كەشە استانا قالاسىنىڭ اكىمى ادىلبەك جاقسىبەكوۆتىڭ ارنايى تاپسىرماسىمەن ءنۇرالى راحات ۇلى الييەۆ ەلورداداعى بيزنەستى وڭتايلاندىرۋ جۇمىستارىمەن اينالىساتىنى تۋرالى «قامشى» پورتالىندا «جاقسىبەكوۆ استانانىڭ بيزنەسىن الييەۆتىڭ قولىنا تاپسىردى» اتتى ماقالا جارىق كورگەن بولاتىن (http://qamshy.kz/home/show/550 ).

2014 جىلدان باستاپ ەلىمىزدىڭ اكىمشىلىك باسقارۋ ءىسى قىزمەتكەرلەرىنىڭ قاتارىنا جاپ-جاڭا ەسىم بولىپ قوسىلعان ءنۇرالى راحات ۇلى تۋرالى ءبىرى بىلسە، ءبىرى بىلە بەرمەيتىنى تۇسىنىكتى.

ءجا، بىلسە دە كادىگى جۇرتتىڭ اۋزىندا ول (ءنۇرالى الييەۆ) – «پرەزيدەنت  – اتانىڭ» سۇيىكتى نەمەرەسى نەمەسە قازاقستانداعى ءنومىرى ءبىرىنشى وپپوزيسيونەر «بولعان» ازاماتتىڭ سۇيەك تۇڭعىشى.

ەڭ الدىمەن، داريعا نازاربايەۆا مەن راحاتتىڭ تۇلا بويى تۇڭعىشتارى ء-نۇرالى الييەۆ 2014 جىلدىڭ 19-جەلتوقسانىندا استانا قالاسى اكىمىنىڭ ورىنباسارى بولىپ تاعايىندالعاندا جۇرت مۇنى تۇرلىشە باجايلاعان-دى (http://www.qazaquni.kz/؟p=31758). ءيا، «اكەسى ءۇشىن بالاسى جاۋاپ بەرمەيدى» قاعيداسىنا سالساق، كىمنىڭ بالاسى بولسا دا، قابىلەتى مەن قارىمى جەتسە، پاتشا كوڭىلىڭىزگە ەرىك.

ەندى مىنە، ۇلكەن ساياساتقا كەلگەنىنە كوپ بولماسا دا ءنۇرالى راحاتۇلىنا جاقسىبەكوۆ مىرزا استانانىڭ  «مايلى  جىلىكتەرىنىڭ» ءبىرىن تاپسىرىپتى.

جاقسىبەكوۆ جاقسىسىن سەنىپ تاپسىرعانىنا قاراعاندا ەلوردادان ەنشىسىن جىبەرمەي جۇرگەن، 30-دى كەشە عانا ەڭسەرگەن جاس ساياساتكەر ءنۇرالى الييەۆتىڭ ءبىلىمى مەن بىلىگى وسىعان  جەتكەن بولسا كەرەك-تى.

ەندەشە،  ءابىش اتا شوبەرەسىنىڭ ءومىر بەلەستەرىن پاراقتاپ كورەيىك: (http://astana.gov.kz/kk/modules/material/6986 )

1985 جىلى 1 قاڭتاردا تۋعان ءنۇرالى راحات ۇلى - اباي اتىنداعى قازاق ۇلتتىق پەداگوگيكالىق ۋنيۆەرسيتەتىن ءتامامداپ،  ەكونوميكا جانە قارجى باكالاۆرى اتانادى. كەيىن ول جوعارى ءبىلىمىن جالعاستىرۋ ءۇشىن پەپپەردين ۋنيۆەرسيتەتىنە ءتۇسىپ،  بيزنەس-اكىمشىلەندىرۋ باكالاۆرى ماماندىعىن يگەرىپ شىققان. مۇنىمەن شەكتەلمەگەن ءنۇرالى الييەۆ ءدال وسى ماماندىق بويىنشا يمادەك ۋنيۆەرسيتەتىن  ماگيستر دارەجەسىندە اياقتايدى.

ءار جىلداردا، «نۇربانك» اق ءتوراعاسىنىڭ ءبىرىنشى ورىنباسارى، باسقارما ءتوراعاسى جانە ديرەكتورلار كەڭەسىنىڭ ءتوراعاسى لاۋازىمدارىندا قىزمەت اتقارعان.

2008 جىلدىڭ جەلتوقسانىنان 2013 جىل ارالىعىندا — «قازاقستاننىڭ دامۋ بانكى» اق باسقارما ءتوراعاسىنىڭ ورىنباسارى، «ترانستەلەكوم» اق باسقارما ءتوراعاسى.

ال 2014 جىلدىڭ 19-جەلتوقسانىنان باستاپ استانا قالاسى اكىمىنىڭ ورىنباسارى بولعان.

كوپشىلىك الدىنا ءجيى شىعا بەرمەيتىن جاس ساياساتكەر تۋرالى ناعاشى اتاسى، ق ر پرەزيدەنتى ءوزىنىڭ اشىق سۇحباتى بارىسىندا بىلاي دەگەنى ەستەرىڭىزدە بولار. «مەنىڭ نەمەرەلەرىم، قىزدارىم راحاتقا كەشىرىم جاساۋىمدى ءوتىنىپ كەلمەدى دەيسىڭدەر مە؟ كەلگەندە قالاي كەلدى. ءبىراق زاڭ بارىمىزگە ورتاق»،-دەگەن بولاتىن پرەزيدەنت. كوز الدىندا اكەسى وماقاسىپ تۇسكەندە جاس ءنۇرالى ارينە، شاراسىز ەدى عوي. كەيىنىرەكتە، ول ءوز اتاسى باقيعا اتتانعاندا (اكادەميك مۇحتار الييەۆ) جەرلەۋ راسىمىنە قاتىسىپ، قالىڭ جۇرتتىڭ اراسىنان تابىلعان-دى. مۇنى جۇرت جاقسىلىققا بالاپ، «تەكتى اتانىڭ ۇرپاعى عوي» دەسكەن-دى.

دەسە دە، ءبىر ەلدىڭ بيلىگىنە بىردەي شۇيلىككەن قوس ساياساتكەردىڭ وتباسىندا دۇنيەگە كەلگەن،  قازىرگى دەپۋتات داريعا مەن ەكس-ەلشى بولعان راحاتتىڭ تۇڭعىشتارى ساياساتقا مۇلدە وزگەشە باعىتپەن كەلگەندىگىن كورسەتىپ باعۋدا. بىلدەي ءبىر ەلوردانىڭ بيزنەسى ەندى ءنۇرالىنىڭ قولىندا. دەمەك، بۇل ءنۇرالىنىڭ سىنالار دەر شاعى. ءنۇرالى ەندى اناسى مەن پرەزيدەنت اتاسىنىڭ ساياسىن ۇزاق ۋاقىتقا دەيىن پانالاي ما؟ الدە اكەسىنىڭ سورىن كەشە مە؟

قازاقستاننىڭ تۇڭعىش پرەزيدەنتى نۇرسۇلتان ءابىش ۇلىنىڭ باسقارۋ وكىلەتتىلىگى تۋرالى ءسوز قوزعالا باستاعاندا ەل ءىشى مەن ساياساتكەرلەردىڭ اراسىندا تاق مۇراگەرى كىم بولادى دەگەن سۇراق تۋعان بولاتىن. سوندا كەيبىر ساياساتكەرلەر – پرەزيدەنت نەمەرەسى ءنۇرالىنىڭ ەسىمى دە ەستىلگەنى جاسىرىن ەمەس. شىنىمەن، جاس تا بولسا ۇلكەن ساياساتتاعى كادەلى جىلىكتەردى يەمدەنىپ جۇرگەن ءنۇرالى الييەۆ – پرەزيدەنتتىڭ جاسىرىن دايىنداپ جۇرگەن مۇراگەرى بولۋى مۇمكىن بە؟ ەگەر مۇراگەر بولسا – نەگە ول اتاسىنىڭ تەگىنە وتپەگەن (ءىنىسى ايسۇلتان سەكىلدى)؟ نۇرالىگە ساياساتكەرلەردىڭ ءىش جىلىتۋىنىڭ سەبەبى نەدە؟

بۇنى دا ۋاقىت كورسەتەدى...

نۇرگەلدى ءابدىعاني ۇلى