جاقىندا «التىن جۇرەك-2015″ قايىرىمدىلىق سىيلىعىنىڭ سالتاناتتى تاپسىرۋ ءراسىمى وتەدى.  كەش اياسىندا بۇرىن-سوڭدى بولماعان ەرەكشە  قايىرىمدىلىق اۋكسيونىن وتكىزۋ دە جوسپارلانعان. بۇل تۋرالى «قامشى» پورتالى  Today.kz-كە سىلتەمە جاساي وتىرىپ حابارلايدى.

وسىمەن 9- رەت وتكىزىلىپ وتىرعان «التىن جۇرەك» قايىرىمدىلىق سىيلىعىنىڭ تاريحىندا ەرەكشە لوتتار پايدالانىبماق.  اۋكسيونعا قويىلعان لوتتاردىڭ جالپى سانى -9.  نەگىزگىلەرىنىڭ قاتارىندا «قازاقستان ارۋى-2014″ بايقاۋىنىڭ جەڭىمپازى رەگينا ۆاندىشيەۆامەن كەشكى اس ءىشۋ بولىپ تابىلادى. اتالمىش شاراعا  رەگينا حانىمنىڭ ءوزى دە كەلىسىم بەرىپتى.  سونداي-اق، اۋكسيون جەڭىمپازىمەن كەشكى ءشاي ىشۋگە كەلىسىم بەرگەن تانىمال قازاقستاندىق ساياساتكەرلەر دە جوق ەمەس. قايىرىمدىلىق سىيلىعىن ۇيىمداستىرۋشىلار كەلىسسوزدەر جاساۋدى ءالى دە جۇرگىزۋدە. ۇيىمداستىرۋشىلاردىڭ ايتۋىنشا، كەشتىڭ ەڭ ماڭىزدى قوناعى جانە قازاقستاننىڭ پرەمەر-مينيسترى كارىم ءماسىموۆ. ۇيىمداستىرۋشىلار ءماسىموۆ مىرزامەن ءشاي ءىشۋ ءۇشىن ارنايى اۋكسيون ۇيىمداستىرماق.  پرەمەر-مينيستر مىرزامەن كەشكى ءشاي ىشۋگە ارنالعان لوتتار باسقالارىنا قاراعاندا قىمباتىراق بولماق. باستاپقى باعا ءۇش ءجۇز مىڭ تەڭگەدەن باستالادى-مىس. بۇل تۋرالى  «باۋىرجان» قايىرىمدىلىق قورىنىڭ ءباسپاسوز-حاتشىسى اينۇر سالىمبايەۆا مالىمدەگەن.

سالىمبايەۆانىڭ ايتۋىنشا، وليمپيادا چەمپيونى الەكساندر ۆينوكۋروۆ اۋكسيونعا ءوزىنىڭ قولتاڭباسى بار جەڭىل جەيدەسىن بەرگەن ەكەن. سونىمەن قاتار، اۋكسيونعا  «ميلان» فۋتبول كلۋبى ويىنشىلارىڭ قولتاڭبالارى بار دوپ تا قويىلادى.

ۇيىمداستىرۋشىلار جينالعان قارجىعا بالالارعا ارنالعان ويىن الاڭدارىن سالماق. ول ءبىرىنشى بولىپ، قىزىلوردا قالاسىندا سالىناتىن بولىپ بەكىتىلگەن.

نۇرزات توعجان