قازاقستان پرەزيدەنتى نۇرسۇلتان نازاربايەۆتىڭ تاعى ءبىر نەمەرەسى قازاقستان فۋتبول فەدەراسياسىنىڭ پرەزيدەنتى بولۋعا ءوتىنىش بىلدىرگەن. ەكس-ەلشى راحات الييەۆ پەن دەپۋتات داريعا نازاربايەۆانىڭ كىشى ۇلى ايسۇلتان نازاربايەۆ قازاقستان فۋتبول فەدەراسياسىنىڭ پرەزيدەنتتىگىنە ءوزىن-وزى ۇسىنعاندىعى تۋرالى اپارات تاراعان. وندا ايسۇلتان راحات ۇلى نازاربايەۆ قازىرگى قفف پرەزيدەنتى ەرلان قوجاعپانوۆتىڭ ەكى بىردلەي لاۋازىمدى قىزمەتتى قاتار اتقارىپ جۇرگەنىن سىنعا العان. بۇل تۋرالى «قامشى» پورتالى ۆكونتاكتە جەلىسىندەگى «زا تەبيا باكە» توبىنىڭ اقپاراتىنا سىلتەمە جاسايدى.

ايسۇلتان نازاربايەۆتىڭ قازاقستان فۋتبول فەدەراسياسى اتقارۋشى كوميتەتىنە جولداعان حاتىندا «فەدەراسيانىڭ قازىرگى پرەزيدەنتى ەرلان قوجعاپانوۆ مىرزا قفف پرەزيدەنتتىگىمەن قاتار «استانا» كاسىبي سپورت كلۋبىنىڭ باسشىسى مىندەتىن اتقارىپ كەلەدى. ال فيفا زاڭنامالارى بويىنشا بۇعان جول بەرىلمەۋى كەرەك ەدى. سوندىقتان دا مەن قفف كەزەكتەن تىس پرەزيدەنتتىك سايلاۋ وتكىزۋدى جانە فەدەراداسيا پرەزيدەنتتىگىنە ءوزىمنىڭ كانديداتۋرامدى ۇسىنامىن.  ءوزىمنىڭ ويىنشى رەتىندەگى جانە بىرىككەن كورولدىكتە جۇرگەندەگى تاجىربيەمە سۇيەنە وتىرپ، بارلىق ءبىلىمىم مەن كۇش-قۋاتىمدى قازاقستان فۋتبولىنىڭ دامۋىنا جۇمسايتىنىمدى ايتقىم كەلەدى»،-دەگەن.

Nur.kz سايتى جاريالاعان اقپاراتتاعى حات رەسمي تىلدە جازىلعانىن ەسكەرە وتىرىپ، «قامشى» پورتالى حاتتا نەندەي وزەكتى ماسەلەلەر كوتەرىلگەنىن  ساراپتاعان بولاتىن.

1994 جىلدارى قازاقستان فۋتبولى فيفا قۇرامىنا قوسىلعاننان باستاپ، ەۋروپالىق ستاندارتتار بويىنشا جۇمىس جىرگىزىلىپ كەلگەنى بەلگىلى.  ءبىراق بۇدان قازاق جانە قازاقستان فۋتبولىنىڭ تاسى ورگە دومالاي قويماعان-دى. ال 2002 جىلى ەكس-ەلشى، ايسۇلتان نازاربايەۆتىڭ اكەسى راحات الييەۆتىڭ پرەزيدەنتتىگى كەزىندە قازاقستان فۋتبول فەدەراسياسى ۋەفا قۇرامىنا قوسىلعانىن ءبىز جوعارىدا اتاپ وتكەن بولاتىنبىز. وسىدان ارادا كوپ ۋاقىت ۇزاماي جاتىپ-اق، الماتىلىق «قايرات» كلۋبى فۋتزالدان ۋەفا كۋبوگىنىڭ قولا جۇلدەگەرى اتاندى بۇل 2008/09 جىلدارى ەدى. بۇعان مارقۇم راحاتتىڭ تيگزگەن سەپتىگى از بولماعان.  ال 2013 جىلى «قايرات» وسى فۋتزالدان ۋەفا چەمپيونى بولعاندا ولار فينالدىق كەزدەسۋدە ايگىلى يسپانيالىق «بارسەلونانى» تۇقىرتقاندا بارشا قازاق بوركىمىزدى اسپانعا اتىپ قۋاندىق. راس قوي.  2013 جىلى ۇلكەن فۋتبولدان قاراعاندىلىق «شاحتەر» كلۋبى دا ەۋروپا ليگاسىنىڭ توپتىق كەزەڭىنە ءبىر تابان جاقىنداعان ەدى. سول كەزدە  تاۋەلسىز قازاقستاننىڭ فۋتبول الاڭىندا تۇڭعىش رەت «چەمپيوندار ليگاسىنىڭ «گيمنى وينادى. بۇل دا جەتىستىك ەدى. ال كۇنى كەشە عانا «استانا» فۋتبول كلۋبى چەمپيوندار ليگاسىنىڭ توپتىق كەزەڭىنە شىققان تۇڭعىش قازاقستاندىق كوماندا بولىپ تاريحقا كىردى. كۇللى قازاقستان حالقى قۋانىشتان جارىلارداي بولدىق.  ءبىز مۇنىمەن ماقتانامىز.

ايسۇلتاننىڭ ايتۋىنشا، قازاقستان ۋەفا-عا قوسىلعاننان باستاپ فۋتبولدا ايتارلىقتاي وزگەرستەر ورىن العان. ولداردىڭ ءبىرسىپىراسىن ءبىز جوعارىدا تىزبەلەپ وتتىك-تە.  مىسالى،

«ۋەفا قۇرامىنا قوسىلعان كەزدە ءبىز وداقتىڭ بارلىق تالاپتارىنا كەلىسكەن بولاتىنبىز. سونىڭ ىشىندە، ەۋروپالىق فۋتبول ينفراسترۋكتۋراسىن، رەگلامەنتتەرى مەن ستاندارتتارىن قابىلدادىق. ال تاعى ءبىر ەرەجەدە فەدەراسيا پرەزيدەنتى ءوز قىزمەتىنە كەدەرگى كەلتىرەتىن بارلىق قىزمەتتەردەن باس تارتۋى كەرەك دەلىنگەن. الايدا وسى ماسەلەدە ەرلان توحتارحان ۇلى قوجاعاپانوۆ بىرنەشە لاۋازىمدى قىزمەت اتقاراتىنىن ەسكەرە كەتۋ كەرەك. وسى رەتتە قفف پرەزيدەنتتىگىنىڭ كەزەكتەن تىس سايلاۋىن وتكىزۋدى جانە وسى لاۋازىمعا ءوزىمنىڭ ۇمىتكەرلىگىمدى ۇسىنامىن» دەيدى ايسۇلتان نازاربايەۆ.

قازاقستان پرەزيدەنتىنىڭ كىشى نەمەرەسى وسىعان دەيىن ۇلىبريتانيادا فۋتبولدان ءتالىم الىپ كەلگەن جانە «استانا»، «سۇڭقار» فۋتبول كلۋبتارىندا ويناعان بولاتىن. ەستەرىڭىزدە بولسا، ەكس-ەلشى، ديسسيدەت، مارقۇم  راحات الييەۆ قازاقستان فۋتبول فەدەراسياسىنىڭ پرەزيدەنتى بولىپ قىزمەت اتقارعان كەزدە قفف  ۋەفا قۇرامىنا قوسىلعان ەدى.

ايتا كەتەيىك، وسىعان دەيىن «قامشى» پورتالى ايسۇلتاننىڭ اعاسى راحات پەن داريعانىڭ ۇلكەن ۇلدارى ەلدورداداعى لاۋازىمدى قىزمەتكە تاعايىندالعانى تۋرالى جازعان بولاتىنبىز.

2014 جىلدان باستاپ ەلىمىزدىڭ اكىمشىلىك باسقارۋ ءىسى قىزمەتكەرلەرىنىڭ قاتارىنا جاپ-جاڭا ەسىم بولىپ قوسىلعان ءنۇرالى راحات ۇلى مەن ۇلىبريتانيا فۋتبولىنان ءتالىم الىپ كەلگەن، قازاقستاننىڭ بىرنەشە كلۋبتارىندا ويناپ جۇرگەن ايسۇلتان نازاربايەۆتار تۋرالى ءبىرى بىلسە، ءبىرى بىلە بەرمەيتىنى تۇسىنىكتى.

ءجا، بىلسە دە كادىگى جۇرتتىڭ اۋزىندا ولار – «پرەزيدەنت  – اتانىڭ» سۇيىكتى نەمەرەسى نەمەسە قازاقستانداعى ءنومىرى ءبىرىنشى وپپوزيسيونەر «بولعان» ازاماتتىڭ ۇلدارى.

ۇلكەن ساياساتقا كەلگەنىنە كوپ بولماسا دا ءنۇرالى راحاتۇلىنا جاقسىبەكوۆ مىرزا استانانىڭ  «مايلى  جىلىكتەرىنىڭ» ءبىرىن تاپسىرعان.

ەندى مىنە، راحات پەن داريعانىڭ سۇتكەنجەلەرى دە بىلدەي ءبىر فەدەراسيانىڭ تىزگىنىنە تالاسۋدا.

ءيا، «اكەسى ءۇشىن بالاسى جاۋاپ بەرمەيدى» قاعيداسىنا سالساق، كىمنىڭ بالاسى بولسا دا، قابىلەتى مەن قارىمى جەتسە، پاتشا كوڭىلىڭىزگە ەرىك.

نۇرگەلدى ءابدىعاني ۇلى