تاۋەلسىزدىك كۇنى قارساڭىندا جامبىل وبلىسى قاراتاۋ قالاسىنداعى «قازفوسفات» ج ش س «شولاقتاۋ» تاۋ كەن وڭدەۋ كەشەنى زەرتحاناسى قايتا جاڭعىرتۋدان ءوتىپ، پايدالانۋعا بەرىلدى.

ەل اۋماعىندا د.مەندەلەيەۆ كەستەسىنىڭ بارلىق دەرلىك ەلەمەنتتەرى بار. ونىڭ ىشىندە ءبىزدىڭ ءوڭىردىڭ دە الەۋەتى جوعارى. ال ءبىزدىڭ وڭىردە حيميا سالاسىنىڭ جۇرەگى سانالاتىن «قازفوسفات» ج ش س ەلىمىزدەگى بىرىگەي وندىرىستىك قۇرىلىم. بۇگىندە وندا 6000 قىزمەتكەر جۇمىس جاسايتىن سەرىكتەستىك زامان تالابىنا قاراي جۇمىس جاساۋى ءتيىس. وسىنى ەسكەرگەن سەرىكتەستىكتىڭ باس ديرەكتورى مۇقاش ەسكەندىروۆ «شولاقتاۋ» تاۋ كەن وڭدەۋ كەشەنىنىڭ ەسكى زەرتحاناسىن زامان تالابىنا ساي جابدىقتارمەن قايتادان جاڭعىرتىپ بەردى. وسى جىلدىڭ مامىر ايىندا باستالعان جۇمىستار تاۋەلسىزدىك مەرەكەسى قارساڭىندا تولىقتاي اياقتالعان. وسىلايشا، تەحنيكالىق باقىلاۋ جانە زەرتتەۋ بولىمدەرى ورتالىقتاندىرىلىپ، سوڭعى تالاپتارعا ساي قۇرال-جابدىقتارمەن جابدىقتالىپتى. اتالعان زەرتحانانىڭ اشىلۋ سالتاناتىندا مۇقاش ەسكەندىروۆ بۇل جەردە كۇندەلىكتى جۇمىستان بولەك، زەرتتەۋ جۇمىستارى جۇرگىزىلەتىنىن اتاپ ءوتتى.

– بۇگىندە سەرىكتەستىكتە 6 كەن ورنى بار. ول جەرلەردىڭ حيميالىق قۇرامدارى وزگەشە. ونداعى جەر قىرتىسىن تولىقتاي زەرتتەپ، ءوندىرۋ زاۋىتتارى جىبەرۋ وسى زەرتحانانىڭ مىندەتىنە جاتادى. مۇنداعى قۇرال-جابدىقتاردىڭ بارلىعىن رەسەي فەدەراسياسىنان ارنايى الدىردىق. ول ءۇشىن 300 ميلليون تەڭگە بولدىك. سونداي-اق مامانداردىڭ دا بىلىمدەرىن جەتىلدىردىك. بۇدان وزگە وسىنداعى وقۋ ورىندارىنىڭ ستۋدەنتتەرىمەن جۇمىس جاساپ، ينجەنەرلىك سالاعا بەت بۇرۋىنا كۇش سالۋدامىز. ويتكەنى، بولاشاق جاستاردىڭ قولىندا، – دەدى مۇقاش زۇلقارناي ۇلى.

زەرتحانانىڭ اشىلۋ سالتانادى ءسوز العان تالاس اۋدانىنىڭ اكىمى باقىت قازانباسوۆ سالا ماماندارىن زاماناۋي عيماراتتىڭ اشىلۋىمەن قۇتتىقتاپ، حيميا ونەركاسىبى سالاسىنداعى جۇمىستارىنا ساتتىلىك تىلەدى. سونداي-اق اۋدان اكىمى بىرىگەي وندىرىستىك قۇرىلىم وبلىستىڭ الەۋمەتتىك سالاسىنىڭ دامۋىنا وراسان ۇلەس قوسىپ كەلە جاتقانىن تىلگە تيەك ەتىپ، الداعى ۋاقىتتا قاراتاۋ قالاسىنىڭ دامۋىنا دا نازار سالاتىنىنا سەنىم ءبىلدىردى.

بۇگىندە 20-دان استام مامان جۇمىس اتقاراراتىن زەرتحانادا كەندى سۇرىپتاۋ، ەلەكترو قالقانى، پرەكۋرسورلار مەن ۋلى زاتتار قويماسى، تەرميالىق بولمە، مۇناي ونىمدەرىن تالداۋ جانە اناليتيكالىق زەرتتەۋ سىندى ءبىرقاتار بولىمدەر جۇمىس جاسايدى. سونىمەن قاتار وندا جۇمىسشىلار ءۇشىن بار جاعداي جاسالىنعان. ياعني، جۋىنۋ بولمەلەرى مەن وقۋ بولمەلەرى قاراستىرىلعان.