قاراشا ايىنىڭ 14-جۇلدىزىندا قازاق ءبىلىمىنىڭ قارا شاڭىراعى قازاق ۇلتتىق ۋنيۆەرسيتەتىنىڭ، فيلولوگيا جانە الەم تىلدەرى فاكۋلتەتىندە جازۋشىلار وداعى ءتوراعاسىنىڭ ورىنباسارى اقىن، دراماتۋرگ باقىت بەدەلحانۇلىمەن «ءسوز ءقادىرى...» اتتى سىر-سۇحبات كەزدەسۋ كەشى ءوتتى.

جاس كەزىنەن جاسىنداي جارقىلداپ، جاقسى ورتالاردا جايدارى مىنەزى مەن تەرەڭ ءبىلىمى، وزىندىك ستيلىمەن ەرەكشەلەنىپ تانىلعان اقىن سىر-سۇحبات كەشىنىڭ ەركىن فورماتتا، ەمەن-جارقىن وتكەنىن قالادى. اقىننىڭ  ءوزى جايلى ولەڭىمەن ءوربىتىپ ايتقان اڭگىمەلەرى، وتكەن شاعىنا دەگەن وزگەشە ءبىر ساعىنىشتىڭ ءتاتتى سەزىمدەرى كەشكە قاتىسۋشى قوناقتاردىڭ كوڭىلىن تولقىتىپ، الماتىنىڭ 20 جىل بۇرىنعى اۋراسىنا بولەپ، تاماشا اسەر قالدىردى.

«مەنى وزگەلەردەن ەرەكشەلەيتىن قازاقى ءداستۇر مەن ءسوز تاريحى، رۋ شەجىرەلەرى، اڭىز-اڭگىمە، ەل اراسىنداعى قيسسالاردى قيساپسىز بىلەتىنىم بولسا كەرەك. بۇعان سەبەپ، بەسىك جىرىنان باستاپ اپامنىڭ ايتقان اڭگىمەلەرى، وقىعان كىتاپتارىم، ورتام، بىلىمگە دەگەن قۇشتارلىعىمنان»،- دەيدى اقىن.

اقىن ءوز شىعارماشىلىعى جايلى، تەاترلارداعى قويىلىمدارى، «حيت» بولىپ تانىلعان اندەرى تۋراسىندا، ەڭ العاشقى ايتىسكەر اقىن رەتىندە ايتىس ساحناسىندا قالاي سۋىرىپسالمالىعىن اشقانىن، 6 جاسىندا مۇعالىمدەرگە ايتقان تاربيەلى اقىلىن ايتىپ ءبىر كۇلىپ الدى. كەشكە قاتىسۋشىلار اقىننىڭ شىعارماشىلىعىنان تىس، قازىرگى ادەبيەت، قازاق ادەبيەتى، الەم ادەبيەتى جايىندا كوكەيلەرىندەگى سۇراقتارىن قويىپ، تۇشىمدى جاۋاپتار الدى. اقىن ءوز ولەڭدەرىنەن ءۇزىندى وقىپ، دومبىراسىن قولىنا الىپ، اۋەزدى اندەر ايتتى. اقىننان شابىت السا كەرەك، ستۋدەنتتەر سۋىرىلىپ شىعىپ ولەڭدەرىن وقىپ، اندەر اۋەلەتىپ، ادەبي كەشتىڭ اسەرىن ارتتىردى.

سىر-سۇحبات كەشى، «رۋحاني جاڭعىرۋ» باعدارلاماسى جانە جاستار جىلىنا وراي وتكىزىلدى. پەداگوگيكا جانە ءبىلىم بەرۋ مەنەدجمەنت كافەدراسىنىڭ پ.ع.ك.، دوسەنت ر.س. قاسىموۆا ۇيىتقى بولىپ، ادەبيەتتانۋ مەن قازاق ءتىلى مەن ادەبيەتى ماماندىعىنىڭ 1-كۋرس ماگيسترانتتارىنىڭ ۇيىمداستىرۋىمەن وتكىزىلدى. كەش سوڭىندا روزا قاسىموۆا باقىت بەدەلحانۇلىنا كەزدەسۋدەن العان رۋحاني اسەرى تۋرالى، ماگيسترانت، ستۋدەنتتەردىڭ اتىنان راقمەتىن ايتىپ، ماگيسترانتتار اتىنان سىيلىقتار تابىس ەتتى.

باقىت اقىن دا، «باقىتقا قاراي بەرمەي ۋاقىتقا دا قاراڭىزدار»،-دەپ ازىلدەپ، العىسىن ايتىپ، اڭگىمەسىن تۇيىندەدى. كەش سوڭىندا كورەرمەندەر ءقادىرلى قوناقپەن ەستەلىككە سۋرەتكە ءتۇسىپ، تاماشا اسەرمەن تارقاستى.

قازۇۋ، ادەبيەتتانۋ ماگيسترانتتارى