ق ر پرەزيدەنتى نۇرسۇلتان ءابىش ۇلى ەل ەكونوميكاسىندا مۇنداي جاعدايدىڭ بۇرىن بولماعانىن ايتىپ، ۇلكەن ءقاۋىپ ءتونىپ تۇرعانىن ەسكەرتتى. بۇل تۋرالى «قامشى» پورتالى كتك ارناسىنا سىلتەمە جاساي وتىرىپ حابارلايدى.
اقوردادا جيىن وتكىزگەن قازاقستان پرەزيدەنتى كەزدەسۋ كەزىندە الەمدىك نارىقتاعى جاعدايدىڭ ناشارلاۋى جاعدايىندا قازاقستاندىق ەكونوميكانىڭ ءوسۋىن قامتاماسىز ەتۋ بويىنشا باعىتتاردى تالقىلاعان. مەملەكەت باسشىسى قازاقستان ەكونوميكاسىنا ۇزاق مەرزىمدە اسەر ەتۋى مۇمكىن جاعىمسىز فاكتورلاردى اتادى.
1. مۇناي مەن مەتال باعاسىنىڭ تومەندەۋى الداعى بەس جىل كولەمىندە ساقتالۋى مۇمكىن.
2. دامۋشى ەلدەردىڭ ينۆەستيسيا مەن كاپيتالعا قولجەتىمدىلىگى شەكتەلۋى مۇمكىن.
3. قازاقستاندىق ءونىمنىڭ ساۋداسى نەگىزگى سەرىكتەستەرىمىزدىڭ، رەسەي مەن قىتايدىڭ تاراپىنان بولىپ جاتقان سۇرانىسىنىڭ السىرەۋىنەن نارىق قىسىمعا ۇشىراپ جاتىر.
«پرەزيدەنت قالىپتاسقان جاعدايدىڭ مەملەكەتتەن بيۋدجەتتىك جانە مونەتارلىق ساياساتتى تەڭدەستىرۋدى قامتاماسىز ەتۋ بويىنشا الدىن الۋدىڭ ءتيىمدى شارالارىن وتكىزۋدى، سونىمەن قاتار، ەكونوميكالىق دامۋدى جۇزەگە اسىرۋ ماقساتىندا جاھاندىق قيىندىقتارعا قارسى ءىس-قيمىلدى تالاپ ەتەتىنىن ايتتى»،-دەپ جازادى tengrinews.kz.
مەملەكەت باسشىسى جاڭا ەكونوميكالىق جاعدايدا مۇنايدىڭ باررەلى ءۇشىن 30-40 دوللار باعاسىنا بەيىمدەلۋدىڭ قاجەتتىلىگىن اتاپ ءوتتى.
پرەزيدەنت ءسوزىن پايىمداي كەلە اڭعاراتىنىمىز، الداعى ۋاقىتتا قارجىلىق قيىندىق قازاقستاندى قوس بۇيىردەن قىسقالى تۇر. سونداي-اق، الەمدىك مۇناي باعاسىنىڭ كۇرت تومەندەۋىنە بايلانىستى بيۋدجەتتىڭ ءتۇسىمى دە جارتى تريلليون تەڭگەگە ازايىپ وتىر.
نۇرسۇلتان نازاربايەۆ 2018 جىلعا دەيىن رەسپۋبليكالىق بيۋدجەت دەفيسيتىن 1 پايىزعا دەيىن ءتۇسىرۋدى تاپسىردى. ول دەفيسيتتى قارجىلاندىرۋدىڭ ىشكى رەزەرۆتەر ارقىلى جۇزەگە اسىرىلۋى كەرەكتىگىن اتاپ ءوتتى.
ول ەكونوميكانىڭ باسەكەلەستىك ارتىقشىلىقتارى بار نەگىزگى سالالارىنا قولداۋ بىلدىرۋگە باسىمدىقتىڭ بەرىلۋى كەرەكتىگىن ايتتى.
"قويىلعان مىندەتتەردى جۇزەگە اسىرۋدىڭ ماڭىزدى تۇسى - دامۋدىڭ وسىعان ۇقساس جولىن ءجۇرىپ وتكەن ءارى ەكونوميكالىق جاعدايى ۇقساس ەلدەردىڭ تاجىريبەسى. بۇل - اۆستراليا مەن كانادانىڭ سوڭعى 30 جىلداعى تاجىريبەسى. تاۋار جەتكىزۋدىڭ جاھاندىق تىزىلۋىنە قازاقستاننىڭ الداعى ونجىلدىقتاردا ۇلكەن مۇمكىندىكتەرى بار"، - دەدى مەملەكەت باسشىسى.
نۇرزات توعجان
پىكىر قالدىرۋ