قازاقستان ازاماتتارى كوروناۆيرۋس تاراعان يران مەن وڭتۇستىك كورەيا ەلدەرىنەن ازىرگە ەۆاكۋاسيالانبايدى. بۇل تۋرالى بۇگىن ۇكىمەت باسپا ءسوز ورتالىعىندا وتكەن بريفينگتە سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشيەۆ مالىمدەدى. 

ونىڭ سوزىنشە، ءقازىر يراندا قازاقستاننىڭ 170 ازاماتى بار، ءبىراق ازىرگە ولاردى ەۆاكۋسيالاۋ تۋرالى ماسەلە جوق. نۇرىشيەۆ يرانداعى قازاقستان ەلشىلىگى ونداعى ەل ازاماتتارمەن ءتيىستى جۇمىس جۇرگىزىپ جاتقانىن،  ازاماتتار يراننان قايتۋدى ءجون دەپ شەشكەن جاعدايدا مينيسترلىك ولارعا ءتيىستى كومەكتى بەرەتىن ايتتى. 

يران دەنساۋلىق ساقتاۋ مينيسترلىگىنىڭ مالىمەتىنشە، يراندا كوروناۆيرۋستىڭ تارالۋى ءورشىپ تۇر. سوڭعى اقپارات بويىنشا، ول جاقتا  978 ادام ۆيرۋس جۇقتىرعان. 

نۇرشيەۆتىڭ ايتۋىنشا، وڭتۇستىك كورەيادا قازاقستاننىڭ 34 مىڭ 600 ازاماتى بار. ول جاققا باعىتتالعان رەيستەر سانى توعىزدان ۇشكە قىسقارتىلعان. كوروناۆيرۋس ءورشىپ تۇرعان وڭتۇستىك كورەياعا ءۇش رەيست سول جاقتاعى قازاقستان ازاماتتارى ەلگە قايتۋدى ءجون دەپ شەشسە، قايتىپ كەلسىن دەگەن ويمەن قالدىرىلعان.

نۇرىشيەۆتىڭ سوزىنشە، قيىن جاعداي تۋىنداسا عانا قازاقستان ءوز ازاماتتارىن ەۆاكۋاسيالايدى. ال وعان دەيىن قايتۋعا نيەتتى ازاماتتار ازىرگە ءجۇرىپ تۇرعان رەيستەر ارقىلى ەلگە ورالا الادى. 

سوڭعى مالىمەت بويىنشا، دۇنيەجۇزىندە قازىرگە دەيىن كوروناۆيرۋس جۇقتىرعاندار سانى 89 مىڭنان استى.