10 جىلدان استام تۇرمەدە وتىرعان "قازاتومونەركاسىپ" كومپانياسىنىڭ بۇرىنعى جەتەكشىسى مۇحتار جاكىشيەۆ شارتتى جازامەن بوستاندىققا شىعاتىن بولدى. بۇگىن، 3 ناۋرىزدا سەمەي قالالىق №2 سوتى شىعارعان شەشىمگە سايكەس، جاكىشيەۆ "پروباسيالىق باقىلاۋعا الىنادى، جازا مەرزىمى تولىق اياقتالمايىنشا قازاقستان اۋماعىنان شىعارىلمايدى".
56 جاستاعى مۇحتار جاكىشيەۆ 2009 جىلى مامىردا ۇستالىپ، "ۆەنادا (اۆستريا) "قازاتومونەركاسىپ" كومپانياسىنىڭ زاڭسىز وكىلدىگىن اشۋ ارقىلى پايدا تاپتى، استىرتىن كاسسا ۇستادى، كۇزەتشىسىنە قوسىمشا ەڭبەكاقى تولەپ كەلگەن" دەگەن ايىپپەن 14 جىلعا سوتتالعان. تۇرمەدە وتىرعان كەزدە ءۇشىنشى توپ مۇگەدەكتىگىن العان جاكىشيەۆ وزىنە تاعىلعان ايىپتارمەن كەلىسپەيدى.
قازاقستاندىق قۇقىق قورعاۋشىلار جاكىشيەۆتى "ساياسي تۇتقىندار" تىزىمىنە قوسقان. قۇقىق قورعاۋشىلار "جاكىشيەۆ ەلدەن قاشقان مۇحتار ابليازوۆپەن (بۇرىنعى بانكير، قازاقستان بيلىگىن سىناۋشى) ارالاسقانى ءۇشىن قىسىمعا ۇشىرادى" دەپ سانايدى. ال قازاقستان بيلىگى ەلدە "ساياسي تۇتقىندار جوق" دەپ ەسەپتەيدى.
بۇعان دەيىن ونىڭ مەرزىمىنەن ەرتە بوساتۋ تۋرالى وتىنىشتەرى قاناعاتتاندىرىلماعان. وتكەن جىلدىڭ وزىندە جاكىشيەۆ ءىسى بويىنشا ءۇش رەت اپەلاسيالىق سوت ءوتىپ، ونىڭ جازاسى وزگەرىسسىز قالعان ەدى. سوت "جاكىشيەۆ مەملەكەتكە كەلتىرگەن 99،6 ميلليارد تەڭگە كولەمىندە شىعىندى وتەمەدى" دەگەن بولاتىن.
قازاقستاندا سوڭعى جىلدارى مۇحتار جاكىشيەۆتى بوستاندىققا شىعارۋدى تالاپ ەتكەن اكسيالار جيىلەدى. وعان قاتىسقاندار جاكىشيەۆتىڭ "ساياسي تۇتقىن" ەكەنىن ايتىپ، بيلىك ونى زاڭسىز ۇستاپ وتىر دەپ ەسەپتەيدى.
پىكىر قالدىرۋ