10 اقپان كۇنى شىعىس قازاقستان وبلىسىندا ساياحاتشى قار كوشكىنىنىڭ استىندا قالىپ قويىپ قازا تاپتى. بۇل تۋرالى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتى حابارلادى.

دەپارتامەنتتىڭ مالىمەتىنشە، وبلىس ورتالىعىنان كەلگەن التى ساياحاتشى ريددەر قالاسى ءۇلبى وزەنىنىڭ ماڭايىنداعى سەرجيحا تاۋىندا سىرعاناپ جۇرگەن. كەنەتتەن تاۋدان كوشكىن ءجۇرىپ، دەمالۋشىلاردىڭ ءبىرىن قار باسىپ قالعان.

– وبلىستىق توتەنشە جاعدايلار دەپارتامەنتى جەدەل قۇتقارۋ جاساعىنىڭ قۇتقارۋشىلار توبى كينولوگتارمەن بىرگە ەۆروكوپتەر-145 تىكۇشاعىمەن دەرەۋ كومەككە  شىقتى. قۇرامىندا 5 ادام بار ەكىنشى توپ جول تالعامايتىن كولىكپەن وسكەمەننەن شىقتى. ريددەر قالاسىنان قۇتقارۋشىلار مەن 4 ۆولونتەر قاردا جۇرگىشپەن قوسىمشا جۇمىلدىرىلدى، – دەدى توتەنشە جاعدايلار مينيسترلىگىنىڭ رەسمي وكىلى تالعات ءۋالي. 

سايت مالىمەتىنشە، كۇننىڭ بۇلتتى بولۋى مەن تۇتەك بوراننان تىكۇشاق ساعات 16:23-تە ءماجبۇرلى تۇردە قونعان. وسى ۋاقىتتا ساياحاتشىلار بايلانىسقا شىعىپ، قار استىندا قالعان 1979 جىلى تۋعان ەر ادامنىڭ دەنەسىن الىپ شىققانىن حابارلاعان.

11 اقپاندا 8 ۆولونتەر، 2 قۇتقارۋشى، 1 كريمينالدىق پوليسيا ساراپشىلارىنان تۇراتىن توپ جانە 3 ساياحاتشى قازا بولعان ادامنىڭ دەنەسىن ءتۇسىرۋ ءۇشىن تاۋعا كەتكەن.

بۇعان دەيىن، توتەنشە جاعدايلار دەپارتامەنتى قۇتقارۋشىلارى بىرنەشە كۇن قاتارىنان تۇرعىندارعا تاۋداعى كوشكىن ءقاۋپى تۋرالى ەسكەرتۋ جاساعان.