كونستيتۋسيا مەملەكەتتىك بيلىك پەن مەملەكەتتىك باسقارۋ جۇيەسىن جان-جاقتى نىعايتتى. ەل ەكونوميكاسىن تۇبەگەيلى رەفورمالاۋ مەن ونى تەرەڭ داعدارىستان شىعارۋدىڭ ماسەلەلەرىن شەشتى. بۇل تۋرالى ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ زاڭ فاكۋلتەتى دەكانىنىڭ عىلىم جونىندەگى ورىنباسارى PhD دوكتورى قانات ءابدىلوۆ تىلدەسۋ بارىسىندا ايتتى.
ونىڭ ايتۋىنشا، اتا زاڭ ەلىمىزدىڭ سىندارلى سىرتقى ساياسات جۇرگىزۋىنە ىقپال جاساپ، ىشكى ساياسي تۇراقتىلىقتى قامتاماسىز ەتتى.
"وركەنيەتتى الەمدە ازاماتتاردىڭ جالپىعا تانىلعان قۇقىقتارى مەن بوستاندىقتارىن ورنىقتىرىپ، دەموكراتيالىق ينستيتۋتتاردى دامىتتى. سونىمەن، كونستيتۋسيامىز ءتيىمدى مەملەكەتتىك قۇقىقتىق جۇيەمىزدىڭ ورنىعۋىنا، نارىقتىق ەكونوميكامىزدىڭ قالىپتاسۋىنا، حالقىمىزدىڭ ءال-اۋقاتىن كوتەرۋگە، قازاقستانىمىزدىڭ ساياسي، ەكونوميكالىق، الەۋمەتتىك دامۋىنىڭ باستاۋى بولدى. كونستيتۋسيالىق پرينسيپتەر ەلىمىزدە دەموكراتيالىق جانە ساياسي جۇيەنىڭ قالىپتاسۋىنا، ادام قۇقىعى مەن بوستاندىعىنىڭ قورعالۋىنا كەپىلدىك بەردى. كونستيتۋسيامىز - قازاقستاندىقتاردىڭ بويىندا ازاماتتىق جانە قازاقستاندىق پاتريوتيزم سەزىمدەرىن تاربيەلەۋدە، حالىقتىڭ يدەيالىق-مادەني دامۋىنىڭ نەگىزىن قۇراۋشى، قوعامدىق ساياسي ۇردىستەرگە ءاربىر ادامنىڭ قاتىستىلىعىن پاش ەتەتىن ۇلكەن ساياسي جانە قۇقىقتىق قۇجات. تاۋەلسىزدىگىمىزدىڭ تۇعىرىن نىعايتىپ، ەلدىگىمىزدىڭ ەڭسەلى بولۋىن زاڭدىق تۇرعىدان قامتاماسىز ەتەتىن باستى قۇجاتتىڭ قابىلدانۋىنىڭ بۇل بەلەسى رۋحاني توپتاسۋىمىزعا، العى كۇندەرگە سەنىممەن ۇمتىلۋىمىزعا دا جىگەر بەرە تۇسەتىنى ءسوزسىز"،-دەيدى PhD دوكتورى.
كونستيتۋسيا كۇنى - ءبىزدىڭ مەملەكەتىمىزدىڭ، حالقىمىزدىڭ ەڭ نەگىزگى مەرەكەلەرىنىڭ ءبىرى. عاسىرلار توعىسىندا الەمدىك وركەنيەتتىڭ شىڭىنا ۇمتىلعان قازاقستان حالقى تاريحى دا تاعدىرلى شەشىم قابىلداپ، جاسامپاز جاڭا داۋىرگە قادام باستى. اتا زاڭ ءبىزدىڭ بۇكىل جارقىن ىستەرىمىزدىڭ قاينار باستاۋىنا اينالدى.
"كونستيتۋسيا مىزعىماس مەملەكەتىمىزدىڭ التىن قازىعى، بىرلىگى مەن ىنتىماعى جاراسقان ەلدىگىمىزدىڭ بۇلجىماس باعدارى، كەمەل كەلەشەگىمىزدىڭ كەپىلى! كونستيتۋسيانى باسشىلىققا الا وتىرىپ، ءبىز تاۋەلسىزدىگىمىز بەن مەملەكەتىمىزدى نىعايتۋ جولىندا عاسىرلىق ءمانى بار اۋقىمدى اتقاردىق. ءبىز از عانا 20 جىل ىشىندە داۋلەتى تاسىعان قۋاتتى دا الەۋمەتتى ەلگە اينالدىق. كەڭ بايتاق جەرىمىزدىڭ شەكاراسىن شەگەلەپ، ىرگەمىزدى مىزعىماستاي ەتىپ بەكىتتىك. تاعدىر توعىستىرعان، تاريح تابىستىرعان ءتۇرلى ۇلت وكىلدەرى كونستيتۋسيا قاعيداتتارى توڭىرەگىنە توپتاستى. ەۋرازيانىڭ جۇرەگىنە ورنالاسقان ەلوردامىز الەمگە رۋحانياتتىڭ ءىرى ورتالىعى، ساياساتتىڭ ىرگەلى ورداسى رەتىندە تانىلدى"،-دەيدى ول.
سونىمەن قاتار، ول ەلىمىزدىڭ ءاربىر ازاماتى ءوزىن تەڭ سەزىنەتىن، تاتۋلىعى جاراسقان قازاق ەلىنىڭ، قازاقستان حالقىنىڭ قارىمدى ىستەرى بۇگىندە الەم جۇرتشىلىعى ءۇشىن ۇلگى-ونەگەگە اينالعانىن جەتكىزدى.
"مۇنىڭ ءوزى ءبىزدىڭ اتا زاڭىمىزدا بۇكىل - ادامزاتتىق قۇندىلىقتار مەن وركەنيەتتىك يگىلىكتەردىڭ بارلىعى قامتىلعانىن ايعاقتايدى. كونستيتۋسيا كۇنىنىڭ ەلدىك پەن ەگەمەندىكتىڭ، ىرگەسى بەرىك مەملەكەتتىلىكتىڭ تەمىر قازىعىنا اينالعان اسەم استانامىزدىڭ تورىندە تويلانۋىنىڭ دا وزىندىك ءمانى زور. قازاق مەملەكەتىنىڭ وسىپ-وركەندەپ نىعايۋىنا، دامۋىنا نەگىز بولعان اتا زاڭىمىز – قازاق ەلىنىڭ ماڭگىلىك ەل ەكەندىگىن دالەلدەيدى. كونستيتۋسيا ەلىمىزدىڭ - ماڭگىلىك زاڭى ەكەڭدىگىن قازاق ەلى مويىندايدى. ءوز وتانىن ءسۇيىپ، ماقتان تۇتىپ، ونىڭ زاڭدارىنا باعىنۋى - ءاربىر قازاقستان ازاماتىنىڭ ەلىنىڭ الدىنداعى ازاماتتىق بورىشىن ورىنداۋى. كونستيتۋسيا زاڭدارىمەن ءومىر ءسۇرۋ - قازاق ەلىنىڭ جارقىن بولاشاعى. كونستيتۋسيا - قازاقستاننىڭ تۇراقتىلىعى مەن وركەندەۋىنىڭ نەگىزى"،-دەيدى ق. ءابدىلوۆ.
سونداي-اق، ول ەلىمىزدە كەزەڭ-كەزەڭمەن وتكىزىلگەن كونستيتۋسيالىق قايتا قۇرۋلار مەملەكەتتىك قۇرىلىمنىڭ ءتيىمدى دامۋىنا، دەموكراتيالىق قاعيدالارعا سۇيەنىپ ازاماتتىق قوعامنىڭ مۇددەلەرىن قامتاماسىز ەتەتىنىن ايتتى.
"قازىرگى قازاقستاندىق جۇيە بيلىكتىڭ قوعام الدىنداعى جاۋاپكەرشىلىگىن قامتاماسىز ەتۋگە باعىتتالعان. جالپى، كونستيتۋسيالىق رەفورما قازاقستاندى شىنايى دەموكراتيالاندىرۋعا قاراي جاسالعان ناقتى قادامداردىڭ ءبىرى بولدى دەپ نىق سەنىممەن ايتا الامىز"،-دەدى ول.
پىكىر قالدىرۋ