قازاقستاندىق ينتەرنەت پايدالانۋشىلار بەلگىسىز بىرەۋدىڭ "5G جەلىسىنىڭ سىناقتان وتكىزىلەتىنى جانە وسىعان بايلانىستى تەلە جانە راديوحابار تاراتۋ توقتاتىلاتىنى تۋرالى ايتقان" اۋديوحابارلامانى تاراتۋدا. StopFake سايتى بۇل اقپاراتتىڭ جالعان ەكەنىن حابارلادى.

اۋديوروليكتىڭ اۆتورى قازاقستاندىقتاردى ينتەرنەتتى پايدالانباۋعا ۇندەيدى. ونىڭ پىكىرىنشە، بۇل "دەنساۋلىق ءۇشىن زيان" بولۋى مۇمكىن.

"كەيبىرىنىڭ مۇرنىنان، قۇلاعىنان قان كەتكەن. قىزدار، وسى 5-6 كۇندە كەشكە جۇمىستان كەلگەن سوڭ كىتاپ، جۋرنال وقىساق ەشتەڭە ەتپەيدى. تەلەديدار كورمەڭدەر، تەلەفونعا جاقىنداماڭدار، ەشتەڭەنى قوسپاڭدار، سوندا بالالارىڭنىڭ، نەمەرەلەرىڭنىڭ دەنساۋلىقتارىن ساقتاپ قالاسىڭدار. بۇل شىنايى اقپارات، ناقتى اقپارات، ويتكەنى مەملەكەت ناقتى نە بولاتىنىن ايتپايدى. مەنىڭ ايتقانىمنىڭ بولاتىنى راس" دەلىنگەن اۋديوجازبادا.

"قازتەلەراديو" اق بۇل اقپاراتتى تەرىسكە شىعارىپ، فەيك دەپ تانىدى. ۇلتتىق وپەراتور حابار تاراتۋ ساپاسىن جاقسارتۋ ءۇشىن جوسپارلى الدىن الۋ جۇمىستارىن توقسان سايىن جۇرگىزەتىنىن مالىمدەدى.

"قۇرمەتتى ابونەنتتەر، قازىرگى كەزدە whats app مەسسەندجەرى ارقىلى جەرسەرىكتىك جانە ەفيرلىك تەلەراديوحابار تاراتۋ جەلىلەرىندە جوسپارلى-الدىن الۋ جۇمىستارىن جۇرگىزۋگە قاتىستى "فەيك" اقپارات تاراتىلىپ جاتىر.

دۇربەلەڭگە بەرىلمەۋگە جانە تەك رەسمي اقپاراتقا عانا سەنۋگە ۇندەيمىز.

"قازتەلەراديو" اق توقسان سايىن جەرسەرىكتىك جانە ەفيرلىك جەلىلەردىڭ تەحنيكالىق قۇرالدارىندا سەرۆيستەردى جابا وتىرىپ، جوسپارلى-پروفيلاكتيكالىق جۇمىستار جۇرگىزەدى. بۇل جۇمىستار تەلەراديو حابارلارىن ساپالى تاراتۋدى قامتاماسىز ەتۋ ءۇشىن قاجەت، ال توقسان سايىنعى جوسپارلى-پروفيلاكتيكالىق جۇمىستار سەرۆيستى ۇزاق ۋاقىت وشىرۋگە مۇمكىندىك بەرەدى، سوندىقتان وسى ۋاقىت ىشىندە تەحنيكالىق قۇرالداردى جاڭعىرتۋ بويىنشا قوسىمشا جۇمىستار دا جۇزەگە اسىرىلادى" دەپ جازىلعان وپەراتور سايتىندا.

جوسپارلى-تەحنيكالىق جۇمىستاردىڭ وتكىزىلەتىنى تۋرالى اقپاراتتى اقپارات جانە قوعامدىق دامۋ مينيسترلىگى راستادى.

– ءقازىر جەلىلەردە ءتۇرلى جالعان اقپارات تاراتىلۋدا. ناقتىراق ايتقاندا جوسپارلى الدىن الۋ جۇمىستارى تۋرالى اقپاراتتىق حابارلامالار. كەيبىر اقپاراتتىق حابارلامالار شىندىققا جاناسپايدى. وسى جوسپارلى الدىن الۋ جۇمىستارى تۋرالى اقپاراتتى وسىدان بىرنەشە كۇن بۇرىن قازاقستان رەسپۋبليكاسىنىڭ حابار تاراتۋ سالاسىنداعى ۇلتتىق وپەراتور قازتەلەراديو تاراتقان بولاتىن. وسى اقپاراتقا سايكەس، "قازتەلەراديو" اق توقسان سايىن جەرسەرىكتىك جانە ەفيرلىك جەلىلەردى تەحنيكالىق قۇرالدارىنا سەرۆيستەردى جابا وتىرىپ، جوسپارلى پروفيلاكتيكالىق جۇمىستاردى جۇرگىزەدى. ياعني بۇل جۇمىستار تەلەراديوحابارلارىن ساپالى تاراتۋدى قامتاماسىز ەتۋ ءۇشىن قاجەت جانە توقسان سايىنعى جوسپارلى پروفيلاكتيكالىق جۇمىستار سەرۆيستى ۇزاق ۋاقىت وشىرۋگە مۇمكىندىك بەرەدى. سوندىقتان وسى ۋاقىت ىشىندە تەحنيكالىق قۇرالداردى جاڭعىرتۋ بويىنشا قوسىمشا جۇمىستاردى جۇرگىزەدى، – دەپ مالىمدەدى ق ر اقدم رەسمي وكىلى ماكسيم روجين.

ەسكە سالا كەتەيىك، قازاقستاندا قاساقانا جالعان اقپارات تاراتقان ءۇشىن قىلمىستىق جاۋاپكەرشىلىك قاراستىرىلعان.

– فەيك جانە قاساقانا جالعان اقپارات تاراتۋ زاڭمەن جازالانادى. اقپاراتتى باسقاعا جىبەرمەس بۇرىن ونىڭ رەسمي جانە شىنايى ەكەنىن تەكسەرۋ كەرەك. تەك رەسمي دەرەككوزدەرگە عانا سەنىڭىزدەر، – دەپ تۇيىندەدى روجين.