ق ر پارلامەنتى ءماجىلىسىنىڭ دەپۋتاتى روزاقۇل حالمۇرادوۆ 2016-2018 جىلدارعا ارنالعان بيۋدجەتتىك جوسپارلاۋ تۋرالى پرەزەنتاسيا بارىسىندا ەكسپو-2017 كورمەسىنە 2018 جىلى بولىنەتىن 35 ميللياردقا قاتىستى نارازىلىق بىلدىرگەن. بۇل تۋرالى «قامشى» پورتالى today.kz-كە سىلتەمە جاساي وتىرىپ حابارلايدى.

جاقىندا ق ر قارجى ءمينيسترى باقىت سۇلتانوۆ پارلامەنت قابىرعاسىندا 2016-2018 جىلدارداعى بيۋدجەتتىك جوسپارلاۋ تۋرالى پرەزەنتاسيا جاساعان بولاتىن. وندا ەكسپو-2017 كورمەسىنە 2018 جىلى 35 ميلليارد تەڭگە بولىنەتىندىگى ايتىلعان.

روزاقۇل حالمۇرادوۆ، ءماجىلىس دەپۋتاتى:

ء-سىزدىڭ الدىڭعى باياندامالارىڭىزدا ەكسپو– 2017 كورمەسىنە 2016 جىلى مەملەكەتتىك بيۋدجەتتەن 173 ميلليارد تەڭگە بولىنەدى دەلىنگەن. ال 2017 جىلى اتالمىش كورمەگە 98 ميلليارد تەڭگە قاراستىرىلعان. مەملەكەت باسشىسىنىڭ تاپسىرماسى بويىنشا حالىقارالىق كورمەنىڭ قۇرىلىس جۇمىستارى 2016 جىلى اياقتالۋى ءتيىس. ەندەشە 2018 جىلى نە ءۇشىن 35 ميلليارد تەڭگە ءبولۋدى جوسپارلاپ وتىرسىزدار؟ بۇعان نە سەبەپ؟ سوندا بۇل جىمقىرىلعان قارجىنىڭ ورنىن تولتىرۋ ما؟ ەگەر 2017 جىلى كورمە وتەتىن بولسا، جىل اياعىندا اياقتالادى دەگەن ءسوز. ونداي بولسا قوسىمشا 35 ميلليارد تەڭگە نە ءۇشىن بولىنبەك؟

ال دەپۋتاتتىڭ سۇراعىنا جاۋاپ بەرۋگە تىرىسقان قارجى ءمينيسترى ەكسپو–2017 كورمەسىنىڭ ماڭىزى تۋرالى ءسوز ەتە وتىرىپ، 2018 جىلى بولىنەتىن قارجىلار پاۆيلونداردى ازىرلەۋگە جۇمسالادى دەپ تۇسىندىرگەن.

«بۇل ءبىر جىلعا ارنالعان جوبا ەمەس. وزدەرىڭىز كورىپ وتىرعانداي كەلەسى جىلى 173 ميلليارد تەڭگە نەگىزگى قۇرىلىستى اياقتاۋعا جۇمسالادى. ال 2017-2018 جىلدارى قوسىمشا جۇمىستار، پاۆيلونداردى ازىرلەۋ سياقتى ماڭىزدى جۇمىستارعا دا قاراجات كەرەك. قۇرىلىس اياقتالعاننان كەيىن دە جاسالاتىن جۇمىستار بار ەكەنىن ۇمىتپاڭىزدار»،-دەيدى ق ر قارجى ءمينيسترى باقىت سۇلتانوۆ.

كوپ جاعدايدا بيۋدجەتتە قاراستىرىلعان قارجىلاردىڭ جوعارىدا اتالعان جۇمىستارعا ءتيىستى ساراپتاۋلاردىڭ قورىتىندىلارىمەن جوسپارلانباي، بيلىك وكىلدەرىنىڭ نەمەسە دەپۋتاتتارىنىڭ بەدەلى مەن بەلسەندىلىگىنىڭ ناتيجەسىندە، دايەكسىز كورسەتكىشتەرگە وراي  بولىنەتىنىن تەرىسكە شىعارۋعا بولمايدى.

35 ميللياردتىڭ جىرى مەن سىرى ۇزاق ۋاقىتقا دەيىن ايتىلاتىنى تۇسىنىكتى. بيۋدجەت قارجىسىن ماي شەلپەكتەي شۇيىركەلەپ جاتقاندارعا قاشان توسقاۋىل بولادى دەگەن جاۋىر بولعان سۇراق تاعى دا ويعا ورالادى.

كۇشتى مەن ءتىستىنى عانا تانيتىن قاتىگەز نارىققا قارجىلىق قيىندىق  «باسقان ءىزى سىقىرلاي» ءتونىپ كەلگەندە كەڭ تۇساۋ تىرلىككە ۇيرەنگەن حالىق قارجىنى ۇنەمدۋى ءتيىس ەمەس پ ە ەدى؟! مەملەكەت باسشىسىنىڭ ءوزى باس بولىپ ۇنەمدەۋ ساياساتىن  قولعا العانى قايدا قالدى؟ بارىمىز بەن باعلانىمىزدى كورسەتەتىن مەملەكەتتىڭ باس تويى – قازاق حاندىعىنىڭ 550 جىلدىعىنا دا قارجى بولۋدە ءبىراز ابىگەرگە سالىنعان ەدى. ءتىپتى قازاق حاندىعىنىڭ سەريالىنا دا قارجى جەتكىلىكسىز دەگەن سىلتاۋمەن ءتۇسىرىلىم جۇمىستارى توقتاپ قالعان ەدى. ال بيلىك وكىلدەرىنىڭ وزدەرى حالىقتان جىلۋ جيناعاندا بەتتەرى بۇلك ەتپەگەن ەدى. ال ەكسپو-2017 جىلى وتەتىن حالىقارالىق كورمەگە مەملەكەت قارجىسىنان 173 ميلليارد، كەيىن 98 ميلييارد تەڭگە  قوسىمشا بولىنەتىنىنە دە مىڭق ەتپەدىك. ال 2018 جىلى كورمە اياقتالعاننان كەيىن دە ەكسپو-عا دەپ 35 ميلليارد تەڭگە ءبولۋدى قالاي تۇسىنۋگە بولادى؟ دەپۋتات روزاقۇل حالمۇرادوۆتىڭ سوزدەرىنىڭ جانى بار ەكەنى ءسوزسىز. دەپۋتات مىرزا «2018 جىلى نە ءۇشىن 35 ميلليارد تەڭگە ءبولۋدى جوسپارلاپ وتىرسىزدار؟ بۇعان نە سەبەپ؟ سوندا بۇل جىمقىرىلعان قارجىنىڭ ورنىن تولتىرۋ ما؟» دەگەن بولاتىن. ءيا، نە بولسا دا بولىنگەن قاراجات يگەرىلمەيتىن بولسا، ءبىرىنشى باسشىلار جاۋاپقا تارتىلاتىنى تۇسىنىكتى. ال مينيسترلىكتەگىلەر مەن ۇلتتىق كومپانيا باسشىلارى بۇعان جول بەرمەۋدىڭ بارلىق امال شارعىلارىن جاساپ باعاتىنى دا راس. دەپۋتات نارازىلىق تانىتىپ باققانىمەن، مينيستر مىرس ەتپەدى دە. ءيا، وسى جەردە تاعى دا پارلامەنتتىڭ پارمەنسىزدىگىن ايتا كەتۋ ءجون بولار. سوندا قالاي جۇمساۋدى ءجون دەپ تاپسا، سولاي جۇمساي بەرەتىندەي بيۋدجەت بيلىكتىڭ قالتاسىنداعى قاراجات پا؟ تۇسىنىكسىز...

نۇرگەلدى ءابدىعاني ۇلى