2 قاراشا تۇندە بەلگىسىز ادامدار اۆستريا استاناسى ۆەنانىڭ ورتالىعىندا شابۋىل جاساماق بولىپ، وق اتتى. سالدارىنان ءبىر ادام وقيعا ورنىندا كوز جۇمىپ، ءبىر جابىرلەنۋشى اۋرۋحانادا قايتىس بولدى جانە 15 ادام جاراقات الدى. شابۋىلداۋشىنىڭ ءبىرى سوندا مەرت بولسا، قالعاندارى قاشىپ كەتكەن. بۇل تۋرالى ria.ru سايتى حابارلادى.

قىلمىسكەرلەردىڭ ناقتى سانى مەن جەكە قۇرامى ازىرگە بەلگىسىز. بيلىك ەگجەي-تەگجەيىن جاريا ەتۋدەن باس تارتتى، ويتكەنى ولاردى ىزدەۋ وپەراسياسى جالعاسىپ جاتىر. ۆەنا تۇرعىندارىنا ۇيدە بولۋعا بۇيرىق بەرىلدى. اۆستريا كانسلەرى سەباستيان كۋرس وپەراسيا سوزىلاتىنىن ايتىپ، ازاماتتاردى كوشەگە شىقپاس بۇرىن تاڭەرتەڭ سوڭعى جاڭالىقتاردى وقۋعا شاقىردى. جالپى العاندا، پوليسيا مەن ىشكى ىستەر مينيسترلىگى شابۋىلداردىڭ التى ورنى تۋرالى حابارلادى. 

وقيعادان ەكى ساعات وتكەننەن كەيىن-اق اۆستريانىڭ ىشكى ىستەر ءمينيسترى كارل نەحاممەر وقيعانى تەرروريستىك اكت دەپ اتادى. ول ۆەنادا ۇلكەن ارنايى وپەراسيا جۇرگىزىلىپ جاتقانىن ايتتى.

دۇيسەنبى كەشكىسىن اۆستريا استاناسىنىڭ ورتالىعىندا ءبىرقاتار شابۋىلدار بولدى. بىرىنشىدەن، شامامەن 20.00-دە اتىس سايتەنشتياتەنگاسسە كوشەسىندە بولعان. بۇدان الىس ەمەس جەردە سيناگوگا بار، سوندىقتان العاشقى حابارلامالاردا بۇل شابۋىلداۋشىلاردىڭ نىسانى بولعانى ايتىلعان، دەگەنمەن اتالمىش اقپارات ءالى سەنىمدى تۇردە انىقتالمادى. ەكسترەميستەر بەلسەندىلىگىنە مونيتورينگ جاسايتىن "SITE Intelligence Group" امەريكالىق اگەنتتىكتىڭ مالىمەتىنشە، ۆەناداعى وسى وقيعاعا جيحادشىلاردىڭ قاتىسى بار. 

جاقىندا فرانسيادا دا تەرراكت بولعان ەدى. ەل پرەزيدەنتى ەممانۋەل ماكرون ۆەناداعى اتىس تۋرالى جاڭالىقتارعا قاتىستى twitter پاراقشاسىندا پىكىر بىلدىرگەن.

–  ءبىز، فرانسۋزدار، ۆەناداعى شابۋىلدان كەيىن اۆستريالىقتاردىڭ كۇيزەلىسى مەن قايعىسىنا ورتاقتاسامىز. فرانسيادان كەيىن دوستاس ەلگە (فرانسيا) شابۋىل جاسالدى. بۇل – ءبىزدىڭ ەۋروپا. دۇشپاندار كىممەن الىسىپ جاتقانىن ءبىلۋى كەرەك. ءبىز مويىمايمىز جانە ەشتەڭەگە جول بەرمەيمىز، – دەپ جازدى ماكرون.