ماڭعىستاۋ مۇنايىن وندىرۋشىلەردىڭ العاشقى قونىسى، قاسيەتتى قاراشاڭىراعى دەپ اتالىپ كەلگەن قىزىلساي اۋىلىنا 60 جىل تولىپ وتىر. جاڭاوزەننىڭ قالا بولىپ قالىپتاسۋىنىڭ باستاۋى بولعان اۋىلدىڭ بۇگىندە اجارى ارتىپ، شاعىن قالاشىققا اينالدى. مەرەكەلىك كەشكە وراي مادەنيەت ۇيىندە «التىن بەسىك-قىزىلساي» اتتى سالتاناتتى جيىن ءوتتى. ماڭعىستاۋ وبلىسىنىڭ اكىمى سەرىكباي ترۇموۆ اۋىلدىڭ الەۋمەتتىك-ەكونوميكالىق دامۋىنا ۇلەس قوسقان ازاماتتارعا العىس حات پەن مەرەكەلىك توسبەلگىلەر تابىستادى.

- 1958-59 جىلدارى اڭىزاق يەن دالادا 20 شاقتى جانۇيا جەرتولەلەردى قونىس قىلىپ، مۇناي ءوندىرىسىنىڭ العاشقى قارلىعاشتارى رەتىندە جاڭا ەلدىمەكەندى ومىرگە اكەلگەن بولاتىن. بۇگىندە 5500-دەي تۇرعىنعا قۇتتى مەكەن بولعان قىزىلساي اۋىلى – كەشەگى ەل ىرزىعىن ابىرويمەن جيعان اعا-اكەلەردىڭ، اپا-انالاردىڭ ماڭداي تەرىنىڭ، ەرەن ەڭبەگىنىڭ ولشەمى. وزەننىڭ ويىنا سۋ اعارى جالعاسىپ جاتقان تەرەڭ سايدى «قۇر قىزىلساي»، قازىرگى ەل قونىستانىپ وتىرعان، كەزىندە ون-ون بەس ءۇي بارلاۋشىلار كەلىپ قونىستانعان سايدى «سۋلى قىزىلساي»، ال سۋ اعارى اناۋ «اقمولاعا» قاراي باعىتتالعان سايدى «جامان قىزىلساي» دەپ قاريالارىمىزدىڭ اتاپ كەتكەن مەكەنى بۇگىندە بەرەكە ارتىپ، تۇگەل ءبىر قالاعا بەرگىسىز ەلدى مەكەنگە اينالدى. ءدال وسى قاراشاڭىراقتا تەرەڭ ءبىلىم، تۋما تالانت، اۋىلدىڭ اۋاسىمەن سۋسىنداعان، ەل باسقارعان ازاماتتارىمىز دۇنيەگە كەلگەن. ەندەشە، قىزىلساي اۋىلىنىڭ قۇت-بەرەكەسى مەن اجارى ارتا بەرسىن، - دەپ ايماق باسشىسى ءوزىنىڭ جىلى لەبىزىن ءبىلدىردى.