ۇكىمەتتىڭ كەزەكتى وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ تابىسى تومەن جۇمىسكەرلەردىڭ جالاقىسىن ارتتىرۋ بويىنشا اتقارىلىپ جاتقان جۇمىستار تۋرالى ايتىپ بەردى، – دەپ حابارلايدى Qamshy.kz اقپارات اگەنتتىگى. 

"تومەن جالاقى الاتىنداردىڭ ماسەلەسىنە كەلسەك، بىزدە ەڭبەك زاڭناماسىندا تەك تومەن جالاقى مولشەرى رەتتەلگەن، باسقاسىنىڭ ءبارى جۇمىس بەرۋشىنىڭ قۇزىرىندا. سوندىقتان ەلباسى جولداۋىنا سايكەس، جىل باسىنان بەرى قازاقستانداعى ەڭ تومەنگى جالاقى مولشەرى 1،5 ەسەگە – 28 000 تەڭگەدەن 42 500 تەڭگەگە دەيىن ارتتى"، – دەدى نۇرىمبەتوۆ.

ودان بولەك، ونىڭ ايتۋىنشا، 25 اەك دەيىن، ياعني 63 000 تەڭگەگە دەيىنگى كولەمدە ەڭبەكاقى الىپ جۇرگەن ازاماتتاردىڭ سالىق جۇكتەمەسى 10 ەسە ازايتىلعان.

ەسكە سالساق، بيىل 1 ماۋسىمنان باستاپ بيۋدجەت سالاسىندا جۇمىس ىستەيتىن قىزمەتكەرلەردىڭ جالاقىسى 30%-عا ارتتى. 

"جىل باسىنان بەرى ەلىمىزدە 2،7 مىڭ كاسىپورىن از جالاقى الىپ جۇرگەن 1،2 ميلليون جۇمىسكەرىنىڭ جالاقىسىن ورتا ەسەپپەن 32،5%-عا كوبەيتتى. ءالى دە بولسا، ەلىمىزدەگى كاسىپورىنداردىڭ جارتىسىنا جۋىعى قىزمەتكەرلەرىنىڭ تابىسىن وسىرگەن جوق. سوندىقتان، كاسىپورىندار باسشىلارىن وسىعان اتسالىسۋعا شاقىرامىز. ازاماتتاردىڭ تابىسى وسكەن سايىن ەل تۇرعىندارىنىڭ ءال-اۋقاتى دا ارتا تۇسپەك"، – دەدى ەڭبەك جانە حالىقتى الەۋمەتتىك قورعاۋ ءمينيسترى.

سونداي-اق 2020 جىلدان مەملەكەت تاراپىنان بيۋدجەتتىك سالاعا قاتىستى ءبىرقاتار شارا قولعا الىنادى. اتاپ ايتقاندا، كەلەسى جىلدىڭ 1 قاڭتارىنان باستاپ مۇعالىمدەردىڭ جالاقىسى 25%-عا، مادەنيەت سالاسىنداعى قىزمەتكەرلەردىڭ ەڭبەكاقىسى 35%-عا، كەيبىرىنىڭ جالاقىسى 50%-عا دەيىن، الەۋمەتتىك سالا قىزمەتكەرلەرىنىڭ ەڭبەكاقىسى 30-60%-عا دەيىن كوبەيەدى.