«قۇرمەتتى دوستار! پارتيا ليدەرى نۇرسۇلتان نازاربايەۆتىڭ تاپسىرماسى بويىنشا رەسپۋبليكالىق پارتياىشىلىك ىرىكتەۋ – پرايمەريز وتكىزىپ جاتقانىمىزدى جاقسى بىلەسىزدەر.

بۇگىنگى كۇنى وعان قاتىسۋعا 7670 ازامات ءوتىنىش بەردى. ولاردىڭ 34% - ايەلدەر، 24،1% - 35 جاسقا دەيىنگى جاستار. باستاۋىش پارتيا ۇيىمدارى 2631 ادامدى ۇسىنسا، ال 5039 كانديدات – ءوزىن-وزى ۇسىنعاندار.

تىركەۋ وسى اپتانىڭ سوڭىنا دەيىن جالعاسادى. 7 قىركۇيەكتەن باستاپ ۇمىتكەرلەردىڭ ۇگىت جۇمىسى باستالادى، ونىڭ ىشىندە جاريا پىكىرسايىستار – 14-30 قىركۇيەك ارالىعىندا بولادى.

سونىمەن بىرگە قازىرگى ەپيدەميولوگيالىق احۋال بەلگىلى ءبىر شەكتەۋلەر تۋدىرىپ، پرايمەريز وتكىزۋ ءۇشىن ءتيىستى جاعداي جاساۋدى تالاپ ەتۋدە.

ءبارىمىز ءۇشىن ەڭ الدىمەن ازاماتتارىمىزدىڭ دەنساۋلىعى مەن اماندىعى ماڭىزدى.

وسىعان بايلانىستى باس مەملەكەتتىك سانيتارلىق دارىگەر ايجان ەسماعامبەتوۆامەن بىرلەسىپ پرايمەريز وتكىزۋ كەزىندە ارنايى سانيتارلىق-ەپيدەميولوگيالىق تالاپتار ەنگىزۋ تۋرالى قاۋلى قابىلدادىق. ونى بارلىق ۇيىمداستىرۋ كوميتەتتەرى، كانديداتتار جانە داۋىس بەرۋشىلەر باسشىلىققا الۋى ءتيىس.

سونىمەن، پارتياىشىلىك ىرىكتەۋگە قاتىسۋشىلار ماسكالاردى، قولعاپتاردى، زارارسىزداندىرۋ قۇرالدارىن پايدالانۋعا، كەمىندە 2 مەتر الەۋمەتتىك ارالىقتى ساقتاۋعا، قول الىسىپ امانداسپاۋعا جانە باسقا دا ساقتىق شارالارىن ۇستانۋعا مىندەتتى.

بارلىق ىسكە قوسىلعان ءۇي-جايلاردا سانيتايزەرلەردىڭ، بايلانىسسىز تەرمومەترلەردىڭ قاجەتتى مولشەرى قامتاماسىز ەتىلەدى، زارارسىزداندىرعىش قۇرالدار پايدالانىلا وتىرىپ، تۇراقتى تۇردە ىلعالدى تازالاۋ جۇرگىزىلەدى جانە كەمىندە تاۋلىگىنە 2 رەت جەلدەتىلەدى.

ۇگىت بارىسىندا فلاەرلار مەن بۋكلەتتەردى تەك ماسكا تاعىپ، قولعاپ كيىپ قانا تاراتۋ قاجەت.

كانديداتتاردىڭ پارتيا مۇشەلەرىمەن كەزدەسۋلەرى الەۋمەتتىك جەلىلەردە بەينەكونفەرەنسيا ارقىلى، اشىق الاڭداردا نەمەسە جەلدەتىلەتىن ءۇي-جايلاردا قاتىسۋشىلار اراسىنداعى قاشىقتىقتى ساقتاپ، ماسكا تاعا وتىرىپ، ءوتۋى مۇمكىن.

كانديداتتاردىڭ جاريا دەباتتارى 1224 وبەكتىدە ونلاين-فورماتتا جانە الەۋمەتتىك ارالىقتى ساقتاي وتىرىپ وتكىزىلۋى ءتيىس.

2545 داۋىس بەرۋ ۋچاسكەسىندە كابينالار مەن ۋرنالار، سونداي-اق بيۋللەتەندەردى بەرۋ ورىندارى ءبىر بىرىنەن كەمىندە ەكى مەتر اراقاشىقتىقتا بولۋى ءتيىس.

جالپى، ءبىز ەنگىزگەن «پرايمەريز» اقپاراتتىق جۇيەسى پارتياىشىلىك ىرىكتەۋدىڭ بارلىق كەزەڭىن وتكىزۋگە مۇمكىندىك بەرەدى، ونىڭ ىشىندە تىركەۋدى، ۇگىتتى جانە داۋىس بەرۋدى ونلاين رەجيمدى وتكىزۋگە بولادى. جۇيە قولدانۋعا جەڭىل، سايلاۋشىنىڭ «تاڭداۋ قۇپياسىن»، سونداي-اق سىرتتان ارالاسۋدان قورعاۋدى قامتاماسىز ەتەدى. سوندىقتان ءىس-شارالاردىڭ باسىم بولىگىن ءبىز وسى مۇمكىندىكتەردى پايدالانا وتىرىپ وتكىزۋگە تىرىسامىز»، - دەپ جازدى باۋىرجان بايبەك.

پرايمەريزدىڭ ۇيىمداستىرۋعا قاتىستى تۇستارى جايلى primaries.kz جانە nurotan.kz سايتتارىنان تولىعىراق تانىسا الاسىز. پارتيانىڭ باسپا ءسوز قىزمەتى تاراتقان اقپاراتقا سايكەس، پرايمەريز وتكىزۋ، سونداي-اق كانديداتتارعا ۇيىمداستىرۋشىلىق جانە قۇقىقتىق قولداۋ ماسەلەلەرى بويىنشا «Nur Otan» پارتياسى 8 (800) 080 4441 ارنايى جەدەل جەلىنى ىسكە قوستى.