الماتى. قامشى پورتالى - بۇگىن مۇنايلى اۋدانىنىڭ داۋلەت ەلدىمەكەنىندە رەتى بويىنشا 10-نشى مەملەكەتتىك بالاباقشانىڭ اشىلۋ سالتاناتى ءوتتى.

№ 10 «اقبوتا» بالاباقشاسى 280 ورىنعا ەسەپتەلگەن. ەكىقاباتتى عيمارات ءوزىن-وزى تانۋ، ورىس ءتىلى مەن اعىلشىن ءتىلىن ۇيرەنۋ جانە ۆوكال سىنىپتارىنان تۇرادى. بۇلدىرشىندەردى اسحانادا ارنايى بالالار ءمازىرى بويىنشا تاماقتاندىرادى. جاڭا بالاباقشادا مەديسينالىق قىزمەتكەرگە دە ارنالعان بولمە قاراستىرىلعان. مەكەمە 65 قىزمەتكەردەن تۇرادى، ونىڭ ىشىندە 24ء-ى تاربيەشىلەر.

سالتاناتتى لەنتا قيۋ راسىمىنە اۋىل اقساقالدار كەڭەسىنىڭ ءتوراعاسى ناسرۋللا سارسەنعالييەۆ پەن ماڭعىستاۋ وبلىسىنىڭ اكىمى اليك ايداربايەۆ قاتىستى.

- 2007 جىلى ق ر پرەزيدەنتى نۇرسۇلتان نازاربايەۆتىڭ جارلىعىمەن، تاۋەلسىز قازاقستاننىڭ تاريحىندا تۇڭعىش رەت، ءبىر عانا وبلىستا جاڭا اكىمشىلىك-اۋماقتىق بىرلىك – مۇنايلى اۋدانى قۇرىلدى. بۇل شەشىم قالا ماڭىنداعى ەلدى مەكەندەردىڭ الەۋمەتتىك-ەكونوميكالىق ماسەلەلەرىن شەشۋگە مۇمكىندىك بەردى. اۋدان تۇرعىندارىنىڭ الەۋەتىن ارتتىرۋعا باعىتتالعان جۇمىستار ءالى دە جۇرگىزىلۋدە، الەۋمەتتىك نىساندار سالىنىپ، ەلدى مەكەندەردىڭ ينفراقۇرىلىمى دامۋدا. قازىرگى تاڭدا مۇنايلى اۋدانىندا 9 مەملەكەتتىك جانە 15 جەكە مەنشىك مەكتەپكە دەيىنگى بالالار عيماراتى، 4 شاعىن ورتالىقتار پايدالانىمعا بەرىلدى. 3 پەن 6 جاس ارالىعىنداعى جاس تۇرعىنداردىڭ 60%-ى مەكتەپكە دەيىنگى تاربيە جانە وقۋمەن قامتاماسىز ەتىلگەن، - دەدى ماڭعىستاۋ وبلىسىنىڭ اكىمى اليك ايداربايەۆ.

جاقىن ارادا اتامەكەن ەلدىمەكەنىندەگى 280 ورىندى بالاباقشا مەن 1200 ورىندى مەكتەپتىڭ قۇرىلىستارى اياقتالادى. ماڭعىستاۋ-5 تۇرعىن الابى مەن اتامەكەن ەلدىمەكەنىندە ءارقايسىسى 100 ورىندى جەكە مەنشىك بالاباقشالاردىڭ اشىلۋى جوسپارلانۋدا. اتالعان عيماراتتاردىڭ قۇرىلىستارى وتكەن جىلدىڭ ماۋسىم ايىندا باستالعان بولاتىن.

ماڭعىستاۋ وبلىسى اكىمىنىڭ باسپا ءسوز قىزمەتى