بۇگىن ەلورداداعى تاۋەلسىزدىك سارايىندا ەلباسى نۇرسۇلتان نازاربايەۆتىڭ قاتىسۋىمەن قازاق حاندىعىنىڭ 550 جىلدىق مەرەيتويىنا ارنالعان سالتاناتتى جيىن باستالدى. بۇل تۋرالى «قامشى» پورتالى قازاقپاراتقا سىلتەمە جاسايدى.

وسىنىڭ الدىندا حابارلاعانىمىزداي، مەرەكەلىك شاراعا ازەربايجان پرەزيدەنتى يلحام الييەۆ، قىرعىز پرەزيدەنتى المازبەك اتامبايەۆ، تۇركيا  پارلامەنتىنىڭ ءتوراعاسى يسمەت يىلماز  قاتىسۋدا.

«قۇرمەتتى حانىمدار مەن مىرزالار، مارتەبەلى مەيماندار!  ءسوزىمدى باستاماس بۇرىن، بۇگىنگى كۇنى تۇركى تەكتەس مەملەكەتتەردىڭ 5ء-شى ءسامميتى وتەتىن كۇنىمەنەن ءبىزدىڭ مەركەمىز ءدال كەلگەنىن ايتىپ وتەيىن. سوندىقتان وسى جيىنعا  قاتىسىپ وتىرعان قۇرمەتتى قوناقتارىمىز ازەربايجان پرەزيدەنتى يلحام الييەۆتى قۇرمەتتەيمىز.  قىرعىز پرەزيدەنتى المازبەك اتامبايەۆ زور قۇرمەتپەن قارسى الامىز. ەردوعان مىرزا الدىنداعى شارۋالارىنا بايلانىستى ماعان تەلەفون شالىپ، ۋاكىلى رەتىندە ۇلى  تۇرىك جيىلىسىنىڭ  ءتوراعاسى يسمەت يىلمازدى جىبەردى»، - دەپ اتاپ ءوتتى مەملەكەت باسشىسى. 

ال القالى جيىندا ءسوز العان جازۋشى، مەملەكەتتىك سىيلىقتىڭ يەگەرى ءابىش كەكىلبايەۆ، «بۇگىنگى توي - ەرەكشە  توي. قازاقتىڭ باسىنان جاقسى دا، جامان دا ءوتتى. بۇدان 550 جىل بۇرىن ءوز الدىمىزعا دەربەس ەل بولدىق. سودان بەرى قاراي ەدىل مەن التايدىڭ اراسىن، سولتۇستىكتەن قۇمدىكول، وڭتۇستىكتە مىرزاشولگە دەيىنگى يەن دالانى جايلايمىز. ءبىزدىڭ وسى داۋىرگە جەتكەنىمىز دە، جەتپەگەنىمىز دە بار. جەر بەتىندەگى حالىقتىڭ قاي-قايسىسىنىڭ باسىندا كۇي مۇنداي ەمەس. «بىرەۋدى كورىپ  شۇكىر ەت، بىرەۋدى كورىپ پىكىر ەت» دەگەن. قۇدايعا شۇكىر قازاق حالقىنىڭ باسىندا شۇكىرشىلىك ەتەتىن جاعداي جەتكىلىكتى»، - دەدى.

نۇرزات توعجان