جاقىندا ورىس تىلىندە جارىق كورەتىن «ۆرەميا» باسىلىمىنىڭ ەلكروندىق نۇسقاسىندا «وي-باي، ەتو اباي؟!» اتتى ماقالا جارىق كوردى. وندا شىعىس قازاقستان وبلىسى باسشىلارى ۇلى قازاق كلاسسيگى اباي قۇنانباي ۇلى مەن ۆلاديمير لەنيندى شاتاستىرىپ العاندىعى تۋرالى ايتىلعان. بۇل تۋرالى «قامشى» پورتالى حابارلايدى.

شىعىس قازاقستان وبلىسى زىريانوۆسك اۋدانىندا  مادەني ەسكەرتكىشتەر ريەۆاليۋسياسى باستالدى. ءيا، ءيا ءدال! اۋدان ورتالىعىندا ورناتىلعان ۇلى اباي قۇنانباي ۇلىنىڭ ەسكەرتكىشى جەرگىلىكتى تۇرعىندارعا ايگىلى پرلەتاريات كوسەمى ۆلاديمير  لەنيننىڭ بەينەسىن ەلەستەتكەن. جاڭا ەسكەرتكىش دەگەن ءجاي اتى. ونىڭ ابايعا ارنالىپ ورناتىلعانىنا دا كۇماندانۋشالار جوق ەمەس. «ۆرەميا» باسىلىمىنىڭ جازۋىنشا، جەرگىلىكتى تۇرعىندار قازاق اقىنى اباي قۇنانبايۇلىنا ارنالعان ەسكەرتكىشتى ءجاي عانا رەكونسترۋكسيالاي سالعان دەگەن پىكىردە. ءتىپتى تۇرعىنداردىڭ ايتۋىنشا بۇرىنعا كوسەم لەنيننىڭ ەسكەرتىكىشە جاڭا باس ورناتا سالعان. ال بۇرىنعى ەسكەرتكىشتىڭ دەنەسى سول كۇيى وزگەرتىلمەگەن-مىس.

جاقىندا جەرگىلىكتى اكىمدىك ۇلى قازاق اقىنى اباي قۇنانباي ۇلى مەن ورىستىڭ كلاسسيگى الەكساندر پۋشكيننىڭ ەسكەرتكىش مۇسىندەرىن قاتار اشقان بولاتىن.  ال ابايدىڭ ەسكەرتكىشى جەرگىلىكتى «گورنياك» مادەنيەت ءۇيىنىڭ الدىنا ورناتىلعان.

ەكى بىردەي ەسكەرتكىش ءمۇسىندى اشۋ ءۇشىن جەرگىلىكتى بيۋدجەتتەن 7 ميلليون تەڭگە جۇمسالعان ال ەسكەرتكىش ءمۇسىننىڭ اۆتورلارى بۇل جۇمىسقا  ءبىر اي كولەمىندەگى ۋاقىتتارىن جۇمساعان. جەرگىلىكتى تۇرعىنداردىڭ پىكىرىنشە، رەسەي اقىنى الەكساندر پۋشكيننىڭ ەسكەرتكىش ءمۇسىنى شىن مانىندەگى اقىننىڭ بەينەسىنە ۇقساسا،  قازاق اقىنى اباي قۇنانباي ۇلىنىڭ تاس-تەمىر ءمۇسىنى كۇماندىلاۋ شىققان. بۇل جۇمىستىڭ اۆتورى – ءمۇسىنشى ەۆگەنيا گايسينا.

ال الەۋمەتتىك جەلى قولدانۋشىلارى. «بۇل اباي ەمەس، لەنين. قاراڭىزدارشى ءدال ءيليچتىڭ ءوزى عوي»،-دەيدى.

قازاق اقىنى اباي مەن پرولەتاريات كوسەمى لەنيننىڭ ەسكەرتكىشتەرىندەگى ۇقساستىقتى جەرگىلىكتى اكمشىلىك تە بايقاعان.

«ءيا، ارىقتاۋ بولىپ قالىپتى. ءقازىر وبلىستىق اكىمشىلىكتەن بۇيرىق كۇتەمىز. مۇمكىن ەسكەرتكىشتى جاڭادان جاسايمىز»،-دەيدى زىريانوۆسك اۋدانى اكىمىنىڭ ورىنباسارى ۆياچەسلوۆ كلينوۆيسكيي «ۆرەميا» باسلىمىنا بەرگەن سۇحباتىندا.

ءيا، شىعىس قازاقستاندا ۇلى قازاق اقىنى اباي قۇنانباي ۇلىنىڭ ەسكەرتكىش مۇسىندەرىنە قاتىستى تۇسىنىسپەۋشىلىك ءجيى تۋىپ وتىراتىنى بەلگىلى. مىسالى، 2015 جىلدىڭ ماۋسىم ايىندا وسكەمەن قالاسىنداعى اباي مەن ميحاەلس ەسكەرتكىشتەرى قوعامدىق ورتادا داۋ تۋدىرعانى تۋرالى قازاقستاندىق بۇقارالىق اقپارات قۇرالدارى جازعان بولاتىن. قازاق جانە ورىس كلاسسيكتەرىنىڭ بىرگە «سەلفي» جاساپ تۇرعان بەينەلەرى الەۋمەتتىك جەلى قولدانۋشىلارىنىڭ اشۋىن تۋعىزعان. ۇلى كلاسسيكتەردى قۇبىجىق «حوببيتكە» تەلىگەن جەرگىلىكتى اكىمشىلىك حالىقتان كەشىرىم سۇراپ، ەرتەسى كۇنى-اق، الگى ەسكەرتكىشتىڭ كوزىن قۇرتقان بولاتىن. ايتپاقشى، وسكەمەننىڭ وراتالىعىندا ەسكەرتكىشتىڭ ورىن ءالى دە بولسا ويسىراپ تۇر. قورىتىندالاي كەلە ايتپاعىمىز، شىعىس قازاقستان وبلىسى اكىمشىلىگى مەن جەرگىلىكتى باسشىلار اباي قۇنانبايۇلىن كەلەمەجدەۋدى قاشان دوعارادى؟ ءبىر رەتكى «ماقۇل، تۇسىنىسپەۋشىلىك بولىپتى»  دەدىك، ەكى رەت «قالاي بۇل؟» دەدىك. سوندا بۇل، شقو باسشىلارى اقىلىنىڭ تايازدىعىن كورسەتەدى مە؟ الدە، ادەيى جاسالىپ جاتقان شابۋىل ما، بۇل؟

نۇرگەلدى ءابدىعاني ۇلى