ۇلىبريتانيادا كولىكتى قۇجاتسىز مەڭگەرۋگە حاقىلى  جالعىز-اق ادام بار. ول  ەليزاۆەتا II پاتشايىم. وتكەن جەكسەنبى كۇنى پاتشايىمنىڭ ساياباق ىشىندەگى كوگالدى كولىكپەن باسىپ ءوتىپ بارا جاتقانىن ەرلى –زايىپتىلار كورىپ تاڭ قالعان ەكەن.  بۇل تۋرالى «قامشى» پورتالى vesti.ru. سايتىنا سىلتەمە جاساپ وتىرىپ حابارلايدى. شىركەۋدەن قايتىپ كەلە جاتقان پاتشايىم  ساياباق ىشىندە جاس بالاسىمەن قىدىرىپ جۇرگەن جۇبايلارعا كەدەرگى جاساماۋ ماقساتىندا كوگالدى باسىپ، جاستاردان اينالىپ ءوتۋدى قۇپ كورگەن ەكەن. 23 جاسار  سكارلەتت ۆينسەنت پاتشايىمنىڭ  وزدەرىنە  قول بۇلعاپ ءوتىپ بارا جاتقانىن كورىپ تاڭقالعان. «ءبىز ءوزىمىزدىڭ كۇندەلىكتى تاقىرىبىمىزدى تالقىلاپ كەتىپ بارا جاتقانبىز. ارتىمىزدان كولىكتىڭ كەلىپ قالعانىن بايقاماپپىز دا. كولىك ءبىزدى اينالىپ ءوتىپ، قول بۇلعاعاندا تاڭ قالدىق» ،-دەيدى سكارلەت. جەكسەنبى كۇنى اشىق اسپان استىندا، ساياباق ىشىندە الاڭسىز قىدىرىپ جۇرگەن جاس جۇبايلارعا ءبىزدىڭ ەلدەگى جاعدايدى ايتساڭ، تاڭ قالاتىن شىعار. پاتشانى بىلاي ىسىرىپ تاستاپ، مىقتى ءبىر كومنانيانىڭ تىزگىنىن ۇستاعاندار ەسىك الدىندا ويناپ جۇرگەن بالانى وپ-وڭاي قاعىپ كەتە الادى. ساياباقتى ايتپاعاندا، جاياۋ جۇرگىنشىلەرگە ارنالعان ارنايى جولاقتان  قىل كوپىردەن وتكەندەي، بىلەتىن سۇرەلەرىمىزدى اۋىزعا الىپ، ءتىلىمىزدى كاليماعا كەلتىرىپ وتەتىنىمىز جاسىرىن ەمەس قوي. سەبەبى جۇرگىنشىلەرگە ارنالعان جولاقتى جولدا ءسىزدى ءبىر دوكەيدىڭ بالاسى قاعىپ كەتسە، قۇنىڭىزدى وتەپ الا الماي قالاسىز. ولارعا زاڭ دا، ەرەجە دە قاۋقارسىز. نەگىزى ادامدى ادام زاڭ ارقىلى ەمەس، ادامي قۇندىلىقتار ارقىلى سىيلاعانعا نە جەتسىن؟ ايتپەگەندە الگى پاتشايىمنىڭ مۇمكىندىگى مەن قۇقىعى بارلىعىنان بيىك ەمەس پە؟ ول اقسۇيەكتىڭ ۇرپاعى. ءبىراق ول ءوز ازاماتتارىن سىيلايدى. مەملەكەتتىڭ ازاماتتارىن اقسۇيەكتىڭ سىيلاۋى ءبىر كۇندە قالىپتاسا سالعان جوق. ول ءۇشىن قانشاما تاريحي كۇرەستەر ورىن الدى. ادام- باستى قۇندىلىق.  اسىرەسە تىم از ۇلت ءۇشىن بۇل بۇلجىماس قاعيداعا اينالۋى ءتيىس بولاتىن. ال بىزدە بارلىعى كەرىسىنشە. جول اپاتىنان كوز جۇمىپ جاتقان وتانداستارىمىزدىڭ سانى كۇن وتكەن سايىن ارتىپ كەلەدى. قاۋىپسىزدىك بەلدىگىن تاققالى، بەينەباقىلاۋ ورناتقالى جۇرگىزۋشىلەر اراسىنداعى ءتارتىپ جولعا قويىلدى دەپ جاتامىز. ءتارتىپ ەڭ الدىمەن ادامنىڭ ىشكى الەمىندە جولعا قويىلۋى كەرەك. الدىمەن ەلگە ۇلگى بولاتىن ازاماتتار زاڭدى بەل ورتاسىنان كۇيرەتىپ كەتپەي سىيلايتىن بولسا، تۇرعىنداردىڭ دا زاڭعا دەگەن قۇرمەتى ارتا تۇسەدى. شىعارعان سولقىلداق زاڭدى وزىڭە قاراي يلىكتىرگىڭ كەلەتىنىن بىلگەندە، قاراشانىڭ  الدىندا ءقادىرىڭ قالا ما؟ بەرەكە-بىرلىك، اۋىزبىرشىلىك پەن تاتۋلىق دەپ ۇراندايمىز. ءوزىڭنىڭ ءبىر ساتتىك سىيىڭ جوق جەردەن ءقايتىپ بەرەكە تاپپاقسىڭ؟ پاتشايىم جاس كەزىندە جۇك كولىگىن ايداپ، قوعامدىق جۇمىستار اتقارعان ەكەن. ول جەكسەنبى كۇنگى ارەكەتى ارقىلى پاتشازادالاردا قۇلقىن عانا ەمەس، قولقانىڭ دا بار ەكەنىن اڭعارتىپ ءوتتى.وسىلايشا ءبىر ساتتىك شەشىمى ارقىلى تاعى دا ىقىلاسقا بولەنىپ جاتىر. ونىڭ سول كۇنگى ارەكەتىن بارلىعى جارىسا جازدى. ادامدىق باتىس پەن شىعىستى تالعامايدى. كەۋدەدە ادامنىڭ جۇرەگى سوعىپ تۇرسا، ونى جەر شارىنىڭ بارلىق تۇسىندا ابىرويىمەن الىپ جۇرۋگە ءتيىسپىز.

اينۇر تولەۋ