كەشەگى ءماجىلىستىڭ وتىرىسىندا  قارجى ءمينيسترى ەلىمىزدە بەس جىلدان كەيىن جۇرت جاپپاي دەكلاراسيا تاپسىراتىنىن جەتكىزدى.سوعان قاتىستى زاڭ جوباسىن تانىستىردى.بۇل تۋرالى «قامشى» پورتالى  كتك ارناسىنا سىلتەمە جاساي وتىرىپ حابارلايدى.

“جەكە تۇلعالار دەكلاراسيا تاپسىرعاندا، اقشاسىن جەكە شوتىنا سالىپ كورسەتۋ كەرەك. ءبىراق ادامداردىڭ بارلىعى قارجىسىن بانكتە ۇستامايدى. سوندىقتان 3 ميلليون تەڭگەنى قولدا ۇستاۋعا رۇقسات ەتىلىپ وتىر. ال نەسيە مەن دەپوزيتكە كەلسەك، تەك شەتەلدىك بانكتەردەگى شوتتار عانا ەسەپكە الىنادى”، – دەيدى باحىت سۇلتانوۆ.

دەكلاراسيا تاپسىرۋ ەكى كەزەڭمەن جۇزەگە اسپاق. ۇكىمەت الدىمەن سىناق رەتىندە مەملەكەتتىك قىزمەتكەرلەر جانە ۇلتتىق كومپانيا قىزمەتكەرلەرىنىڭ تابىسى مەن مۇلكىن ەسەپكە الماق. ول 2017 جىلدان باستاپ جۇزەگە اسادى. تەك 2020 جىلى جالپى حالىققا دەكلاراسيا تاپسىرۋ مىندەتتەلەدى.

ءقازىر ەلىمىزدە تەك دەپۋتاتتار مەن سۋديالار عانا مال-مۇلكى تۋرالى ەسەپ بەرەدى. قارجى ءمينيسترىنىڭ ايتۋىنشا، بۇل جۇيە ەلىمىزگە تابىستىڭ قايدان جانە قانشا كولەمدە كەلىپ جاتقانىن انىقتاۋعا مۇمكىندىك بەرمەيدى ەكەن.

سوندىقتان زاڭعا وزگەرىس ەنگىزىپ، ءاربىر كامەلەتتىك جاسقا تولعان ازامات، ورالماندار مەن قازاقستاندا مۇلكى بار شەتەلدىكتەرگە دەكلاراسيا تاپسىرۋ مىندەتتەلمەك. ياعني، اركىم قانشا قارجىسى، ءۇيى، جەرى، كولىگى بارىن كورسەتۋى كەرەك.