رەسەيدىڭ تومسك وبلىسى كاراگاسوك اۋدانىندا ماس كۇيدەگى ايەل 12 جاستاعى ۇلىن سوققىعا جىققان. اتالعان وقيعانى ايەلدىڭ قۇربىسى ۆيدەوعا ءتۇسىرىپ، الەۋمەتتىك جەلىدە جاريالاعان. 

كاراگاسوك اۋدانى پروكۋراتۋراسىنىڭ مالىمەتىنشە، 19 جەلتوقسان كۇنى كەشكە كارگاسوك اۋدانىنىڭ تۇرعىنى جاس بالاسىن مەكتەپتەگى جامان مىنەز-قۇلقىنا بايلانىستى ۇرعان. 

ۆيدەودان بالانىڭ اناسىنان ۇرماۋىن ءوتىنىپ، ەكىنشى ولاي جاسامايتىنىن ايتىپ جىلاپ جاتقانىن كورۋگە بولادى. ءبىراق ايەل ۇرۋىن توقتاتپايدى. سونىمەن قاتار، ايەل الدىمەن بالانى تاياقپەن ۇرىپ، سودان كەيىن ونى تۇنشىقتىرۋعا تىرىسادى. بەينەجازبانى تاسپالاعان ايەل جاۋىز اناعا "انجەلا جەتەر ەندى! بالانى جىبەر. سەن ونى تۇنشىقتىرىپ جاتىرسىڭ" دەپ ايقايلايدى.

"كاراگاسوك اۋدانىنىڭ پروكۋراتۋراسى كامەلەتكە تولماعانداردىڭ قاداعالاۋسىزدىعى مەن قۇقىق بۇزۋشىلىعىنىڭ الدىن الۋ تۋرالى زاڭنامانىڭ ورىندالۋىن تەكسەرۋگە كىرىستى. تەكسەرۋ بارىسىندا، الدىن الۋ جۇيەسىنىڭ ۋاكىلەتتى ورگاندارى مەن مەكەمەلەرى جۇمىسىنىڭ ۋاقىتىلىعى مەن تولىقتىعىنا، سونداي-اق ولاردىڭ ۆەدومستۆوارالىق ءوزارا ءىس-قيمىل دەڭگەيىنە باعا بەرىلەتىن بولادى" دەلىنگەن پروكۋراتۋرا حابارلاماسىندا.

قامقورشىلىق ماماندارى وتباسىعا كەلىپ، جاعدايدى زەرتتەدى. وبلىستىق دەپارتامەنت رەسەي فەدەراسياسىنىڭ وتباسى كودەكسىنىڭ 77-بابىنا سايكەس بالانىڭ قاۋىپسىزدىگىن قامتاماسىز ەتۋ ءۇشىن ونى وتباسىنان الىپ قويۋعا شەشىم قابىلدادى (بالانىڭ ومىرىنە نەمەسە دەنساۋلىعىنا تىكەلەي ءقاۋىپ تونگەن جاعدايدا، قورعانشىلىق جانە قامقورشىلىق ورگانى بالانى اتا-اناسىنان دەرەۋ الۋعا قۇقىلى).

پروكۋراتۋرا قۇقىق قورعاۋ ورگاندارى باستاعان پروسەسسۋالدىق تەكسەرۋدى باقىلاۋعا الدى. قازىرگى ۋاقىتتا بالا ءقاۋىپسىز جەردە، قامقورشىلىق ورگاندارى ونى وتباسىنا ورنالاستىرۋدى ۇيىمداستىرۋ بويىنشا جۇمىس جۇرگىزۋدە.