الماتى شاھارىندا  جاسى 75-تەن اسقان قاريالار قوعامدىق كولىكتەردە ەلەكتروندى جول ءجۇرۋ بيلەتىنىڭ كومەگىمەن تەگىن قاتىنايتىن بولادى. بۇل تۋرالى «قامشى» پورتالى «نۇر. كز-كە» سىلتەمە جاساي وتىرىپ حابارلايدى.

 قالا باسشىسى باۋىرجان بايبەكتىڭ توراعالىعىمەن وتكەن قالالىق ءماسليحات سەسسياسىنىڭ كەزەكتى شاقىرىلىمىندا ايتىلدى.

جيىندا قوعامدىق كولىكتەردە جول ءجۇرۋ اقىسىنا جەڭىلدىكتەر ەنگىزۋ ماسەلەسى تالقىلانعان بولاتىن. قالا اكىمى باۋىرجان بايبەك ءدال قازىرگى قيىن كەزەڭدە قاريالارىمىزعا بارىنشا قولداۋ كورسەتۋ كەرەكتىگىن اتاپ ءوتتى.

“مەملەكەت باسشىسى نۇرسۇلتان نازاربايەۆ ارداگەرلەرىمىزگە، قاريالارىمىزعا ۇنەمى قولداۋ ءبىلدىرىپ كەلەدى. ءبىزدىڭ 75-تەن اسقان قارتتارعا جول ءجۇرۋ اقىسىن تەگىن ەتۋىمىز دە تۇرعىندار اراسىندا قولداۋعا يە بولادى دەگەن سەنىمدەمىن” – دەدى الماتى اكىمى.

ايتا كەتەيىك، جيىن بارىسىندا 15 جاستان اسقان مەكتەپ جانە كوللەدج وقۋشىلارىنا، جوو ستۋدەنتتەرىنە، جاسىنا قاراي زەينەتكەرلەرگە دە قوعامدىق كولىكتەردە 50% جەڭىلدىكپەن ءجۇرۋ ماسەلەسى وڭ شەشىمىن تاپتى.