شقو-دا ەلىمىزدەگى سانيتارلىق-ەپيدەميولوگيالىق جاعداي ەسكەرىلە وتىرىپ، تەحنيكالىق جانە كاسىپتىك ءبىلىم بەرۋ جۇيەسىندە، مەكتەپتەردەگى سياقتى جاڭا وقۋ جىلىن باستاۋدىڭ ەكى نۇسقاسى قاراستىرىلۋدا.  بۇل تۋرالى شىعىس قازاقستان وبلىسىنىڭ اكىمى دانيال احمەتوۆ ءمالىم ەتتى.

- قاشىقتىقتان وقىتۋ جۇيەسى بويىنشا 69 كوللەدجدىڭ 32 مىڭنان استام ستۋدەنتى ءبىلىم الادى دەپ جوسپارلانۋدا. وندىرىستىك وقىتۋ، كاسىپتىك پراكتيكا، تەحنيكالىق، تەحنولوگيالىق، مەديسينا جانە ونەر ماماندىقتارى بويىنشا زەرتحانالىق جۇمىس ساعاتتارى بارلىق سانيتارلىق تالاپتاردى ساقتاي وتىرىپ، جۇرگىزىلەتىن بولادى.  سانى از توپتاردا ءداستۇرلى فورماتتا وتكىزىلەدى، - دەدى ايماق باسشىسى.

باسپا ءسوز ءماسليحاتى بارىسىندا وبلىس اكىمى دانيال احمەتوۆ شتاتتىق رەجيمدە وقىتۋ شاعىن كونتينگەنتى بار (200-گە جۋىق ستۋدەنت) جانە اۋىلداردا نەمەسە حالقى از قالالاردا ورنالاسقان 13 كوللەدجدە ۇيىمداستىرىلاتىنىن اتاپ ءوتتى. بۇل كوللەدجدەردە جالپى جيىنى 1 721 (مىڭ جەتى ءجۇز جيىرما ءبىر) ستۋدەنت ءبىلىم الادى. وقۋ بارىسىندا بارلىق سانيتارلىق-ەپيدەميولوگيالىق تالاپتار ساقتالىپ، كابينەتتىك جۇيەدەن باس تارتىلادى.

-         جاڭا وقۋ جىلىندا «جاس مامان» جوباسى اياسىندا وڭىردەگى 5 كوللەدجدىڭ بازاسىندا WorldSkills حالىقارالىق ستاندارتتارىنا سايكەس كەلەتىن قۇزىرەتتىلىك ورتالىقتارى اشىلادى. قازىرگى ۋاقىتتا وسى باعىتتاعى جۇمىستاردىڭ 80 پايىزى ورىندالدى. اتالمىش ورتالىقتار ءبىرىنشى قىركۇيەككە دەيىن قولدانىسقا بەرىلەدى. وندا وڭىردەگى باسقا كوللەدجدەردىڭ ستۋدەنتتەرى مەن پەداگوگتارى تاجىريبەلىك ساباقتار وتكىزەدى، - دەدى دانيال احمەتوۆ.

ايتا كەتەيىك، بۇل باعىتتاعى جۇمىستار 2022 جىلعا قاراي كاسىپتىك-تەحنيكالىق ءبىلىم بەرۋ ساپاسىن 24 پايىزعا، كوللەدج تۇلەكتەرىن جۇمىسقا ورنالاستىرۋ ۇلەسىن 16 پايىزعا ارتتىرۋعا مۇمكىندىك بەرەدى.