استانا قالاسىنىڭ ىرگەسىندەگى قوياندى اۋىلىندا 10 جاسار قىز سۋعا باتىپ كەتكەن.  ءدال سول كەزدە وقيعاعا كۋا بولعاندار كومەككە ۇمتىلعانىمەن، قىزدىڭ تەك جانسىز دەنەسىن سۋدان الىپ شىعا العان.  ال بۇل كەزدە وزگە دەمالۋشىلار دىم بولماعانداي، ءمايىتتى جاعاعا تاستاي سالىپ، الاڭسىز سۋعا شومىلا بەرگەن. بۇل تۋرالى «قامشى» پورتالى Baq.kz جانە كتك ارنالارىنا سىلتەمە جاساي وتىرىپ حابارلايدى.

 كىسى شوشىرلىق كورىنىستەردى سول ماڭدا جۇرگەندەر ۇيالى تەلەفونىنا ءتۇسىرىپ العان. مارقۇم قىزدىڭ دەنەسىن دەمالۋشىلار ماتاعا وراپ، توپىراق ۇستىنە تاستاي سالىپتى. الەۋمەتتىك جەلىلەرگە تارالىپ كەتكەن بۇل جان تۇرشىگەرلىك ۆيدەو قازاقستاندىق الەۋمەتتىك ورتانىڭ اشۋىن تۋعىزعان. ءتىپتى،  فەيسبۋك جەلىسىنىڭ قولدانۋشىلارى بۇل اياۋاسسىزدىققا ەل بولىپ كۇرەسۋگە ۇندەۋ جاساعان.

ال ۆيدەودا ادامدار بالا-شاعاسىمەن ءمايىتتىڭ جانىندا ءماز-مايرام بوپ سۋعا شومىلىپ جاتقان. نە جاعاجاي اكىمشىلىگى، نە ۇلكەندەر جاعى باس بولىپ دەنەنى تاسا جەرگە اپارۋدى دا ويلانباعان. قايتا قىزىقتاپ ۇيالى تەلەفونعا تۇسىرگەن.

ال كۋاگەرلەردىڭ ايتۋىنشا، ءجاسوسپىرىمنىڭ ءمايىتىن الىپ كەتۋگە جەدەل جاردەم 1 ساعاتتان سوڭ ءبىر-اق، جەتكەن. نەگىزى مارقۇم جەتكىنشەك، جاعاجايعا اكەسىمەن كەلىپتى.

كەيىن ول بالاسىن جالعىز قالدىرىپ كەتىپ قالعان. ورالعانىندا، قىزىنىڭ ءولى دەنەسىن عانا قۇشاقتاپ قالدى. ال جەكە جاعاجاي اكىمشىلىگى وزدەرىنە شاڭ جۋىتار ەمەس.

“قورشاۋلار ورناتقانبىز. دەمالۋشىلار بۇزىپ كەتىپ جاتىر. ال سۋعا تۇنشىعىپ ولگەن قىز ساياجاي جاقتان كەلگەن. كۇندە اكەسىمەن بىرگە وسى جەردە شومىلىپ جۇرەتىن”،  دەيدى جاعاجاي قىزمەتكەرى  ازات جامانتايەۆ.

مىسالى، ايدوس جۇقان ۇلى اتتى فەيسبۋك پايدالانۋشىسى «مارقۇمنىڭ الدىنان جارىلقاپ، ارتى قايىرلى بولسىن. ەي، ادامدار (قازاقتار) ازىپ بارا جاتقان سياقتىسىڭدار...» دەسە، ءانۋار شوتباي ەسىمدى قولدانۋشى «بۇل دياگنوز. حايۋاننان تومەن ءتۇسىپ كەتتىك» دەيدى.

نۇرزات توعجان