كونستيتۋسيانىڭ زامانمەن، قوعاممەن بىرگە دامىپ وتىرۋى زاڭدىلىق. بۇل تۋرالى ۇلتتىق قوعامدىق سەنىم كەڭەسىنىڭ مۇشەسى، ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات ءباشىموۆ ايتتى.

ونىڭ ايتۋىنشا، قانداي جاعدايدا دا ول ءۇشىن ەڭ الدىمەن، ادام ءومىرى مەن بوستاندىعى باستى قۇندىلىق بولىپ قالا بەرەدى.

"ەۋروپا وداعى، ەۋروپا كەڭەسى مەن بۇۇ حالىقارالىق ساراپشىلارى ءبىزدىڭ كونستيتۋسيانىڭ نورمالارى ادام قۇقىقتارى تۋرالى بارلىق شارتتارعا سايكەس كەلەدى دەپ باعا بەرگەن بولاتىن. قازىرگى كۇنى قوعامدا ورىن الىپ جاتقانداي جاعدايلارعا قاراپ، اتا زاڭىمىزدىڭ «قازاقستان رەسپۋبليكاسى ءوزىن دەموكراتيالىق، زايىرلى، قۇقىقتىق جانە الەۋمەتتىك مەملەكەت رەتىندە ورنىقتىرادى، ونىڭ ەڭ قىمبات قازىناسى - ادام جانە ادامنىڭ ءومىرى، قۇقىقتارى مەن بوستاندىقتارى.مەملەكەت ادامنىڭ ءومىر ءسۇرۋى مەن دەنساۋلىعىنا قولايلى اينالاداعى ورتانى قورعاۋدى ماقسات ەتىپ قويادى»، دەپ جازىلعان 1-بابى مەن «ادامداردىڭ ءومىرى مەن دەنساۋلىعىنا قاتەر توندىرەتىن دەرەكتەر مەن جاعداياتتاردى لاۋازىمدى ادامداردىڭ جاسىرۋى زاڭعا سايكەس جاۋاپكەرشىلىككە اكەپ سوعادى» ،- دەلىنگەن 31-بابى وتە وزەكتى بولىپ وتىرعانىن جانە مەملەكەت وسى تۇجىرىمدامانى باسشىلىققا العانان بايقاۋعا بولادى"، - دەيدى مارات ءباشىموۆ.

سونداي-اق زاڭگەر اتا زاڭىمىزدىڭ قالىپتاسۋىنا ەلباسى نۇرسۇلتان نازاربايەۆتىڭ قوسقان ۇلەسى زور ەكەنىن دە اتاپ ءوتتى. ول جۇمىس توبىنىڭ الدىنا الدەكىمنىڭ كونستيتۋسياسىن قۇر كوشىرە سالماي، كەرىسىنشە باسقا ەلدەردىڭ تاجىريبەسىن تالداۋ نەگىزىندە قازاق ەلىنىڭ تالاپتارىنا بارىنشا جاۋاپ بەرە الاتىن نەگىزگى زاڭ جوباسىن دايىنداۋ كەرەكتىگىن ۇنەمى ەل ەسىنە سالىپ وتىرعان.

"كونستيتۋسيانىڭ بارلىق ەرەجەلەرىنەن ءبىزدىڭ ەرەكشە قازاقستاندىق قولتاڭبامىز، ءبىزدىڭ حالقىمىزدىڭ ورەسى مەن داستۇرلەرىنە جانە بولاشاقتاعى پەرسپەكتيۆاسىنا سايكەسەتىن ءوز بولمىسىمىز بايقالادى. كونستيتۋسيانىڭ سوڭعى ماتىنىنە قوعامدىق كەلىسىم، ساياسي تۇراقتىلىق، بۇكىل حالىقتىڭ يگىلىگى جولىنداعى ەكونوميكالىق دامۋ، قازاقستاندىق پاتريوتيزم، مەملەكەتتىك ومىردەگى بارىنشا ماڭىزدى ماسەلەلەردى دەموكراتيالىق تاسىلدەرمەن شەشۋ سياقتى قازاقستان رەسپۋبليكاسىنىڭ بازالىق پرينسيپتەرى قوسىلدى"، - دەيدى ول.