنىڭ جۇمىس تاجىريبەسىمەن تانىسادى. «وتپانتاۋ» تاريحي-مادەني كەشەنى مەن وڭىردەگى كيەلى جەرلەرگە زيارات جاسايدى.