قازاقستاننىڭ بىرىككەن ۇلتتار ۇيىمىنداعى وكىلى الەمدە زاڭسىز سوتتالعانداردى بوساتۋ ىسىمەن اينالىساتىن Freedom Now حالىقارالىق ۇيىمىنا بۇۇ كەڭەسشىسى مارتەبەسىن بەرۋگە قارسى شىقتى. بۇل تۋرالى «قامشى» پورتالى ازاتتىق سايتىنا سىلتەمە جاساي وتىرىپ حابارلايدى.

جاقىندا الەمدە زاڭسىز سوتتالعانداردى امنيسيالاۋمەن  اينالىساتىن Freedom Now حالىقارالىق قوعامدىق ۇيىمىنا بۇۇ كەڭەسشىسى مارتەبەسىن بەرۋ ماسەلەسى بۇۇ كولەمىندە تالقىلانعان بولاتىن. وندا Freedom Now-دى اقش جانە وزگە 28 ەل قولداعان. ال قازاقستان، رەسەي جانە جۇڭگو باستاعان باستاعان 9 مەملەكەت قارسى داۋىس بەرگەن. ناتيجەسىندە، باسىم داۋىسقا يە تاراپتىڭ ىقپالىمەن  بۇۇ ءتۇرلى ەلدەردەگى زاڭسىز سوتتالعانداردى بوساتۋ ىسىمەن اينالىساتىن Freedom Now ۇيىمىن اككرەديتاسيالاعان.

Freedom Now ۇيىمى سايتىنداعى حابارلامادا 20 شىلدەدە بۇۇ-نىڭ ەكونوميكالىق جانە الەۋمەتتىك كەڭەسى Freedom Now ۇيىمىنا ارنايى كەڭەسشى مارتەبەسىن بەرگەنىن ايتقان. ECOSOC-قا مۇشە 54 ەلدىڭ 29-ى Freddom Now-عا كەڭەسشى مارتەبەسىن بەرۋ قارارىن قولداپ، توعىزى قارسى داۋىس بەرگەن، 11 مەملەكەت قالىس قالعان.

Freedom Now ۇيىمىنا قارسى داۋىس بەرگەندەر قاتارىندا قازاقستان، قىرعىزستان، جۇڭگو، رەسەيمەن قاتار بوليۆيا، پاكىستان، سۋدان جانە وڭتۇستىك افريكا مەملەكەتى بار. قالىس قالعان 11 ەل اراسىندا ءۇندىستان بار.

مەران تەرنەر، Freedom Now-دىڭ اتقارۋشى ديرەكتورى:

-قازاقستاننىڭ ۇيىمعا نەلىكتەن قارسى داۋىس بەرگەنىن تۇسىنە المادىم. قازاقستاننىڭ Fredoom Now ۇيىمىنا كەڭەسشى مارتەبەسىن بەرۋگە قارسى شىعۋىنا ۇيىمنىڭ بۇعان دەيىن قازاقستاندا جۇرگىزگەن جۇمىسى سەبەپ بولۋى مۇمكىن. مىسالى، Freedom Now "الما-اتا ينفو" گازەتىنىڭ بۇرىنعى باس رەداكتورى، 2009 جىلى "مەملەكەتتىك قۇپياسى بار مالىمەتتەردى زاڭسىز ساقتاپ، تاراتتى" دەگەن ايىپپەن ءۇش جىلعا سوتتالعان رامازان ەسىرگەپوۆتىڭ بوساپ شىعۋىنا سەبەپكەر بولعان.  بۇعان قوسا استانا Freedom Now-عا قاتىستى ماسەلەدە ماسكەۋ مەن پەكيننىڭ ساياساتىنا ەرگەن بولۋى مۇمكىن.

نۇرزات توعجان