بۇگىن ءماجىلىس ءتوراعاسى نۇرلان نىعماتۋلين ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆتى قابىلدادى.
تاراپتار ەكى ەل اراسىنداعى ىنتىماقتاستىقتى دامىتۋ توڭىرەگىندە ورتاق ويلارىمەن ءبولىستى.
سونداي-اق، كەزدەسۋدە قازاقستان مەن ازەربايجان اراسىنداعى ارىپتەستىككە قاتىستى ءبىرقاتار ماسەلەلەر تالقىلانىپ، پالاتا سپيكەرى ەلشىگە ەكى ەل قارىم-قاتىناسىن، سونىڭ ىشىندە، پارلامەنتارالىق بايلانىستى نىعايتۋعا زور ۇلەس قوسقانىن اتاپ ءوتتى.
پالاتا ءتوراعاسى قازاقستاننىڭ تۇڭعىش پرەزيدەنتى، ەلباسى نۇرسۇلتان نازاربايەۆ ەلدەر اراسىنداعى باۋىرلاستىق قارىم-قاتىناستاردى نىعايتۋعا كۇش سالىپ، ازەربايجانمەن ءوزارا بايلانىستىڭ ەرەكشە ماڭىزدىلىعىنا نازار اۋداراتىنىن ايتتى.
سونىمەن قاتار، نۇرلان نىعماتۋلين ازەربايجان قازاقستانمەن ستراتەگيالىق سەرىكتەس ەل عانا ەمەس، باۋىرلاس مەملەكەت ەكەنىن، بۇگىندە مەملەكەت باسشىسى قاسىم-جومارت توقايەۆتىڭ باكۋمەن ىنتىماقتاستىققا ەرەكشە ءمان بەرەتىنىن العا تارتتى.
ءوز كەزەگىندە مارتەبەلى مەيمان قازاقستانمەن بارلىق سالادا ارىپتەستىك ورناتىپ، پارلامەنتارالىق ءوزارا ءىس-قيمىلدى جانداندىرىپ، سونداي-اق، ساۋدا-ەكونوميكالىق قاتىناستىڭ بەرىك نەگىزى قالانعانىنا توقتالدى.
نۇرلان نىعماتۋلين مەن راشاد ماممادوۆ پارلامەنتارالىق ديالوگتى نىعايتۋ قازاقستان مەن ازەربايجان اراسىنداعى ءوزارا ءتيىمدى ىنتىماقتاستىقتى دامىتۋعا ىقپال ەتەتىنىنە سەنىم ءبىلدىردى.
ءماجىلىستىڭ باسپا ءسوز قىزمەتى
پىكىر قالدىرۋ