باتىس ەلدەرى ەكىنشى دۇنيەجۇزىلىك سوعىستان ءتيىستى ساباق الا المادى. بۇگىندە بۇل ەلدەردەگى مۇسىلماندارعا دەگەن وشپەندىلىك مەملەكەتتىك دەڭگەيدە قولداۋ تاۋىپ وتىر. تۇركيا پرەزيدەنتى رەجەپ تايىپ ەردوعان وسىلاي دەپ مالىمدەدى. بۇل تۋرالى انادولۋ اگەنتتىگى حابارلادى.
– ەۋروپا حالقى كسەنوفوبيالارىمەن كۇرەسۋدىڭ ورنىنا، قاتەلىكتەرىن حالىقتان جاسىرىپ الەك. مۇنىسىمەن ولار تەك وزدەرىنىڭ جاعدايىن ۋشىقتىرىپ جاتىر، – دەدى ەردوعان انكارادا سويلەگەن سوزىندە.
وسى ورايدا فرانسيا پرەزيدەنتى ەممانۋەل ماكروننىڭ مۇسىلماندار مەن يسلامعا قاتىستى ايتقان "وتكىر" پىكىرىن مىسالعا الدى. تۇرىك كوشباسشىسىنىڭ ايتۋىنشا، فرانسيا پرەزيدەنتى راديكاليزممەن كۇرەسۋگە مۇلدەم ۇمتىلمايدى جانە توتاليتارلىق رەجيمنىڭ نەگىزىن قالاۋعا تىرىسادى.
ەردوعان ماكرونعا ءوزى بىلمەيتىن تاقىرىپتارعا قاتىستى مالىمدەمە جاسار الدىندا اباي بولۋى كەرەكتىگىن ايتتى.
كەيبىر اشىق اقپارات كوزدەرىنە سۇيەنسەك، ماكرون بارلىق مۇسىلمانداردى ءوز ەلىنەن قۋىپ جىبەرەتىنىن مالىمدەگەن كورىنەدى.
– مەن سپورتتىق كلۋبتاردى راديكالدى ءيسلاميزمدى ۇيرەتەتىن ورىنعا اينالماس ءۇشىن ولاردى مۇقيات باقىلاپ وتىرۋدى جوسپارلاپ وتىرمىن. يمامدارعا ۆيزا بەرۋ توقتاتىلۋى كەرەك. ەندى مەشىتتەردى مەن قارجىلاندىرمايمىن، – دەدى ماكرون BBC ارناسىنا بەرگەن سۇحباتتا.
پىكىر قالدىرۋ