الەۋمەتتىك جەلىدە ءماجىلىس دەپۋتاتى شاكىر حاحازوۆتىڭ جامبىل وبلىسى قورداي اۋدانى تۇرعىندارىمەن كەزدەسۋدە ايتقان سوزدەرىنىڭ بەينەجازباسى تارالۋدا. دەپۋتات دۇنگەن ۇلتى وكىلدەرىمەن كەزدەسۋدە قازاق حالقىمەن تاتۋ بولۋعا شاقىرىپ، بەيبىتشىلىكتى ساقتاپ قالۋعا ۇندەگەن.

– وتكەن زاماننان بەرى قازاقتار مەن دۇنگەندەر ءبىر شاڭىراقتا مەكەن ەتىپ كەلە جاتىر. الايدا بۇگىنگى جاعداي ەكى ۇلت ءۇشىن دە تىم ۇيات نارسە. بىزدە نە جوق، ءبارى بار. اقشا دا بار، قاجەتىمىزگە جاراتاتىن دۇنيەنىڭ ءبارى بار. ءبىز ءبىر-بىرىمىزدى سىيلاپ، قۇرمەتتەۋىمىز كەرەك، وسى عانا بىزگە جەتىسپەيدى. دەگەنمەن قولدىڭ كىرىندەي بولعان اقشا ءبارىن قۇرتىپ جاتىر، اراعا وت سالاتىن دا وسى. بارلىعىمىزدى ۇلتقا دەيىن بولۋگە ماجبۇرلەپ وتىر. دۇنگەندەر تەك وسىندا عانا جۇرگەن جوق. استانادا دا بار. مەكەندەرى بازارلار مەن ساۋدا ورتالىقتارى. بازارعا كىرسەڭ، ولار (دۇنگەندەر –  رەد.) دۇرەكى جاۋاپ قايتارادى. بۇل نە دەگەن ماسقارا. ءتىپتى، مادەنيەتتى تۇردە قىزمەت كورسەتۋدى دە بىلمەيدى. مەن ءبىراز ۋاقىت بۇرىن قاراكەمەردە بولدىم. وندا ءبارى مۇلدە باسقاشا. بارلىعى مادەنيەتتى تۇردە قارىم-قاتىناس جاسايدى، –  دەدى دەپۋتات.

ونىڭ سوزىنشە، دۇنگەن حالقى ولاردى ادەيى ارانداتقان كۇننىڭ وزىندە جانجالعا بارماۋى كەرەك ەدى.

–  بۇنداي تومەن دارەجەگە ءتۇسۋ (جانجالداسۋ –  رەد.) سىزدەرگە استە جاراسپايتىن قىلىق. وسىعان ۇقساس جاعداي بۇرىندارى مەنىڭ دە باسىمنان وتكەن. 1996 جىلى دۇنگەن بولعانىم ءۇشىن بىرەۋلەردەن تاياق جەگەنىم بار. قۇلاعىم جىرىلىپ، ءۇستى-باسىمنىڭ ءبارى كوكالا قويداي بولدى. سول كەزدە العان سوققىدان جاعىم سىنىپ، كۇرمەلىپ سويلەيتىنىم سودان، –  دەگەن دەپۋتات جانجالعا ەرەگەسكە بارماعانىن جەتكىزگىسى كەلدى.

ۇكىمەت كوميسسياسىنىڭ قۇرامىنا ەنگەن دەپۋتات بۇلىنگەن ۇيلەر مەن ساۋدا ورىندارىنىڭ، مەشىتتىڭ قالپىنا كەلتىرىلەتىنىن ايتتى. سونداي-اق ول كىنالىلەر زاڭ بويىنشا جازالاناتىنىن ءمالىم ەتىپ، قازاق حالقىنا قۇرمەتپەن قاراۋعا شاقىردى.

– تاتۋ بولايىق، باۋىر بولايىق. ەگەر سىزدەردىڭ ارەكەتتەرىڭىز زاڭ الدىندا دۇرىس بولىپ، ولار (قازاقتار –  رەد.) قاتەلەسكەن بولسا، ءوز ارەكەتتەرى ءۇشىن مىندەتتى تۇردە جاۋاپ بەرەدى. ءبىراق سىزدەر ويلارىڭىزعا كەلگەن ارتىق اڭگىمەنى ايتۋعا قۇمارسىزدار. ءوزىم دۇنگەن رەتىندە ايتايىن، قازاق – باۋىرمال حالىق. سوندىقتان ولار تۋرالى جامان ويلاماڭىزدار. مەن قازاق حالقى ءۇشىن جان بەرۋگە ءازىرمىن. بار تىلەگىم، بىر-بىرىمىزگە دەگەن سىيلاستىق جوعالماسا ەكەن. مەن سىزدەردى (قازاق حالقى –  رەد.) جاقسى كورەمىن. تاپ سول جايت بولىپ جاتقاندا وسى جەردە بولسام، ارينە، سىزدەرگە قولداۋ كورسەتىپ، سوڭى قايعىمەن اياقتالعان وقيعانىڭ باسىن بىردەن اشىپ الۋعا تىرىساتىن ەدىم. ءبىزدىڭ تاراپتان كەتكەن قاتەلىكتەر ءۇشىن كەشىرىم سۇرايمىن، –  دەپ اتاپ ءوتتى شاكىر حاحازوۆ.