قاراعاندى وبلىسىنداعى سۋ تاسقىنى كەزىندە ۇيلەرى جارامسىز بولىپ قالعان تۇرعىنداردىڭ بارلىعىنا بىردەي مەملەكەتتىك بيۋدجەت ەسەبىنەن باسپانا تۇرعىزىلمايتىن بولدى. بۇل تۋرالى «قامشى» پورتالى ازاتتىققا سىلتەمە جاسايدى. بۇلىنگەن ۇيلەرىنىڭ قۇجاتتارى تولىق ەمەس وتباسىلارعا جاپا شەككەندەردى قولداۋ قورىنان بولىنگەن قاراجات ەسەبىنەن باسقا جەردەن باسپانا سالىنباق.

«قور» دەپ وتىرعانىمىز - اكىمشىلىكتىڭ ۇيىمداستىرۋىمەن جۇرتتان جىلۋ جيناۋ ماقساتىندا اشىلعان «قاراعاندى وبلىسىنداعى تاسقىننان زارداپ شەككەندەرگە كومەك قورى».

قاراعاندى وبلىسى، بۇقار جىراۋ اۋدانىنىڭ باسشىلىعى ءساۋىر ايىندا بولعان تاسقىننان بۇلىنگەن ۇيلەردىڭ اراسىندا «پروبلەمالىق ۇيلەردىڭ» بار ەكەنىن راستاعان. بۇرىنعى قوجايىندارى رەسەيگە نە گەرمانياعا كوشىپ كەتكەن، ال جاڭا يەلەرى قۇجاتتارىن وزدەرىنە راسىمدەمەگەن، كەيبىر ۇيلەردىڭ ءتىپتى قۇجاتى جوق. زاڭ بويىنشا، ۇيلەردى بيۋدجەت ەسەبىنەن بۇزىپ، ورنىنا جاڭاسىن سالۋعا بولمايدى. سوندىقتان اكىمشىلىك مۇنى حالىققا ەسكەرتكەن. دەگەنمەن، جەرگىلىكتى وكىمەت تاسقىن كەزىندە ءۇيى قيراعانداردىڭ ءبىر دە ءبىرى دالادا قالمايدى دەپ ۋادە بەرگەن. ەندى ولار ماسەلەنى باسقا جولمەن شەشپەك: قاراعاندى وبلىسىنداعى تاسقىننان زارداپ شەككەندەرگە كومەك قورىنىڭ ەسەبىنەن باسقا جەردەن تۇرعىن جايلار سالۋ جوسپارلانعان. 

 - ءۇيدى تەك زاڭدى يەسىنىڭ رۇقساتىمەن بۇزا الامىز. ءبىز ولارعا بيۋدجەت ەسەبىنەن ءۇي سالا المايمىز. سەبەبى ەرتەڭ ءۇيدىڭ زاڭدى ەگەسى كەلىپ، ولاردى شىعارىپ جىبەرۋى مۇمكىن. سوندىقتان ءبىز قوردىڭ ەسەبىنەن [تاسقىن كەزىندە] سول ۇيلەردە تۇرىپ جاتقان كىسىلەرگە باسقا جەردەن جاڭا ءۇي تۇرعىزامىز. كەيىن قور الگى ۇيلەردى زارداپ شەككەندەرگە تاپسىرادى. قۇرامىنا 11 ەلدىمەكەن كىرەتىن بۇقار جىراۋ اۋدانىندا  وسىنداي 63 «پروبلەمالىق ءۇي» بار، ولاردىڭ  43ء-ى تاسقىننان ەڭ كوپ جاپا شەككەن مۇستافين كەنتى مەن نۇرا بەكەتىندە ورنالاسقان، - دەدى بۇقار جىراۋ اۋدانى اكىمىنىڭ ورىنباسارى اسحات ءالي.

نۇرزات توعجان