الماتى وبلىسىندا تاعى دا قونىس توي تويلاندى. تۇرعىندارعا تاۋەلسىزدىك كۇنى قارساڭىندا 120 ءۇيدىڭ كىلتى ۇلەستىرىلدى. قاراشانىڭ قۋانىشىمەن بولىسۋگە وبلىس اكىمىنىڭ ءبىرىنشى ورىنباسارى لياززات تۇرلاشيەۆ پەن قالا اكىمى عالىمجان ءابدىرايىموۆ ارنايى كەلدى.
كوتتەدج قالاشىعىنىڭ بەكىتىلگەن ەگجەي-تەگجەيلى جوسپارلاۋ جوباسى بويىنشا جالپى اۋدانى 56،6 مىڭ شارشى مەتر، قۇنى 8،5 ملرد.تەڭگە بولاتىن 620 جەكە تۇرعىن ءۇي قۇرىلىسى قاراستىرىلعان. بۇگىنگە دەيىن اۋماعى 19،5 مىڭ شارشى مەتردى قۇرايتىن 228 كوتتەدجگە بۇقارا تۇراقتاندى. مۇنىمەن ءوڭىر حالقىن باسپانامەن قامتۋ ءىسى تولاستاپ قالمادى. ەلىمىزدىڭ باستى مەرەكەسىنە وراي، اۋدانى 12،3 مىڭ شارشى مەتر بولاتىن 120 ءۇي قولدانىسقا بەرىلدى. اتالعان نىساندى سالۋعا 887،0 ملن.تەڭگە قارجى جۇمسالعان. ەل يگىلىگىنە بەرىلگەن بۇل ۇيلەر 12 بولىككە بولىنگەن، ءار بولىمدە 4 ءۇي جاپسارلاسا سالىنعان. بۇل ءوڭىر باسشىلىعىنىڭ تۇرعىندارعا دەگەن قامقورلىعى.
«قۇرمەتتى تالدىقورعاندىقتار، قىمباتتى قوناقتار، ۇلى مەرەكەمىز تاۋىلسىزدىك مەيرامى قۇتتى بولسىن. ەلباسىنىڭ باستاماسىمەن، پرەزيدەنتىمىز قاسىم-جومارت كەمەل ۇلىنىڭ قولداۋىمەن ىسكە اسىرىلعان «نۇرلى جەر» باعدارلاماسى ارقىلى حالىق باسپانالى بولىپ جاتىر. بۇل سونىڭ ناتيجەسى. ەكى جىلدا وبلىستا كوپ وزگەرىس بولىپ، تۇرعىن ۇيلەردىڭ قۇرىلىسى قارقىندى ءجۇرىپ جاتىر. ەكى جىل الدى سالىنعان ۇيلەردىڭ اۋدانى 79 مىڭ شارشى مەتر بولسا، بيىل ول كورسەتكىش 131 مىڭعا جەتىپ وتىر. كەلەر جىلى 211 مىڭ شارشى مەتردەن اسادى دەگەن ماقساتىمىز بار. ۇيلەرىڭىز جانعا تولسىن، قۋانىشتارىڭىز ۇزاعىنان بولسىن»، - دەدى قۇتتىقتاۋ سوزىندە وبلىس اكىمىنىڭ ءبىرىنشى ورىنباسارى لياززات تۇرلاشيەۆ.
جاڭا قونىسقا تابيعي گاز كىرگىزىلگەن. سونداي-اق، سۋ قۇبىرى ورناتىلىپ، كارىز جۇيەسى تارتىلعان. كوپشىلىككە پايدالانۋعا بەرىلگەن باسپانانىڭ قۇرىلىسىن «تەحنوسناب 2002» ج ش س جۇرگىزگەن. ءدال وسى كۇنى قۇتتى شاڭىراعىنا قول جەتكىزگەندەردىڭ قاتارىندا مۇمكىندىگى شەكتەۋلى جاندار مەن ولارعا قاراۋشى ازاماتتار، مەديسينا قىزمەتكەرلەرى، زەينەتكەرلەر مەن تۇرعىن ءۇي قۇرلىس جيناق بانكنىڭ سالىمشىلارى جانە تولىق ەمەس وتباسىلار دا بار. ۇلىق مەيرامنىڭ قارساڭىندا جاڭا ۇيگە قونىستانۋشىلاردىڭ ءبىرى اق حالاتتى ابزال جان، ەلدوس سمايىلوۆ.
«مەن وبلىستىق ونكولوگيالىق ديسپانسەرىندە قىزمەت ەتەمىن. ماماندىعىم دارىگەر-حيرۋرگ. سەمەي قالاسىنان جۇمىس بابىمەن ناۋرىز ايلارىندا اۋىسىپ كەلدىم. بۇگىن ءبىز ءۇشىن وتە ەرەكشە كۇن. تاۋەلسىزدىك كۇنىنە وراي ءۇيلى بولىپ جاتىرمىن. پاندەميا ءورشىپ تۇرعان ساتتە كۇن-تۇن دەمەي جۇمىس جاسادىق. سول كەزدەگى ەڭبەك اقتالدى دەگەن وسى شىعار. وسىنداي جاعداي جاساپ وتىرعان ەلباسىنا، پرەزيدەنتىمىزگە، وبلىس باسشىسى اماندىق عابباسۇلىنا مىڭ العىس. ەڭبەگىمىزدى ەلەپ شاڭعىراعىمىزدىڭ كىلتىن تابىستاپ جاتىر. ءوزىمنىڭ 4 بالام بار. سونى ەسكەرىپ مەملەكەت تاراپىنان تەگىن ءۇي بەرىپ وتىر. ءبىزدىڭ ۇجىمنان 5 ادامعا كوتتەدج قالاشىعىندا تۇرۋ بۇيىرىپتى، سولاردىڭ ءبىرى ءوزىم بولعانىما قۋانىشتىمىن»،-دەيدى دارىگەر-حيرۋرگ ەلدوس ەرشات ۇلى.
الماتى وبلىسىندا مەملەكەتتىڭ ارقاسىندا ۇيگە قولى جەتكەندەر تەك جان كەشتى ماماندىق يەلەرى عانا ەمەس، تولىق ەمەس وتباسىنىڭ وكىلدەرى دە بار. ءوڭىر وركەندەسىن دەسە ەلدىڭ جاعدايى جاقسارۋى ءتيىس دەگەن ۇستانىمدى نازارعا العان جەتىسۋ جەرىنىڭ باسشىلىعى مۇنداي ازاماتشالاردى دا ءوز قامقورلىقتارىنا الىپ كەلەدى.
بۇل قاتاردان قالا تۇرعىنى شولپان مۇحامەدجانوۆانى دا كورۋگە بولادى. «بۇگىن اق تۇيەنىڭ قارنى جارىلعان كۇن. كوپتەن كۇتكەن كەزەگىم كەلدى. جالعىز باستى انامىن. كوزىمنىڭ اعى مەن قاراسى بولعان قىزىمدى ءوزىم جەتكىزدىم. قانشا قيىندىق بولسا دا جاقسىلىقتان كۇدەرىمدى ۇزبەدىم. بۇگىن سول ءۇمىتىم اقتالدى. ەلىنىڭ ەرتەڭى مەن جاي-كۇيىن ويلاعان مەملەكەتىمىزگە راحمەت»، - دەدى ءوز سوزىندە.
الداعى ۋاقىتتا دا جاڭا قونىستىڭ كىلتى تابىستالادى. ماسەلەن، اعىمداعى جىلدىڭ 30 جەلتوقسانىنا جالپى اۋدانى 12،2 مىڭ شارشى مەتر 133 ءۇيدى پايدالانۋعا بەرۋ جوسپارلانعان. نەگىزىندە بيىل اۋماعى 24،8 مىڭ شارشى مەتر بولاتىن 253 كوتتەدجدىڭ قۇرىلىسى جۇرگىزىلۋدە. 2021 جىلى كولەمى 12،6 مىڭ شارشى مەتر 139 كوتتەدجدى پايدالانۋعا بەرۋ كوزدەلگەن. ونىڭ ىشىندە بيۋدجەت قاراجاتى ەسەبىنەن جالپى اۋدانى 9،0 مىڭ شارشى مەتر 96 كوتتەدج ءۇي جەكە ينۆەستيسيالار ەسەبىنەن 3،6 مىڭ شارشى مەتر 43 كوتتەدج ءوز يەسىن تابادى دەپ كۇتىلۋدە.
پىكىر قالدىرۋ