بيىلعى جىلى ءجۇز جىلدىق مەرەيتويىن اتاپ وتكەن جاپوندىقتاردىڭ سانى بارلىق رەكوردتاردى جاڭارتتى. جاپونيادا ۇزاق جاساۋشىلار سانى 60 مىڭ ادامنان اسقان. بۇل تۋرالى «قامشى» پورتالى JapanToday-كە سىلتەمە جاساپ حابارلايدى.
دەنساۋلىق ساقتاۋ، ەڭبەك جانە ءال-اۋقات مينيسترلىگى جاپونيادا 61 568 ۇزاق جاساۋشى ادام تۇراتىنىن حابارلاپ وتىر، سونىڭ ىشىندە 87 پايىزى – ايەلدەر.
وتكەن جىلمەن سالىستىرعاندا 100 جاستان اسقان جاپوندىقتاردىڭ سانى 2،7 مىڭ ادامعا كوپ بولدى.
جاسى بويىنشا ەڭ ۇلكەن جاپوندىق ازاماتشا – 1900 جىلى دۇنيەگە كەلدى، ال ەڭ ەرەسەك جاپوندىق ەر ادام 1903 جىلى دۇنيەگە كەلگەن ەكەن، ول جەر بەتىندەگى جاسى ەڭ ۇلكەن ەر ادام رەتىندە تىركەلگەن.
