قازاقستان پرەزيدەنتى قاسىم-جومارت توقايەۆ كوروناۆيرۋس ىندەتىنىڭ ەكىنشى كەزەڭىنە دايىندىق ماسەلەلەرى بويىنشا كەڭەستە مەديسينا قىزمەتكەرلەرىنە تيەسىلى قارجى تۋرالى ايتتى، دەپ حابارلادى اقوردا سايتى.
– ىندەتتىڭ ەكىنشى تولقىنى جاعدايىندا نەگىزگى سوققىنى تاعى دا مەديكتەر وزدەرىنە الادى. دارى-دارمەك پەن اپپاراتتار ەمەس، ءدال سولار ءبىزدىڭ نەگىزگى رەسۋرستارىمىز سانالادى. مەديسينا قىزمەتكەرلەرىن قولداۋ قاجەتتىگى ەشكىمگە كۇدىك تۋدىرمايدى. مەنىڭ تاپسىرماممەن ەكىنشى جارتىجىلدىقتا تولەماقىعا 150 ملرد تەڭگەدەن استام قارجى ءبولىندى. دەگەنمەن، تولەماقى مەن ساقتاندىرۋ تولەمىن الۋدا ءالى كۇنگە دەيىن بيۋروكراتيالىق كەدەرگىلەر جاسالىپ، ءتىپتى بۇل ماسەلەمەن پارلامەنت تە اينالىستى. جەرگىلىكتى جەرلەردە تولەماقى بويىنشا "سيفرلارمەن ويىن" جالعاسىپ، ولاردى ءبولۋدىڭ ءالى كۇنگە دەيىن اشىقتىعى جوق. بۇل جول بەرۋگە بولمايتىن احۋال. بۇعان قوسا، باس دارىگەرلەر جۇمىس ۋاقىتىن دارىگەردىڭ پايداسىنا ەمەس تۇزەتۋگە تىرىسادى. مەديسينا قىزمەتكەرلەرى وزدەرىنە تيەسىلى اقشانى ءوتىنىپ سۇراپ الۋعا ءتيىس ەمەس، – دەدى پرەزيدەنت.
سونىمەن قاتار توقايەۆ كوروناۆيرۋستان قايتىس بولعان دارىگەرلەردىڭ وتباسىنا تەكسەرۋ جۇرگىزىلمەستەن تولەماقى بەرىلۋى كەرەكتىگىن ايتتى.
– ءقازىر بۇل جاعدايلار ءتۇرلى كوميسسيادا قارالىپ، وتەماقى تەك 37 عانا وتباسىعا تولەنگەن. مۇلدەم جول بەرۋگە بولمايتىن جاعداي. پوستفاكتۋم ءولىم سەبەبىن انىقتاۋ كوپتەگەن قيىندىقتاردى، ونىڭ ىشىندە ادەپ سيپاتىنداعى قيىندىقتاردى تۋدىرادى. وسىعان وراي ۇكىمەتكە بۇل ماسەلەدە مۇنداي تەكسەرۋلەر جۇرگىزبەستەن قازا تاپقان مەديسينا قىزمەتكەرىنىڭ وتباسىنا تيەسىلى بارلىق تولەماقىنى تولەۋدى تاپسىرامىن، – دەدى قاسىم-جومارت توقايەۆ.
پىكىر قالدىرۋ