جاقىندا الماتى قالاسىنداعى  بازارلارداعى جەمىس-جيدەك ونىمدەرى  ارنايى قۇرالدارمەن تەكسەرىلدى. زەرتتەۋ ناتيجەسى قاۋىن - قاربىزدىڭ بارلىعىندا نيترات مولشەرى جوعارى دەڭگەيدە ەكەنىن كورسەتتى، دەپ حابارلادى «قامشى» پورتالى inform.kz-كە سىلتەمە جاساي وتىرىپ.

تۇتىنۋشىلاردىڭ قۇقىعىن قورعاۋ دەپارتامەنتىنىڭ ماماندارى بازارلارداعى كوكونىستەردى 3 كۇن ارالىعىندا ساراپتان وتكىزگەن. وسى ۋاقىت ارالىعىندا 13 بازار مەن 6 جارمەڭكە تەكسەرىلىپتى. 640 كوكونىس جانە جەمىس-جيدەكتەن سىناما الىنعان. وسىنداي جولمەن ماماندار الماتىلىقتاردى ساپاسىز ونىمدەردەن قورعاماق.

انەل مۇسايەۆا، الماتى ق. تۇتىنۋشىلار قۇقىعىن قورعاۋ دەپارتامەنتى ءبولىمىنىڭ باس مامانى: 

-سىرتتان ەرتە جەتكىزىلەتىن ونىمدەر ارنايى حيميالىق تىڭايتقىشتاردىڭ كۇشىمەن پىسكەن. سوندىقتان ولار ادام اعزاسىنا ايتارلىقتاي  ءقاۋىپتى بولىپ سانالادى. 
«تۇتىنۋشىلارعا ساتىپ الىپ جاتقاندا، حابارلانىپ وتىرادى. سول كەزدە ءبىزدىڭ تۇتىنۋشىلار وزدەرىنە ۇناماعان، نە بولماسا، جارامسىزدىعىن تەكسەرگىسى كەلسە، ءونىمىن الىپ كەلىپ، تەكسەرتىپ، ناتيجەسىن الۋ مۇمكىندىگى بار ەكەندىگىن ايتامىز»، - دەدى.
اسەم كەزەمبايەۆا، الماتى قالاسى المالى اۋدانى تۇتىنۋشىلار قۇقىعىن قورعاۋ دەپارتامەنتىنىڭ باس مامانى:

«تاعام ۋلانۋىنان الدىن-الۋ- نيترات مولشەرىنىڭ دەڭگەيىن انىقتاۋ. ياعني، ونىڭ مولشەرى جوعارىلايتىن بولسا، وندا تاعام ۋلانۋى بايقالادى. جالپى اۋدان بويىنشا ونداي دەرەكتەر تىركەلگەن جوق»، - دەدى.

ماماندار جەدەل تەكسەرۋ شاراسىن تۇرعىنداردىڭ ءوتىنىشى بويىنشا تامىزعا دەيىن جالعاستىرماق. مۇنداي ساراپتامالىق جۇمىس بازارلار اۋماعىندا جۇرگىزىلەدى. كەيىننەن، ءقاۋىپتى ءونىم انىقتالعان ساۋدا ورنى جەتەكشىلىگىنە بۇل جايىندا حابارلانىپ، شارا قولدانىلادى. ال كاسىپكەرلەر بولسا، ءوز كەزەگىندە وسىنداي شارۋالارمەن كەلىسىمىن بۇزاتىن كورىنەدى.

نۇرزات توعجان