20 جىلدان استام ۋاقىت بويى اتالمىش كومپانيا ءسۇت جانە ءسۇت ونىمدەرىن وندىرۋمەن اينالىسادى. 80 ءتۇرلى تاۋار وندىرەدى.
ءىس ساپار بارىسىندا اسقار مامين شقو اكىمى دانيال احمەتوۆپەن بىرگە «ۆوستوك-مولوكو» كاسىپورنىنا بارىپ قايتتى.
قازاقستانداعى ءسۇت ءوندىرۋ سالاسىنىڭ جوعارى پوتەنسيالىن ەسكەرگەن ايماق باسشىسى وسىدان بىرنەشە جىل بۇرىن وسى كاسىپتى دامىتۋ تۋرالى ۇسىنىس بىلدىرگەن بولاتىن.
«ۆوستوك-مولوكو» جشس-نىڭ باس ديرەكتورى سەيلجان سايلاۋبايەۆتىڭ مالىمەتىنشە، ەلىمىزدەگى ءسۇت جەتىسپەۋشىلىگى ميلليون توننانى قۇرايدى. ال مۇنىڭ الدىن الۋ ءۇشىن كەم دەگەندە 500-600 فەرما اشۋ كەرەك. قۋانىشتىسى سول، بۇگىندە ىسكە قوسىلعان فەرمالاردىڭ شارۋاسى وڭعا باسۋدا. شارۋالار كووپەراتيۆتەر قۇرىپ، مەملەكەت تاراپىنان كورسەتىلەتىن قولداۋلاردى ءتيىمدى پايدالانىپ، مال باسىن كوبەيتۋدە. ءسۇت وڭدەۋ زاۋىتى باسشىسىنىڭ ايتۋىنشا، بۇگىنگى كۇنى ەلىمىزدەگى سۇرانىستى قامتاماسىز ەتىپ قانا قويماي، ەكونوميكانى ىلگەرىلەتىپ، ونىمدەردى ەكسپورتقا شىعارۋ جاعىن دا قاراستىرۋ كەرەك.
بۇگىنگى كۇنى زاۋىت جىلىنا 100 توننا ءسۇت وڭدەيدى. الايدا كاسىپورىننىڭ قۋاتتىلىعى ەكى ەسە كولەمدەگى ءسۇت وڭدەۋگە جەتەدى. ءسۇت قابىلداۋ پۋنكتتەرىنىڭ جۇمىسى جەمىسىن بەرۋدە. قازىرگى كۇنى اۋىل تۇرعىندارى ءىرى قارا مال وسىرۋگە كوڭىل بولۋدە.
ايتا كەتەيىك، «ۆوستوك-مولوكو» ج ش س وندىرىستىك پروسەسستەردى مودەرنيزاسيالاۋعا اۋقىمدى قارجىلىق ينۆەستيسيا قۇيادى. باستى ماقسات – جاڭا تەحنولوگيالاردى ەنگىزۋ. كاسىپورىن جىل سايىن ساپالى ءونىم ءوندىرۋ بايقاۋلارىنا قاتىسىپ، «ىرىمشىكتىڭ ساپالى تۇرلەرى – 2014ج» باس جۇلدەسىن، «مايدىڭ ساپالى تۇرلەرى» كۇمىس مەدالىن، «پارىز 2008» يەلەندى. سونىمەن قاتار 10 جىل بويى رەسەيدە ۇيىمداستىرىلىپ كەلە جاتقان بايقاۋدىڭ باس جۇلدەسىن قولدان بەرگەن ەمەس.
