الماتى. قامشى پورتالى - «ابايلاڭىز، بالالار!» رەسپۋبليكالىق جەدەل-پروفيلاكتيكالىق ءىس-شاراسى اياسىندا شىمكەنت قالاسىنىڭ ءتارتىپ ساقشىلارى «ءبىرىنشى سىنىپقا باراتىنداردى جاياۋ جۇرگىنشىلەر قاتارىنا قوسۋ» اكسياسىن ۇيىمداستىردى. شارانىڭ نەگىزگى ماقساتى – جاسوسپىرىمدەردىڭ قاتىسۋىمەن ورىن الاتىن جول-كولىك وقيعالارىنىڭ الدىن الۋ، وقۋشىلاردى جول ءجۇرۋ قاۋىپسىزدىگىن ساقتاۋعا داعدىلاندىرۋ، سونداي-اق، بالالاردىڭ جاراقات الۋى ماسەلەلەرىنە جۇرگىزۋشىلەردىڭ، اتا-انالار مەن مۇعالىمدەردىڭ نازارىن اۋدارۋ.
قالاداعى №1 ا.پۋشكين اتىنداعى مەكتەپ-گيمنازياسىنىڭ ءبىرىنشى سىنىپ وقۋشىلارىنىڭ قاتىسۋىمەن وتكەن اكسياعا ءتارتىپ ساقشىلارى «اقبوتا» ويىنشىقتار تەاترىن شاقىردى. ءارتۇرلى بوياۋلارمەن بەزەندىرىلگەن قويىلىم بالالاردى كوشەدە ءوزىن قالاي ۇستاۋ كەرەكتىگىنە جانە ءوز بەتىنشە جول قوزعالىسى قاتىسۋشىسى بولۋعا ۇيرەتىپ، جول قوزعالىسى ەرەجەلەرىنىڭ ماڭىزدىلىعىن وقۋشىلارعا سۇراق-جاۋاپ سايىستارىن ۇيىمداستىرۋ، جۇمباقتار قويۋ ارقىلى ءتۇسىندىردى. ءىس-شاراعا 500-گە جۋىق ءبىرىنشى سىنىپ وقۋشىلارى قاتىستى.
جالپى، سالا ماماندارىنىڭ بەرگەن مالىمەتىنشە، اعىمداعى جىلدىڭ 8 ايىندا وڭتۇستىك وڭىرىندە جاياۋ جۇرگىنشى بالالاردىڭ قاتىسۋىمەن 277 جول-كولىك وقيعاسى ورىن الىپ، 23 بالا قايتىس بولعان. 263 بالا زارداپ شەككەن.
ال ميلليونعا جۋىق تۇرعىنى بار شىمكەنتتە ءبىلىم كۇنى قارساڭىندا جەتى ءبىلىم بەرۋ نىسانىنىڭ قۇرىلىسى اياقتالىپ، ەل يگىلىگىنە تاپسىرىلعان بولاتىن. بۇگىندە شاھارداعى 126 مەكتەپتە 148 مىڭعا جۋىق وقۋشى وقيدى. بۇل وبلىستاعى مەكتەپتەردە ءبىلىم الاتىن 602 مىڭ وقۋشىنىڭ 25 پايىزىنا جۋىعى شىمكەنت قالاسىنداعى مەكتەپتەردە ءبىلىم الادى دەگەندى بىلدىرەدى. بيىل وڭتۇستىك قازاقستاندا مەكتەپ تابالدىرىعىن العاش اتتاعان 70448 وقۋشىنىڭ 21 مىڭنان استامى شىمكەنتتەگى مەكتەپتەرگە قابىلداندى. 2015-2016 وقۋ جىلىندا 1-سىنىپ وقۋشىلارىنىڭ 30 پايىزى وبلىس ورتالىعىنداعى ءبىلىم وشاقتارىندا ءدارىس الماق. مەكتەپكە دەيىنگى ۇيىمداردا بالالاردى قامتۋ كورسەتكىشى 77 پايىزعا جەتتى. شاھارىمىزدا جىل سوڭىنا دەيىن جاڭا التى بالاباقشانىڭ قۇرىلىسى اياقتالماق. ەلىمىزدەگى ءىرى قالالاردىڭ ساناتىنا ەنگەن شىمكەنت قالاسىندا بۇگىندە 296 مەكتەپكە دەيىنگى ۇيىم بەلسەندى جۇمىس جاساۋدا.
دەرەككوزى: shymkent.gov.kz
