بىلتىر «SK GROUP» ۇكىمەتتىك ەمەس ۇيىمدار قاۋىمداستىعى تارازدا تۇڭعىش مارتە «قوعامدىق لەكسيا» اتتى ارنايى جوبانى قولعا الىپ، ول بويىنشا وبلىسقا، ءتىپتى رەسپۋبليكاعا تانىمال بىرنەشە زيالى قاۋىم وكىلدەرى مەن مادەنيەت، ونەر، ادەبيەت، سپورت، ساياسات، كاسىپكەرلىك، ءوندىرىس سەكىلدى وزەكتى سالالاردا جۇرتشىلىققا كەڭىنەن تانىمال بولعان تۇلعالاردى جاستارمەن كەزدەستىرىپ، ولاردىڭ جەتىستىككە جەتۋ جولىن، ومىردە كورگەن-تۇيگەنىن، ايتار اقىل-كەڭەسىن ەركىن-سۇحبات تۇرىندە ۇيىمداستىرىپ كەلگەن ەدى، دەپ جازادى Qamshy.kz اقپارات اگەنتتىگى. بيىل مىنە، جوبانىڭ ەكىنشى ماۋسىمىندا م.ۇركىمبايەۆ اتىنداعى «جاستار سارايىنا» لەكتور رەتىندە وبلىستىق كاسىپوداقتار بىرلەستىگىنىڭ ءتوراعاسى مەيرامبەك تولەپبەرگەن شاقىرىلىپ، ەمەن-جارقىن اڭگىمە ءوربىتتى.

–جوبا ەلباسىمىز نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا كورسەتىلگەن مىندەتتەردى جۇزەگە اسىرۋ، جاستاردىڭ بويىنا ۇلتتىق قۇندىلىقتاردى ءسىڭىرۋ، ولاردىڭ باسەكەگە بارىنشا قابىلەتتى، جان-جاقتى بولۋىنا جاعداي جاساۋ ماقساتىندا جۇزەگە اسىرىلىپ وتىر. نەگىزىنەن بۇل جوبانى ەلىمىزگە بەلگىلى جۋرناليست رۋسلان جولدىباي اعامىز الىپ كەلگەن بولاتىن. ءبىز دە وسى جوبانى جۇزەگە اسىرۋ ارقىلى ۇلتقا ءتان يگىلىكتەر مەن ادامي قۇندىلىقتاردى قۇنتتاۋ ماقساتىندا جاس ۇرپاقتى ەلگە قىزمەت ەتەتىن ازامات رەتىندە تاربيەلەۋدى كوزدەدىك. بەلگىلى تۇلعالاردىڭ جەتىستىگىن وسىلاي دارىپتەي الساق، ۇلت ۇرپاعى ەڭبەكسۇيگىش، جاڭاشىل، ىسكەرلىك قابىلەتكە يە بولادى دەگەن ويدامىز، – دەيدى ەركىن سۇحباتتى جۇرگىزگەن جوبا اۆتورى، وبلىس اكىمدىگى جاستار ساياساتى ماسەلەلەرى باسقارماسىنىڭ باسشىسى سەرىكبول بەرىكقوجا.

«ەل تىرەگى – ەڭبەك ادامى» اتتى قوعامدىق لەكسيا بارىسىندا مەيرامبەك مىلتىقباي ۇلى ءوزىنىڭ تالاس اۋدانىنىڭ تۇگىسكەن اۋىلىنىڭ تۋماسى ەكەنىن، الماتى قالاسىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن تامامداپ، رەسپۋبليكالىق بىرنەشە باسىلىمداردا ەڭبەك ەتىپ، ءومىر بويى ەڭبەكتىڭ ءتاتتى نانىن جۋرناليستيكادان تاپقانىن، ءبىر كەزدەرى وبلىس اكىمىنىڭ ورىنباسارى، وسى قىزمەتكە دەيىنگى 5 جارىم جىل وبلىستىق تەلەارنادا باسشىلىق ەتكەنىن، جاستىق شاعى مەن ستۋدەنتتىك جىلدارىن جانە وتباسى جايىن اڭگىمەلەپ بەردى.

سونداي-اق مەيرامبەك مىلتىقباي ۇلى مەملەكەتتىڭ نەگىزىن قالايتىندار دا، مەملەكەتتى قورعايتىن دا، مەملەكەتتىڭ بولاشاعىن باياندى ەتەتىندەر دە تەك جاستار ەكەنىن، ءوقۋ-بىلىم، ەڭبەك، كىسىلىك كەلبەت، ادامدىق قاسيەت ۇشپاققا شىعاراتىنىن، جاستاردى مۇمكىندىگىنشە كىتاپقۇمار بولۋعا، ۇلتىق بولمىستان اجىراپ قالماۋعا، سالت-داستۇرگە قىرىن قاراماۋعا، مۇمكىندىگىنشە كوپ ءتىل بىلۋگە، ءوز تىلىڭە، ءوز ۇلتىڭنىڭ بولاشاعىنا جانى اشيتىن ازامات بولىپ قالىپتاسۋعا شاقىردى.