India Times جاڭالىقتار قىزمەتى جۇڭگو مەن ءۇندىستان اراسىنداعى داۋلى لاداح ايماعىنداعى ناقتى باقىلاۋ سىزىعىنا 30 مىڭ ءۇندى اسكەرىنىڭ جىبەرىلگەنىن جازدى، دەپ حابارلايدى قامشى ءتىلشىسى.

بۇل جاعداي ءۇندىستان ۇلتتىق قاۋىپسىزدىك جونىندەگى كەڭەسشى ادجيت دوۆال مەن جۇڭگو سىرتقى ىستەر ءمينيسترى ۆان ي اراسىنداعى شيەلەنىستى باسۋ تۋرالى كەلىسسوزدەردەن سوڭ، بەيجىڭ "ءوزىنىڭ اۋماقتىق ەگەمەندىگىن قورعايدى" دەپ مالىمدەمە جاساعاننان كەيىن باستالعان.

ءۇندىستان ۇكىمەتىنىڭ دەرەككوزدەرى وتكەن ايدا داۋلى لاداح ايماعىنداعى جۇڭگو اسكەرلەرىمەن قاقتىعىستا ءۇندىستاننىڭ 20 اسكەري قىزمەتكەرى قازا تاپقانىن مالىمدەگەن بولاتىن. بەيجىڭ قاقتىعىستان قانشا ادامنىڭ كوز جۇمعانى تۋرالى اقپارات بەرمەدى. الايدا ءۇندىستاندىق ب ا ق "43 جۇڭگو اسكەرى قازا تاپتى" دەسە، اقش بارلاۋ قىزمەتى "كەم دەگەندە 35 قىتايلىق سارباز ءولدى" دەپ حابارلاعان. دۇيسەنبىدە ءۇندىستان باسىلىمدارى جۇڭگو تاراپى اسكەرلەردى شىعارۋدى باستاعانىن جاريالاعان.