وڭتۇستىك قازاقستان وبلىسىندا ارحەولوگتار ەل تاريحىنداعى تۇڭعىش ايەل جاۋىنگەردىڭ سۇيەگىن تاپتى. بۇل تۋرالى «قامشى» پورتالى قازاقپاراتقا سىلتەمە جاساي وتىرىپ حابارلايدى.

وڭتۇستىك قازاقستاندىق ارحەولوگتاردىڭ انىقتاۋىنشا، ايەل جاۋىنگەردىڭ مۇردەسى تولىق قارۋلانعان كۇيى تابىلعان. الدىن الا بولجامدار بويىنشا تابىلعان مۇردە ءبىزدىڭ داۋىرىمىزگە دەيىنگى  2 عاسىردان ب.د. 4 عاسىر ارالىعىندا ءومىر سۇرگەن بولۋى مۇمكىن.

قازىرگى ۋاقىتتا بەلگىلى بولعانداي بۇل مۇردە – ارگەحولوگتار  از زەرتتەگەن قاڭلى مەملەكەتىنىڭ وكىلى. ال قازاقستان تاريحى وقۋلىقتارىندا  وسىعان دەيىن ساق پاتشايىمىنان وزگە بىردە-بىر جاۋىنگەر ايەلدىڭ بولماعانى تۋرالى جازىلعان.

قازىرگى ۋاقىتتا ارحەولوگتار ايەل جاۋىنگەر سۇيەگىنىڭ ءار سانتيمەترىنە دەيىن  ەلەپ-ەكشەۋدە.. شامامەن ونىڭ جاسى- 2300 جىلدى قۇرايدى.

ايەلدىڭ وڭ قولىندا تەمىر جەبەنىڭ ەكى ءتۇرى، ساداق ەلەمەنتى، قانجار جانە كىشكەنە پىشاق، ال سول جاعىندا ۇلكەن قىلىش، سۇيەكتەردەن جاسالعان كوپتەگەن بۇيىمدار تابىلعان. كەيبىر زاتتاردى ماماندار ءالى دە انىقتاۋ ۇستىندە.

تولىقتاي زەرتتەۋ جۇمىستارى اياقتالعان سوڭ، تابىلعان جاۋىنگەر ايەلدىڭ سۇيەگى ق ر ورتالىق مۇراجايىنا تاپسىرىلادى. كەيىن ايەل مۇردەسىنە جانە باسقا دا جادىگەرلەرگە ساراپتاما جاسالاتىن بولادى.

«وسى كۇلتوبە قالاشىعىندا ەكى مىڭ جىل بۇرىن ۇلكەن قالا بولعان. 23 جىل ارنايى ەكسپەديسيا بۇل جەردەن وتكەن ءداۋىردىڭ جادىگەرلەرىن تاۋىپ كەلەدى. ءقازىر تاعى ءبىر قورعاندى اشىپ جاتىرمىز. بۇل جەردە ءالى تالاي قىزىقتى دۇنيەلەر تابىلاتىنىنا سەنىمدىمىز»،-دەيدى زەرتتەۋشىلەر.

نۇرزات توعجان