قازاقستاندا ەلەكتر قۋاتى تاپشىلىعى تۋىنداعان جاعدايدا اتوم ەلەكتر ستانسياسى سالىنۋى مۇمكىن. بۇل تۋرالى باسپا ءسوز ءماسليحاتىندا قازاقستان ەنەرگەتيكا ءمينيسترىنىڭ ورىنباسارى اسەت ماعاۋوۆ ايتتى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. 

بۇرىنعى ەنەرگەتيكا ءمينيسترى قانات بوزىمبايەۆ "بۇل جوبا قازاقستاندا جۇزەگە اسىرىلا ما؟" دەپ سۇراعان جۋرناليستەرگە ەلەكتر ستانسياسىن سالۋ تۋرالى ءالى ەشقانداي شەشىم قابىلدانباعانىن جەتكىزگەن ەدى. ونىڭ ايتۋىنشا، اەس سالۋ تۋرالى ماسەلە كوتەرىلگەن جاعدايدا، ول مىندەتتى تۇردە قوعامدىق تىڭداۋلاردا قارالادى.

"سول كەزدە مينيسترلىكتىڭ رەسمي ۇستانىمى ايتىلدى. ءبىز ونى ۇستانامىز: ءقازىر ءبىزدىڭ نارىق ەلەكتر قۋاتىمەن تولىقتاي قامتاماسىز ەتىلگەن. جالپى، ەگەر بولاشاقتا تاپشىلىق بولسا، اتوم نەمەسە كومىر ستانسياسىنىڭ بىرەۋىن تاڭداۋ تۋرالى ماسەلە قاراستىرىلادى"، - دەدى اسەت ماعاۋوۆ.

قازىرگى ۋاقىتتا، ۆيسە-مينيستر اتاپ وتكەندەي، اتوم ەلەكتر ستانسياسىنىڭ قۇرىلىسىن باستاۋ تۋرالى ايتۋعا ءالى ەرتە. سوڭعى شەشىمدى قابىلداۋعا ەلەكتر قۋاتى تاپشىلىعىنىڭ بولۋ-بولماۋى ىقپال ەتپەك.

ەستەرىڭىزگە سالا كەتەيىك، بۇعان دەيىن مەملەكەت باسشىسى قاسىم-جومارت توقايەۆ 2030 جىلعا قاراي قازاقستان ەلەكتر قۋاتى جەتىسپەۋشىلىگىنە تاپ بولاتىنىن مالىمدەگەن ەدى، الايدا پرەزيدەنت اتوم ەلەكتر ستانسياسىن سالۋ ماسەلەسىندە تۇرعىنداردىڭ پىكىرى ەسكەرىلۋى ءتيىس ەكەنىن اتاپ ءوتتى.