اقتوبە تۇرعىنى "ۆكونتاكتە" جەلىسى ارقىلى جيھادقا ۇندەۋ جاساۋمەن اينالىسقان، - دەپ جازعان "دياپازون". ونىڭ كومپيۋتەرلىك كلۋبتا اكىمشى بولىپ قىزمەت ەتكەنى حابارلانىپ وتىر. بۇل تۋرالى «قامشى» tengrinews.kz-كە سىلتەمە جاسايدى.

تەرگەۋشىلەردىڭ مالىمەتىنشە، ەر ادام تەرروريزمدى ناسيحاتتاۋعا، ۇلتارالىق الاۋىزدىق جاساۋعا باعىتتالعان راديكالدىق ءدىني اعىمنىڭ ۇستانۋشىسى بولعان. ونىڭ "ۆكونتاكتە" الەۋمەتتىك جەلىسىندەگى پاراقشاسى ارقىلى "ابۋ انسار" نيگىندە جيھادقا ۇندەۋمەن اينالىسقانى حابارلاندى. ول دايش لاڭكەستىك توبىنىڭ سيريا مەن يراكتاعى قارۋلى ارەكەتتەرىن ماقتاعان.

ەر ادامنىڭ سوتى 11 تامىزدا بولدى. ول تەرروريزمدى ناسيحاتتاعانى ءۇشىن جانە ۇلتارالىق الاۋىزدىق پەن ءدىني الاۋىزدىق تۋعىزعانى ءۇشىن مۇلكىن تاركىلەۋ ارقىلى بەس جىلعا باس بوستاندىعىنان ايىرىلدى. 

ەسكە سالايىق، وسىعان دەيىن اقتوبەدە سەگىز ادامعا "تەرروريستىك نەمەسە ەكسترەميستىك ارەكەتتى قارجىلاندىرعانى جانە تەرروريزمگە نە ەكسترەميزمگە وزگە دە دەم بەرۋشىلىك" جانە "الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ" باپتارى بويىنشا جازا كەسىلگەن بولاتىن. ولار ءتيىستى جازاسىن الدى.