قىزىلوردا وبلىسىندا ورتتەن 4 ادام قايتىس بولدى. بۇل تۋرالى وبلىس اكىمى گۇلشارا ءابدىحالىقوۆا facebook پاراقشاسىندا حابارلادى.
– بۇگىن قارماقشى اۋدانى، جوسالى كەنتى، رۇستەمبەكوۆ كوشەسى، 29-تۇرعىن ۇيدە تۇسكى ساعات 13:30 كەزىندە 27 ليترلىك گاز باللونى جارىلىپ، 144 شارشى مەتر جەر ورتكە ورانىپ، 4 ادام قايتىس بولدى:
2001 جىلى تۋعان س. ومىرتايەۆا؛
1981 جىلى تۋعان ر. ايتماحانوۆا؛
2000 جىلى تۋعان ن. ايتماحانوۆا؛
1999 جىلى تۋعان س. مىرحييەۆ، – دەپ جازدى ءابدىحالىقوۆا.
ءورت ءسوندىرۋ بولىمشەسى كەلگەنگە دەيىن 1950 جىلى تۋعان س.الماحانوۆا حيرۋرگيا بولىمشەسىنە جاتقىزىلعان.
ءورتتى سوندىرۋگە توتەنشە جاعداي دەپارتامەنتىنىڭ 16 قىزمەتكەرى جانە 4 بىرلىك تەحنيكا، وكم-نىڭ 20 قىزمەتكەرى جانە 4 بىرلىك تەحنيكاسى، جەرگىلىكتى اتقارۋشى ورگاننىڭ 10 قىزمەتكەرى جانە 3 بىرلىك تەحنيكاسى، پروكۋراتۋرانىڭ 3 قىزمەتكەرى مەن 1 بىرلىك تەحنيكاسى، باستاپقى مەديسينالىق-سانيتارلىق كومەك قىزمەتىنىڭ 8 قىزمەتكەرى جانە 3 بىرلىك تەحنيكاسى، قىزىلوردا ەلەكتر تاراتۋ توراپتارى كومپانياسىنىڭ 3 قىزمەتكەرى جانە 1 بىرلىك تەحنيكاسى جۇمىلدىرىلعان.
– قايتىس بولعان ازاماتتاردىڭ تۋعان-تۋىستارىنا سىر ەلى جۇرتشىلىعى اتىنان قايعىرا كوڭىل ايتامىن. بۇل بارىمىزگە دە جەڭىل تيمەدى. قازىرگى تاڭدا وسىعان بايلانىستى ماسەلە مەنىڭ تىكەلەي باقىلاۋىمدا تۇر. ورتتەن، سۋدان، باسقا دا اپاتتان امان بولايىقشى، جەرلەستەر! – دەپ جازدى وبلىس اكىمى.
پىكىر قالدىرۋ