بۇگىن، 16 ماۋسىمدا اتىراۋ وبلىسىندا كوروناۆيرۋستان ەكى ادام كوز جۇمدى. بۇل اقپاراتتى وبلىستىق دەنساۋلىق ساقتاۋ باسقارماسى حابارلادى. 

باسقارما دەرەگىنشە، قايتىس بولعانداردىڭ ەكەۋى دە ەر ادام. ونىڭ ءبىرى – 55 جاستا، ەكىنشىسى – 57 جاستا.

"اۋرۋحاناعا تۇسكەن كەزدە ەكى ناۋقاستا دا ينتوكسيكاسيالىق سيندروم بولدى، دەم جەتپەي تۇردى، جاعدايى وتە اۋىر بولدى. بۇل پاسيەنتتەرگە كوروناۆيرۋس ينفەكسياسى جانە ەكىجاقتى پوليسەگمەنتارلى پنيەۆمونيا دياگنوزى قويىلعان ەدى" دەلىنگەن وبلىستىق دەنساۋلىق ساقتاۋ باسقارماسىنىڭ حابارلاماسىندا.

سوڭعى اقپارات بويىنشا، اتىراۋ وبلىسىندا قايتىس بولعاندار سانى 6 ادامعا جەتىپ وتىر. ال قازاقستاندا ۆيرۋستان بارلىعى 81 ادام كوز جۇمدى.

ءقازىر ەلدە 15 192 ادامنان كوروناۆيرۋس تابىلعان. ولاردىڭ 9488ء-ى ىندەتتەن ايىقتى.