«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ءماسليحاتتارعا سايلاۋ قورىتىندىسى تۋرالى جەلىدە جازبا جاريالادى. ول جازباسىندا پارتيا فراكسيالارىنىڭ قۇرامىنا جانە جاڭادان سايلانعان دەپۋتاتتاردىڭ ورتاشا جاسىنا دا توقتالدى.

«قىمباتتى دوستار! وزدەرىڭىز بىلەتىندەي، «Nur Otan» بارلىق 216 اۋماقتىق ءماسليحاتتارعا تىزىمدەر ۇسىندى. جەرگىلىكتى وكىلدى ورگاندارعا سايلاۋ قورىتىندىسى بويىنشا پارتياعا ورتا ەسەپپەن سايلاۋشىلاردىڭ 82،4%ء-تى داۋىس بەردى. وسىلايشا، بارلىق دەڭگەيدەگى ءماسليحاتتارداعى 3 276 ورىننان نۇروتاندىقتار 2 701 ماندات الدى.

كەشە پارتيا فيليالدارىنىڭ ساياسي كەڭەستەرى بيۋرولارى وتىرىستارىنىڭ قورىتىندىلارى بويىنشا ەلىمىزدىڭ بارلىق وبلىستارى، اۋداندارى مەن قالالارىنداعى ءماسليحاتتار دەپۋتاتتارىنىڭ ءتىزىمى جاسالىپ، تىركەۋ ءۇشىن وڭىرلىك سايلاۋ كوميسسيالارىنا جولداندى.

جالپى، ءماسليحاتتارداعى ءبىزدىڭ فراكسيالاردىڭ قۇرامى 65%-كە جاڭاردى.

پارتيانىڭ دەپۋتاتتىق كورپۋسى 6 جىلعا جاساردى، بۇگىندە حالىق قالاۋلىلارىنىڭ ورتاشا جاسى 45 جاستى قۇرايدى»، - دەپ جازدى پارتيا ءتوراعاسىنىڭ ءبىرىنشى ورىنباسارى.

سونداي-اق، ول جاڭادان سايلانعان دەپۋتاتتاردىڭ اراسىنداعى ايەلدەر مەن جاستاردىڭ ۇلەس سانىنا ەرەكشە توقتالدى.

«Nur Otan»-نان سايلانعان بارلىق دەپۋتاتتاردىڭ ۇشتەن ءبىرى – ايەلدەر، 23% – 35 جاسقا دەيىنگى جاستار. ولاردىڭ قاتارى سايكەسىنشە 11%-كە جانە 16%-كە ارتتى. وسىلايشا، ەلباسى، پارتيا ءتوراعاسى ن.ءا.نازاربايەۆتىڭ بارلىق دەڭگەيدەگى ماسليحاتتاردا ايەلدەر مەن جاستاردىڭ ۇلەس سانىن ارتتىرۋ جونىندەگى تاپسىرماسى تولىق ورىندالدى.

423 دەپۋتات – پارتياعا جاڭادان كىرگەن، پرايمەريز اياسىنداعى الەۋمەتتىك ءليفتىنى پايدالانا وتىرىپ، پارتياىشىلىك ىرىكتەۋدىڭ بارلىق كەزەڭدەرىنەن وتكەن ازاماتتىق بەلسەندىلەر، قوعامدىق پىكىر كوشباسشىلارى.

دەپۋتاتتىق كورپۋسقا ءبىلىم جانە عىلىم، دەنساۋلىق ساقتاۋ، مادەنيەت جانە سپورت، ۇەۇ، ب ا ق، كاسىپوداق، ونەركاسىپ وكىلدەرى، سونداي-اق كاسىپكەرلەر، فەرمەرلەر، كوپبالالى انالار، قانداستار، ەرەكشە قاجەتتىلىكتەرى بار ادامدار جانە ت.ب. كىردى. ءماسليحاتتاردا ءار ءتۇرلى ساناتتاعى ازاماتتاردىڭ وكىلدىك ەتۋى شەشىمدەر قابىلداۋدىڭ تەڭگەرىمدىلىگىن جانە بارلىق الەۋمەتتىك توپتاردىڭ مۇددەلەرىن قورعاۋدى قامتاماسىز ەتەدى.

ەلباسى اتاپ وتكەندەي، «Nur Otan» پارتياسىنان دەپۋتات بولۋ – ارتىقشىلىق ەمەس، ۇلكەن جاۋاپكەرشىلىك. الدىمىزدا اۋقىمدى مىندەتتەر تۇر. تەك بىرلەسىپ قانا ءبىز بارلىق قيىندىقتاردى ەڭسەرىپ، كوزدەگەن ماقساتتارىمىزعا قول جەتكىزە الامىز!»، - دەدى باۋىرجان بايبەك.